သြဂုတ် ၃၀ ရက်က နေပြည်တော်ရှိ သင်္ဂဟဟိုတယ်တွင် ပြုလုပ်သော ညှိနှိုင်းအစည်းအဝေးကို တွေ့ရစဉ်
အမျိုးသမီး ရွှေ့ပြောင်းအလုပ်သမားများ အကြမ်းဖက်ခံရခြင်း၊ လူကုန်ကူးခံရခြင်းများ လျော့နည်းစေရန်အတွက် ဘေးကင်းလုံခြုံပြီး မျှတမှုရှိသော ရွှေ့ပြောင်းသွားလာ နေထိုင်ခြင်း စီမံကိန်းဆိုင်ရာ ညှိနှိုင်းဆွေးနွေးပွဲကို သြဂုတ် ၃၀ ရက်က နေပြည်တော်ရှိ သင်္ဂဟဟိုတယ်တွင် ပြုလုပ်ခဲ့သည်။
“ဒီဆွေးနွေးပွဲကို ထိခိုက်လွယ်တဲ့ အမျိုးသမီး ရွှေ့ပြောင်းအလုပ်သမားများ အကြမ်းဖက်ခံရမှု၊ လူကုန်ကူးခံရမှု လျော့နည်းလာစေဖို့ ကျား/မရေးရာ၌ စိတ်ပါဝင်စားစွာ သတိပြု ဆောင်ရွက်တဲ့ ရွှေ့ပြောင်းသွားလာခြင်းဆိုင်ရာ စီမံအုပ်ချုပ်မှုမူဘောင်နဲ့ ပိုမိုကောင်းမွန်တဲ့ ကာကွယ်စောင့်ရှောက်မှုများ ရရှိစေဖို့အတွက် မြန်မာနိုင်ငံ အပါအဝင် အာဆီယံ ၁၀ နိုင်ငံမှာ စီမံကိန်းကို အကောင်အထည်ဖော် ဆောင်ရွက်နိုင်ဖို့ ရည်ရွယ်ကျင်းပခြင်း ဖြစ်ပါတယ်” ဟု အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က ပြောကြားသည်။
အမျိုးသမီးများအပေါ် အကြမ်းဖက်မှု ပပျောက်ရန် ဆောင်ရွက်နေသည့် EU-UN Spotlight Initiative နှစ်ရှည်စီမံကိန်း၏ အစိတ်အပိုင်းတစ်ခုဖြစ်သည့် ILO အဖွဲ့နှင့် UN Women အဖွဲ့ ပူးပေါင်းအကောင်အထည်ဖော် ဆောင်ရွက်နေသည့် အာဆီယံဒေသတွင်း အမျိုးသမီး ရွှေ့ပြောင်းအလုပ်သမားများ၏ ရပိုင်ခွင့်များနှင့် အခွင့်အရေးများ ရရှိစေခြင်း “Safe & Fair” စီမံကိန်း ၂၀၁၈-၂၀၂၂ ကို နေပြည်တော်တွင် ပြုလုပ်သည့် အစည်းအဝေး၌ မိတ်ဆက်ပေးမည်ဖြစ်ကြောင်း ဦးမျိုးအောင်က ဆိုသည်။
အမြဲတမ်းအတွင်းဝန် ဦးမျိုးအောင်က ““Safe & Fair စီမံကိန်းဟာ ကျား/မ အခြေပြုလုပ်သားများ ရွှေ့ပြောင်းသွားလာခြင်းဆိုင်ရာ မူဘောင်များဖြင့် အမျိုးသမီး ရွှေ့ပြောင်းအလုပ်သမားများကို ပိုမိုကောင်းမွန်စွာ ကာကွယ်စောင့်ရှောက်ပေးဖို့၊ အမျိုးသမီး ရွှေ့ပြောင်းအလုပ်သမားများ အကြမ်းဖက်ခံရမှုနဲ့ လူကုန်ကူးခံရမှု လျော့နည်းလာပြီး