၂၀၁၈-၂၀၁၉ ဘဏ္ဍာရေးနှစ် အမျိုးသားစီမံကိန်းဥပဒေကြမ်းပါ ရင်းနှီးမြှုပ်နှံမှု အနက် နိုင်ငံပိုင်အခန်းရင်းနှီးမြှုပ်နှံမှု တန်ဖိုးအပေါ် ကျပ် ၁၈၉၅၉၁ ဒသမ ၃၈၀ သန်း (ကျပ် ၁၈၉ ဘီလျံကျော်) စိစစ်လျှော့ချရန် တင်ပြမှုအား ဥပဒေကြမ်းပူးပေါင်းကော်မတီက ထောက်ခံကြောင်း တင်ပြခဲ့သည်။
နေပြည်တော်၌ သြဂုတ် ၂၈ ရက်က ပြုလုပ်သော ဒုတိယအကြိမ် ပြည်ထောင်စုလွှတ်တော် နဝမပုံမှန်အစည်းအဝေး ၁၄ ရက် မြောက်နေ့တွင် ၂၀၁၈-၂၀၁၉ ခုနှစ် အမျိုးသားစီမံကိန်းဥပဒေကြမ်းနှင့်စပ်လျဉ်း၍ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာကို ဥပဒေကြမ်းပူးပေါင်းကော်မတီက လွှတ်တော်သို့ တင်ပြရာတွင် အထက်ပါအတိုင် ထောက်ခံခဲ့ခြင်းဖြစ်သည်။
၂၀၁၈-၂၀၁၉ ဘဏ္ဍာရေးနှစ် အမျိုးသားစီမံကိန်းဥပဒေကြမ်းပါ ရင်းနှီးမြှုပ်နှံမှု အနက် နိုင်ငံပိုင်အခန်းရင်းနှီးမြှုပ်နှံမှုတန်ဖိုးအပေါ် စီမံကိန်းလုပ်ငန်းများနှင့် ရငွေသုံးငွေများ စိစစ်ရေးပူးပေါင်းအဖွဲ့ ၂၀ နှင့် ပြည်သူ့ ငွေစာရင်းပူးပေါင်းကော်မတီတို့မှ စိစစ်လျော့ချရန် အဆိုပြုသည့် ကျပ် ၁၈၉၅၉၁ ဒသမ ၃၈၀ သန်းကို ပြည်ထောင်စုလွှတ်တော်က အတည်ပြုပေးရန်နှင့် နိုင်ငံပိုင်အခန်းရင်းနှီးမြှုပ်နှံမှုတန်ဖိုးအနက် အထက်စာပိုဒ်ခွဲ (က)ပါ စိစစ်လျှော့ချပြီး ကျန်ရင်းနှီးမြှုပ်နှံမှုတန်ဖိုးအရ အမျိုးသားစီမံကိန်းဥပဒေကြမ်း၏ ပိုင် ဆိုင်မှုအခန်းအလိုက် ရင်းနှီးမြှုပ်နှံမှု လျာထားချက် နိုင်ငံပိုင်အခန်းတွင် ကျပ် ၈၂၈၆၇၂၉ ဒသမ ၅၁၆ သန်း၊ သမဝါယမပိုင်အခန်းတွင် ကျပ် ၄၆၆၁ ဒသမ ၃၀၀ သန်းနှင့် ပုဂ္ဂလိကပိုင်အခန်းတွင် ကျပ်၂၄၈၆၅၀၉၆ ဒသမ ၁၀၀ သန်း စုစုပေါင်း ကျပ် ၃၃၁၅၆၄၈၆ ဒသမ ၉၁၆ သန်းအား ပြည်ထောင်စုလွှတ်တော်က အတည်ပြုပေးရန် ဥပဒေကြမ်းပူးပေါင်းကော်မတီက ထောက်ခံတင်ပြထားသည်။
