မောင်တောမြို့ ကညင်တန်း (မြို့မ) အုပ်စု တောင်ရွာ၌ မီးလောင်မှု ဖြစ်ပွားနေသည်ကို တွေ့ရစဉ်
မောင်တောမြို့ ကညင်တန်း (မြို့မ) အုပ်စု တောင်ရွာ၌ နေအိမ်နှစ်လုံး သြဂုတ် ၂၉ ရက် နံနက် ၁ နာရီက မီးလောင်မှုဖြစ်ပွားခဲ့ကြောင်း သိရသည်။
မီးလောင်မှုဖြစ်စဉ်မှာ မောင်တောမြို့က ညင်တန်း (မြို့မ) အုပ်စု တောင်ရွာနေ မာမောက်ကာမာ (ဘ) မာမောက်ကာဆိမ်း အသက် (၃၅ နှစ်) ၏ (၂၀ x ၁၅ x ၁၀)ပေ သွပ်မိုး၊ ဝါထရံကာ၊ ပျဉ်ခင်းနေအိမ်ရှိ မီးဖိုဆောင်မှ မီးဖိုတွင် အမဲသားခြောက် ကျပ်တင်ထားရာမှတစ်ဆင့် အနီးရှိ ဝါးထရံသို့ မီးကူးစက် လောင်ကျွမ်းခဲ့ပြီး အနီးရှိ နေအိမ် အေဆန် (ဘ) မာမောက်ကာဆိမ်း ၏ (၂၅ x ၁၅ x ၁၀)ပေ သွပ်မိုး၊ ဝါးထရံကာ၊ ပျဉ်ခင်း နေအိမ်နှစ်လုံး မီးလောင်ကျွမ်းခဲ့ခြင်း ဖြစ်ကြောင်းနှင့် မီးလောင်ဆုံးရှုံးမှု တန်ဖိုး ကျပ် ၇၇၀၀၀၀ ခန့် မီးလောင်ဆုံးရှုံးခဲ့ကြောင်း သိရသည်။
မီးလောင်မှုအား မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ ကျေးရွာသူ/သားများ၊ လုံခြုံရေး တပ်ဖွဲ့ဝင်များ လိုက်ပါပြီး မီးငြှိမ်းသတ်ခဲ့ရာ နံနက် ၂ နာရီတွင် မီးထိန်းနိုင်ခဲ့ပြီး နံနက် ၂ နာရီခွဲ မီးလုံးဝငြိမ်းခဲ့ကြောင်း နှင့် လူ၊ တိရစ္ဆာန် ထိခိုက်ဒဏ်ရာ ရရှိမှုများ မရှိကြောင်း မောင်တောမီးသတ်တပ်ဖွဲ့မှ သိရသည်။
နေအိမ်ပိုင်ရှင်အား ကညင်တန်း (မြို့မ) အုပ်စု တောင်ရွာနေ မာမောက်ကာမာ (ဘ) မာမောက်ကာဆိမ်းအား မောင်တောမြို့မရဲစခန်းမှ (ပ-၃၂/၂၀၁၈) ၊ ပုဒ်မ ၂၈၅ ဖြင့် အမှုဖွင့်အရေးယူ ဆောင်ရွက်လျက် ရှိသည်။
ယင်းမတိုင်မီ သြဂုတ် ၂၄ ရက် ညနေ ၁၀ နာရီခွဲခန့်ကလည်း မောင်တောမြို့ သရက်အုပ်ကျေးရွာအုပ်စု အာရှိတ်ဂျာကျေးရွာနေ ဆော်ရောက်ဟူဆောင်း၏ (၁၅ x ၁၂ x ၁၀) ပေ၊ ဓနိမိုး၊ ဝါးထရံကာ၊ မြေစိုက်နေအိမ်တွင် မီးဖိုဆောင်မှ တစ်ဆင့် အနီးရှိ ဝါးထရံသို့ မီးကူးစက် လောင်ကျွမ်းခဲ့ကြောင်း၊ အိမ်နှစ်လုံး မီးကူးစက် လောင်ကျွမ်းခဲ့ကြောင်း သိရသည်။
