ရန်ကုန်တိုင်းအတွင်း ရွှေ့ပြောင်းနေထိုင်သူများ နေစရာရရှိနိုင်ရေးအတွက် နှစ်ရှည်ချေးငွေစနစ်ဖြင့် အိမ်ရာစီမံကိန်း ဆောင်ရွက်နိုင်ရန် စီစဉ်နေကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ပြောကြားသည်။
“ဒီနေရာမှာ နေစရာအခက်အခဲ ဖြစ်နေသူတွေကတော့ အပိုင်းသုံးပိုင်းရှိပါတယ်။ တစ်ပိုင်းကတော့ အကြောင်းကြောင်းကြောင့် ရွှေ့ပြောင်းလာပြီးလက်လုပ်လက် စားဘဝနဲ့နေထိုင်နေရပြီး လက်ငင်းချေးငွေ မပေးနိုင်လို့ နေစရာမရှိဖြစ်နေတဲ့သူတွေ ဖြစ်ပါတယ်။ တချို့ကတော့ ကုမ္ပဏီမှာ အလုပ်လုပ်နေမယ့် လစာမပေးနိုင်တဲ့အတွက် အိမ်ငှားနေရတဲ့ သူတွေဖြစ်ပါတယ်။ တချို့ကတော့ အစိုးရဝန်ထမ်းဖြစ်ပြီး အိမ်ငှားနေနေရတဲ့သူတွေ ဖြစ်ပါတယ်။ ဒီလို နေထိုင်နေ ရတဲ့သူတွေကို နေစရာခိုင်ခိုင်မာမာ ရရှိစေဖို့အတွက် နှစ်ရှည်ချေးငွေစနစ်တစ်ခုနဲ့ အိမ်ရာစီမံကိန်းတွေ ဆောင်ရွက်ပေးနိုင်ဖို့ နိုင်ငံတော်က မူဝါဒချမှတ်ပြီး ဆောင်ရွက်နေပါတယ်” ဟု ဝန်ကြီးချုပ်က ပြောကြားသည်။
အဆိုပါ အခြေအနေအား တိုင်းဒေသကြီးအတွင်း အကောင်အထည်ဖော်ဆောင်ရွက်နိုင်ရန်အတွက် လာမည့်နှစ်များတွင် ကြိုးပမ်းသွားမည်ဖြစ်ကြောင်း၊ အစိုးရသစ် စတင်တာဝန်ယူသည့် အချိန်မှစတင်ကာ ကျူးကျော်စာရင်းများကို စနစ်တကျ ကောက်ခံခဲ့ကြောင်း၊ ကျူးကျော်အိမ်ရာများတွင် နေထိုင်သူများ၏ ဘဝအားမြှင့်တင် ဆောင်ရွက်ပေးနိုင်ရန်အတွက် ကျူးကျော်စာရင်း ကောက်ယူခဲ့ခြင်းဖြစ်ကြောင်း၊ ကျူးကျော်စာရင်းကောက်ယူရာတွင် လက်ဗွေ၊ မျက်နှာများကို မှတ်တမ်းတင်ထားကြောင်း၊ အိမ်ရာစနစ်မရှိသဖြင့် ကျူးကျော်နေရာများတွင် နေထိုင်သူကျူးကျော်ကတ်ပြား ထုတ်ယူထားသူ တစ်သိန်းကျော်ခန့် ရှိနေကြောင်း ၎င်းက ဆက်လက်ပြောကြားသည်။
“ဒီနေထိုင်သူတွေကို စနစ်တကျ နေရာပြန်လည်ချထားပေးနိုင်ဖို့နဲ့ အိမ်ရာတွေ ရရှိနိုင်ဖို့နဲ့ လူမှုဘဝမြှင့်တင်ပေးနိုင်မယ်ဆိုရင် လူသားအရင်းအမြစ်တစ်ခုကို ပြုစုပျိုး ထောင်ပေးနိုင်ရာ ရောက်မှာဖြစ်ပါတယ်။ ဒါကြောင့်မို့ ကျွန်တော်တို့ ဒီအခြေအနေကို ပြုပြင်ပြောင်းလဲဖို့ ဆောင်ရွက်နေပါတယ်” ဟု ဝန်ကြီးချုပ် ဦးဖြိုးမင်းသိန်းက ပြောကြားသည်။
