သီလဝါဆိပ်ကမ်းရှိ မြန်မာ့ဆိပ်ကမ်းအာဏာပိုင်က တည်ဆောက်နေသည့် ကုန်သေတ္တာနှင့် အထွေထွေ ကုန်တင်ဆိပ်ကမ်း၏ နောက်ခံဧရိယာတွင် ကုန်သေတ္တာလွင်ပြင် ဆက်လက်တည်ဆောက်နေ

သီလဝါဆိပ်ကမ်းရှိ မြန်မာ့ဆိပ်ကမ်းအာဏာပိုင်က တည်ဆောက်နေသည့် ကုန်သေတ္တာနှင့် အထွေထွေ ကုန်တင်ဆိပ်ကမ်း၏ နောက်ခံဧရိယာတွင် ကုန်သေတ္တာလွင်ပြင် ဆက်လက်တည်ဆောက်နေ
Published 3 September 2018

သီလဝါဆိပ်ကမ်းရှိ စီမံကိန်းလုပ်ငန်းခွင်ကို တွေ့ရစဉ်

သီလဝါဆိပ်ကမ်းရှိ ဂျပန်အိုဒီအေချေးငွေဖြင့် တည်ဆောက်နေသည့် ကုန်သေတ္တာနှင့် အထွေထွေကုန်တင်ဆိပ်ကမ်း၏ နောက်ခံဧရိယာတွင် ကုန်သေတ္တာလွင်ပြင်အား ဆက်လက်တည်ဆောက်နေကြောင်း မြန်မာ့ဆိပ်ကမ်းအာဏာပိုင်မှ သတင်းရရှိသည်။

သီလဝါဆိပ်ကမ်းရှိ မြန်မာ့ဆိပ်ကမ်း အာဏာပိုင်မြေကွက် ၂၅၊ ၂၆ ၌ ဂျပန်နိုင်ငံ၏ အိုဒီအေချေးငွေဖြင့် တည်ဆောက်နေသည့် ဆိပ်ကမ်းတည်ဆောက်ရေးလုပ်ငန်းများ လာမည့်ဒီဇင်ဘာလတွင် ပြီးစီးနိုင်မည်ဖြစ်ပြီး ၂၀၁၉ ခုနှစ် နှစ်ဆန်းပိုင်းတွင် သင်္ဘောများ စတင်ဆိုက်ကပ်နိုင်မည်ဖြစ်ကြောင်း သိရသည်။

“လက်ရှိ သီလဝါဒေသ မြေကွက် ၂၅ နဲ့ ၂၆ ပေါ်မှာ ဆောင်ရွက်နေတဲ့ ဆိပ်ကမ်းတည်ဆောက်ရေး စီမံကိန်းတွေကို ၂၀၁၈ ခုနှစ် ဒီဇင်ဘာမှာ စီမံကိန်းလုပ်ငန်းတွေ ပြီးစီးပြီး ၂၀၁၉ ခုနှစ် မတ်လလောက်မှာ သင်္ဘောဆိုက်ကပ်မှုတွေ လက်ခံနိုင်မယ်လို့ ခန့်မှန်းထားတယ်။ အခုက နောက်ခံဧရိယာမှာ ကုန်သေတ္တာလွင်ပြင်ကိုဆက်ပြီး တည်ဆောက်နေပါတယ်။ ပြီးတာနဲ့ ကျန်တဲ့မြေကွက်၂၂၊ ၂၃ နဲ့ ၂၄ ပေါ်မှာ ဆိပ်ကမ်းသစ်တွေ ဆက်ပြီးတည်ဆောက်သွားဖို့ ရှိပါတယ်” ဟု မြန်မာ့ ဆိပ်ကမ်းအာဏာပိုင် ဒုတိယအထွေထွေ မန်နေဂျာ ဒေါက်တာ မျိုးငြိမ်းအေးက ပြောကြားသည်။

သီလဝါဆိပ်ကမ်းဒေသရှိ မြန်မာ့ဆိပ်ကမ်းအာဏာပိုင် မြေကွက်အမှတ် ၂၅ နှင့် ၂၆ တွင် ဂျပန်နိုင်ငံ၏ အိုဒီအေချေးငွေဖြင့် ဆောင်ရွက်နေသည့် ဆိပ်ကမ်းတည်ဆောက်မှုတွင် ဆိပ်ခံတံတားတည်ဆောက်ခြင်း၊ နောက်ခံမြေပေါ်တွင် ဆိပ်ကမ်းဆိုင်ရာ အဆောက်အအုံများ တည်ဆောက်ခြင်းတို့ပါဝင်ပြီး စီမံကိန်းပထမအဆင့်လုပ်ငန်းများ ဆောင်ရွက်နေကြောင်း သိရသည်။