ဆက်လက်ပြီး ဥပဒေကြမ်း ပူးပေါင်းကော်မတီက ၂၀၁၈ - ၂၀၁၉ ဘဏ္ဍာနှစ် စုစု ပေါင်းရင်းနှီးမြှုပ်နှံမှုရည်မှန်းချက် ကျပ် ၃၃၃၄၆ ဒသမ ၀၇၈ ဘီလျံတွင် ပုဂ္ဂလိကပိုင်အခန်း၏ ရင်းနှီးမြှုပ်နှံမှုကျပ် ၂၄၈၆၅ ဒသမ ၀၉၆ ဘီ လျံပါဝင်ရာ ရည်မှန်းချက်အတိုင်း ရင်းနှီးမြှုပ်နှံလာစေရန် ပြည်ထောင်စုအစိုးရအဖွဲ့အနေဖြင့် မူဝါဒနှင့်လုပ်ငန်းအစီအစဉ်များကို တိကျစွာ ရေးဆွဲချမှတ်ဆောင်ရွက်သွားရန်လိုအပ်ကြောင်း သဘောထားမှတ်ချက်ပြုထားသည်။
ထို့ပြင် အမျိုးသားစီမံကိန်းဥပဒေကြမ်းပါ စုစုပေါင်းပြည်တွင်းထုတ်လုပ်မှုနှင့် ဝန်ဆောင်မှုတန်ဖိုး (GDP) တွက်ချက်ရာတွင် ပုံမှန်ဈေးနှုန်းအဖြစ် အသုံးပြုသည့် အခြေခံနှစ်ကို ၂၀၁၀-၂၀၁၁ ခုနှစ်အစား ၂၀၁၅-၂၀၁၆ ခုနှစ်သို့ ပြောင်းလဲသတ်မှတ်ခဲ့ခြင်း၊ ၂၀၁၈-၂၀၁၉ ဘဏ္ဍာနှစ်၏ စုစုပေါင်း သီးနှံစိုက်ပျိုးမည့်ဧရိယာ ၄၉၈၈၂၉၁၅ ဧကသည် ၂၀၁၇-၂၀၁၈ ဘဏ္ဍာနှစ် စိုက်ပျိုးဧရိယာ ၅၀၇၀၁၃၉၉ ဧကထက် ၈၁၈၄၈၄ ဧက လျော့နည်းသော်လည်း လယ်ယာကဏ္ဍ၏ ထုတ်လုပ်မှုကို ၂၀၁၇- ၂၀၁၈ ဘဏ္ဍာနှစ်ထက် ၂ ဒသမ ၄ ရာခိုင်နှုန်းတိုးတက်ရန် ရည်မှန်ချက်နှင့် ၎င်းရည်မှန်းချက် ပြည့်မီစေရန် ပံ့ပိုးဆောင်ရွက်မည့်အစီအစဉ်နှင့် အမေရိကန် ပြည်ထောင်စုနှင့် တရုတ်ပြည်သူ့သမ္မတနိုင်ငံတို့ကြား ဖြစ်ပေါ်နေသည့် ကုန်သွယ်မှုအခြေ အနေများနှင့် အမေရိကန်ဒေါ်လာငွေတန်ဖိုး တိုးတက်မှုတို့အရ မြန်မာကျပ်ငွေတန်ဖိုး ကျဆင်းမှုအပါအဝင် မိမိတို့နိုင်ငံအပေါ် ရိုက်ခတ်လာနိုင်သည့် စီးပွားရေးအခြေအနေများနှင့်စပ်လျဉ်း၍ ပြည်ထောင်စုအစိုးရအဖွဲ့၏ လတ်တလောအရေးယူဆောင်ရွက်မှုနှင့် ထိခိုက်မှုအနည်းဆုံးဖြစ်စေရေးတို့အတွက် ကြိုတင်ပြင်ဆင်မှုအခြေအနေများကို ပြည်ထောင်စုအစိုးရအဖွဲ့အနေဖြင့် ပြည်ထောင်စုလွှတ်တော်မှတစ်ဆင့် ပြည်သူများသို့ ပွင့်လင်းမြင်သာစွာ ရှင်းလင်းတင်ပြသွားရန် ဥပဒေကြမ်းပူးပေါင်းကော်မတီက မှတ်ချက်ပြုထားကြောင်း သိရသည်။