ရန်ကုန်တိုင်းသည် အလုပ်အကိုင်အခွင့်အလမ်း တိုးပွားသည့်အတွက် စက်ရုံ၊ အလုပ်ရုံများ၊ ရင်းနှီးမြှုပ်နှံမှုများသည် ရန်ကုန်မြို့ကို စိတ်ဝင်စားကြကြောင်း၊ ရန်ကုန်မြို့သည် အခြေခံအဆောက်အအုံနှင့် စက်မှုဇုန်များတည်ရှိသည့် မြို့ဖြစ်သဖြင့် ရွှေ့ပြောင်းလုပ်သားများသည် ရန်ကုန်တိုင်း အတွင်းသို့ ဝင်ရောက်လာကြောင်း ဝန်ကြီးချုပ် ဦးဖြိုးမင်းသိန်းက ပြောကြားသည်။
“ရန်ကုန်မြို့သို့ ပြောင်းရွှေ့လာသည့် ရွှေ့ပြောင်းလုပ်သားများအတွက် တန်ဖိုးသင့်၊ တန်ဖိုးနည်း၊ တန်ဖိုးမြင့်အိမ်ရာတွေ ရောင်းချပေးနိုင်ဖို့ ဆောင်ရွက်နေပါတယ်။ ကျွန်တော်တို့တိုင်းမှာ ရင်းနှီးမြှုပ်နှံတဲ့သူတွေကို ကျွန်တော်တို့ စတင်တာဝန်ယူတဲ့အချိန်ကစပြီး အခုအချိန်ထိ မြေပေးမယ်။ အလုပ်အကိုင်အခွင့်အလမ်းတွေရအောင် ဖန်တီးပေးနိုင်မယ်။ စက်ရုံအလုပ်ရုံတွေ လာရင်းနှီးမြှုပ်နှံရင် ဘယ်လိုစီစဉ်ဆောင်ရွက်ပေးနိုင်မယ်ဆိုတာတွေကို လုပ်ပေးနိုင်ဖို့ အားနည်းခဲ့ပါတယ်။ ဘာကြောင့်လဲဆိုတော့ မြေကွက်လပ်တွေ အားလုံးက ပိုင်ဆိုင်တဲ့သူတွေရှိနေတာ ဖြစ်ပါတယ်” ဟု ဝန်ကြီးချုပ်က ပြောကြားသည်။
ထို့ကြောင့် အသစ်ဖော်ထုတ်မည့် စက်မှုဇုန်နေရာများတွင် အလုပ်အကိုင် အခွင့်အလမ်းများ ဖန်တီးနိုင်မှုများကို ပြင်ဆင်သွားမည်ဖြစ်ကြောင်း၊ အဆိုပါနေရာများတွင် တန်ဖိုးနည်း၊ တန်ဖိုးသင့်၊ တန်ဖိုးမြင့် အိမ်ရာများကိုလည်း တည်ဆောက်သွားမည်ဖြစ်ကြောင်း သိရသည်။
“ရွှေ့ပြောင်းလုပ်သားတွေထဲမှာ ကိုယ့်ရဲ့အလုပ်အကိုင်အခွင့်အလမ်းကြောင့် ရောက်လာပြီး အဆင်ပြေမှုတွေရှိသလိုပဲ။ အချို့က အလုပ်အကိုင်အခွင့်အလမ်းရပေမယ့် နယ်ကို ငွေပြန်ပို့ဖို့၊ တချို့က ကျူးကျော်ကို အကြောင်းပြုပြီး လုပ်ကွက်၊ ကိုင်ကွက်တစ်ခုလိုမျိုး စီးပွားရှာစားနေတာကို တွေ့ရတယ်။ ကျူးကျော်နေရာတွေကို ခြေကုပ်ယူပြီး ရာဇဝတ်မှုကျူးလွန်နေတာကိုလည်း တွေ့ရပါတယ်” ဟု ဝန်ကြီးချုပ် ဦးဖြိုးမင်းသိန်းက ပြောကြားသည်။