အရည်အသွေးပြည့်ဝတဲ့ ဝန်ဆောင်မှုကို အကျိုးခံစားခွင့်ရရှိဖို့၊ အမျိုးသမီးများရဲ့ ပါဝင်ဆောင်ရွက်မှုနဲ့ အခွင့်အရေးဆိုင်ရာ အချက်အလက်၊ အသိပညာ ဗဟုသုတနဲ့ သဘောထားများ ကောင်းမွန်တိုးတက်လာစေဖို့စတဲ့ ရည်မှန်းချက်များနဲ့ ဆောင်ရွက်မှာ ဖြစ်ပါတယ်” ဟု ပြောကြားသည်။
ဆက်လက်၍ “ကျွန်တော်တို့နိုင်ငံရဲ့ စီးပွားရေးမူဝါဒမှာ ပြည်တွင်းနေ နိုင်ငံသားများနဲ့ နိုင်ငံရပ်ခြားမှ ပြန်လည်ရောက်ရှိလာသော မြန်မာနိုင်ငံသားများအားလုံးအတွက် အလုပ်အကိုင် အခွင့်အလမ်းများ ဖော်ထုတ်ပေးရန်နှင့် အလုပ်အကိုင် အခွင့်အလမ်း မြင့်မားသော စီးပွားရေးလုပ်ငန်းများကို ကာလတိုအတွင်း ပိုမိုဦးစားပေးဆောင်ရွက်ရန်ဆိုပြီး ချမှတ်ဆောင်ရွက်လျက်ရှိသလို အလုပ်သမားရေးရာ ဥပဒေများနဲ့အညီ အစိုးရ၊ အလုပ်ရှင်၊ အလုပ်သမား သုံးပွင့်ဆိုင် ပူးပေါင်းဆောင်ရွက်မှုဖြင့် နိုင်ငံတော်ဖွံ့ဖြိုးတိုးတက်လာစေဖို့နဲ့ ပြည်တွင်းပြည်ပတို့၌ သင့်တော်ကောင်းမွန်တဲ့ အလုပ်အကိုင်ရရှိရေးနဲ့ ဘေးကင်းဝေးတဲ့ ရွှေ့ပြောင်းသွားလာမှု ဖြစ်ပေါ်လာစေရေး အလေးထား ဆောင်ရွက်လျက် ရှိပါတယ်” ဟု ဦးမျိုးအောင်က ပြောကြားသည်။
အမျိုးသမီးများသည် နိုင်ငံတော် ဖွံ့ဖြိုးတိုးတက်ရေးအတွက် အဓိကအခန်းကဏ္ဍတွင် ပါဝင်ဆောင်ရွက်လျက်ရှိခြင်းကြောင့် အမျိုးသမီးများ သင့်တော်ကောင်းမွန်သည့် အလုပ်အကိုင်များ ရရှိစေရန်၊ အလုပ်သမား အခွင့်အရေးများ အပြည့်အဝရရှိရန်၊ လူမှုကာကွယ်စောင့်ရှောက်မှုများ ရရှိရန်၊ ကျန်းမာရေး စောင့်ရှောက်မှုများ ရရှိရန်နှင့် ကာကွယ်စောင့်ရှောက်ရန်တို့ကိုလည်း အလေးထား ဆောင်ရွက်မည်ဖြစ်ကြောင်း၊ အမျိုးသမီးများအတွက် ဘေးကင်းလုံခြုံပြီး သင့်တင့်မျှတသည့် လုပ်သားရွှေ့ပြောင်းသွားလာမှု ခိုင်မာအားကောင်းလာစေမည့် ကျား/မ သာတူညီမျှမှုနှင့် အခွင့်အရေး အခြေပြုဥပဒေများ ပြဋ္ဌာန်းရာတွင်လည်း တစ်နိုင်ငံလုံးရှိ အမျိုးသမီးထုအား လွှမ်းခြုံနိုင်ရန် အချိန်ယူရေးဆွဲရန် လိုအပ်ကြောင်း ဦးမျိုးအောင်က ဆိုသည်။
