အစွန်းရောက်များ၏ ဆန့်ကျင်ကန့်ကွက်မှုများကို နားယောင်ခြင်း၊ ခြိမ်းခြောက်လုပ်ကြံ သတ်ဖြတ်မှုများအား ကြောက်ရွံ့ခြင်းနှင့် နိုင်ငံသားအဖြစ် နိုင်ငံသားစိစစ်ရေးကတ်ပြားကိုသာ ထုတ်ပေးရန် တောင်းဆိုနေခြင်းကြောင့် ရခိုင်ပြည်နယ်တွင် NV ကတ်လျှောက်ထားရန် အများစု ကျန်ရှိနေခြင်းဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေက ပြောကြားသည်။
ပြည်ထောင်စုစာရင်းစစ်ချုပ်ရုံး၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ငွေစာရင်း ပူးပေါင်းကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ အမှတ်စဉ် (၇/၂၀၁၈) နှင့် လွှတ်တော်ကိုယ်စားလှယ်များ၏ ဆွေးနွေးချက်များအပေါ် နေပြည်တော်၌ သြဂုတ် ၃၀ ရက်က ပြုလုပ်သော ဒုတိယအကြိမ် ပြည်ထောင်စုလွှတ်တော် နဝမပုံမှန်အစည်းအဝေး ၁၅ ရက်မြောက်နေ့တွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီးက ပြန်လည်ရှင်းလင်း ပြောကြားရာတွင် အထက်ပါအတိုင်း ပြောကြားခဲ့ခြင်းဖြစ်သည်။
“ရခိုင်ပြည်နယ်မှာ NV ကတ်လျှောက်ထားဖို့ ကျန်ရှိနေတဲ့ အဓိက အကြောင်းအရင်းတွေကတော့ အစွန်းရောက်များရဲ့ ဆန့်ကျင်ကန့်ကွက်မှုများကို နားယောင်ခြင်း၊ ခြိမ်းခြောက်မှု လုပ်ကြံသတ်ဖြတ်မှုများအား ကြောက်ရွံ့ခြင်း၊ နိုင်ငံသားစိစစ်ခံရသည့် ယာယီသက်သေခံလက်မှတ်များ NV ကတ်အစား နိုင်ငံသားအဖြစ် နိုင်ငံသားစိစစ်ရေး ကတ်ပြားကိုသာ ထုတ်ပေးရန် တောင်းဆိုနေခြင်းကြောင့် NV ကတ် လျှောက်ထားဆောင်ရွက်ခြင်း အားနည်းနေကြောင်း တွေ့ရပါတယ်” ဟု ပြည်ထောင်စုဝန်ကြီး ဦးသိန်းဆွေက ပြောကြားသည်။
နိုင်ငံတစ်ဝန်းလုံးတွင် ယာယီသက်သေခံလက်မှတ် အပ်နှံမှု စုစုပေါင်း ၄၆၉,၁၈၃ ခုရှိခဲ့ပြီး ၂၀၁၅ ခုနှစ် ဇွန် ၁ ရက်မှ ၂၀၁၈ ခုနှစ် သြဂုတ် ၂၈ ရက်အထိ စုစုပေါင်း ၆၅,၄၀၈ ဦးကို NV ကတ်ထုတ်ပေးနိုင်ခဲ့ကာ လျှောက်ထားရန် ကျန်ရှိနေသူ အများစုသည် ရခိုင်ပြည်နယ်မှဖြစ်၍ ယာယီသက်သေခံ လက်မှတ် အပ်နှံသူ စုစုပေါင်း ၃၉၇,၄၉၇ ဦးနှင့် NV ကတ်ကိုင်ဆောင်သူ ၁၆,၃၉၅ ဦးရှိကြောင်း ဝန်ကြီးက ပြောကြားသည်။
နိုင်ငံသားနှင့် နိုင်ငံသားဖြစ်ခွင့်ရသူ ဟုတ် မဟုတ် အဆုံးဖြတ်ခံယူနိုင်ရန်အတွက် လျှောက်ထားသူများကို ၂၀၁၅ ခုနှစ် ဇန်နဝါရီလမှစပြီး ရခိုင်ပြည်နယ်အတွင်းရှိ မြို့နယ်အားလုံးတွင် နိုင်ငံသားစိစစ်ရေးလုပ်ငန်းစဉ်နှင့် နိုင်ငံသားစိစစ်ပြီး ထိုက်သင့်သည့် နိုင်ငံသား အဆင့်အတန်းတစ်ခု သတ်မှတ်ပေးခြင်း၊ နိုင်ငံသူ၊ နိုင်ငံသားဖြစ်ခွင့် လက်မှတ်များထုတ်ပေးခြင်းတို့ကို ယနေ့တိုင် စဉ်ဆက်မပြတ် ဆောင်ရွက်ပေးလျက်ရှိကြောင်း၊ ရခိုင်ပြည်နယ်တွင် ၂၀၁၅ ခုနှစ် ဇွန် ၁ ရက်မှ ၂၀၁၈ ခုနှစ် သြဂုတ် ၂၈ ရက်ထိ နိုင်ငံသား သက်သေခံကတ်ပြား ထုတ်ပေးပြီးသူ စုစုပေါင်း ၁၆၃၉၅ ဦးရှိပြီး အဆိုပါ NV ကတ်ကိုင်ဆောင်သူများမှာ နိုင်ငံသူ၊ နိုင်ငံသားဖြစ်ခွင့်ရသူ ဟုတ်၊ မဟုတ် ဗဟိုအဖွဲ့ရဲ့ အဆုံးအဖြတ်ခံယူရန် လျှောက်ထားလာမည်ဆိုပါက နိုင်ငံသားစိစစ်ရေး လုပ်ငန်းစဉ်အတိုင်း ဥပဒေနှင့်အညီ စနစ်တကျ စီစဉ်ဆောင်ရွက်လျက်ရှိကြောင်း သိရသည်။