ရန်ကုန်တိုင်း ကျောက်တန်းမြို့နယ် သီလဝါဒေသတွင် ဂျပန်နိုင်ငံ၏ တရားဝင် ဖွံ့ဖြိုးမှုအကူအညီဖြစ်သည့် ဂျပန်ယန်း သန်း  ၂၃၆၈၀ ဖြင့် တည်ဆောက်နေသည့် ဆိပ်ကမ်းတည်ဆောက်ရေးလုပ်ငန်းများတွင် မီတာ  ၄၀၀ _ ၄၀ ရှိ ပင်မတံတား (Steel Jacket Type ) ၊ ၈၀-၉၀ မီတာ _ ၁၅-၂၀ မီတာရှိ ချဉ်းကပ်တံတားသုံးစင်း၊ ဆိပ်ကမ်းဆိုင်ရာ နောက်ခံမြေ ၃၇ ဧကပေါ်တွင် ဆိပ်ကမ်းဆိုင်ရာ အဆောက်အအုံများ တည်ဆောက်ခြင်း၊ ကုန်ကိုင်တွယ် စက်ကိရိယာများဖြစ်သည့် Quay Crane နှစ်စင်း၊ RTG ခြောက်စင်း၊ Reach Stacker သုံးစင်း၊ Trailer ခြောက်စင်းနှင့် Chassis ခြောက်စင်းအား ဝယ်ယူတပ်ဆင်ခြင်းတို့ပါဝင်ကြောင်း သိရသည်။

စီမံကိန်းတည်ဆောက်ရေးကာလမှာ ၂၀၁၆ ခုနှစ် ဇွန်တွင် စီမံကိန်းလုပ်ငန်းများ စတင်အကောင်ထည်ဖော်ဆောင်ရွက်ခဲ့ပြီး ၂၀၁၈ ခုနှစ် ဒီဇင်ဘာတွင် စီမံကိန်းလုပ်ငန်းများ ပြီးစီးမည်ဖြစ်သည်။

သီလဝါဧရိယာ အခြေခံအဆောက်အအုံများ ဖွံ့ဖြိုးတိုးတက်ရေး သီလဝါဆိပ်ကမ်းဒေသသို့ ရန်ကုန်ဆိပ်ကမ်း တိုးချဲ့တည်ဆောက်ရေး စီမံကိန်း ပထမအဆင့်အတွက် ဂျပန်အစိုးရနှင့် မြန်မာအစိုးရတို့အကြား ချေးငွေစာချုပ်များကို ၂၀၁၃ ခုနှစ်နှင့် ၂၀၁၅ ခုနှစ်များတွင် စာချုပ်ချုပ်ဆို၍ စီမံကိန်းအတွက် အတိုင်ပင်ခံအဖွဲ့အစည်းအဖြစ် နီပွန်ကိုအိ ကုမ္ပဏီမှ Consulting Services လုပ်ငန်းများကို ၂၀၁၄ ခုနှစ်တွင် စတင်ဆောင်ရွက်ခဲ့ပြီး ၂၀၁၅ ခုနှစ် စက်တင်ဘာတွင် နီပွန်ကိုအိကုမ္ပဏီနှင့် မြန်မာ့ဆိပ်ကမ်း အာဏာပိုင်တို့အကြား နှစ်ဖက်သဘောတူစာချုပ် လက်မှတ်ရေးထိုးခဲ့ခြင်း ဖြစ်သည်။

တည်ဆောက်ရေးကန်ထရိုက်တာအတွက် ၂၀၁၅ ခုနှစ်တွင် Price Bid Opening ဆောင်ရွက်ခဲ့ပြီး တည်ဆောက်ရေး ကန်ထရိုက်တာအဖြစ် စိစစ်ရွေးချယ်ခဲ့သော ToYO JFEE Joing venture နှင့် မြန်မာ့ဆိပ်ကမ်း အာဏာပိုင်တို့ နှစ်ဖက်သဘောတူစာချုပ်ကို ၂၀၁၅ ခုနှစ် ဒီဇင်ဘာတွင် လက်မှတ်ရေးထိုး ဆောင်ရွက်ခဲ့ခြင်းဖြစ်ကြောင်း သိရသည်။

 

Most Read

Most Recent