ကရင်လူ့အခွင့်အရေးအဖွဲ့ (KHRG) ၏ အစီရင်ခံစာ မိတ်ဆက်ပွဲကို သြဂုတ် ၂၉ ရက် နံနက်က ရန်ကုန်မြို့ရှိ Orchid Hotel တွင် ပြုလုပ်စဉ်
မြန်မာနိုင်ငံအရှေ့တောင်ပိုင်းရှိ လူထုပါဝင်ခွင့်မရှိသော ဖွံ့ဖြိုးရေးစီမံကိန်းများကြောင့် မြေယာသိမ်းယူမှုများ၊ လူအခွင့်အရေး ချိုးဖောက်မှုများနှင့် ပတ်သက်၍ ကရင်လူ့အခွင့်အရေးအဖွဲ့ (KHRG) ၏ အစီရင်ခံစာ မိတ်ဆက်ပွဲကို သြဂုတ် ၂၉ ရက် နံနက်က ရန်ကုန်မြို့ရှိ Orchid Hotel တွင် ပြုလုပ်ခဲ့သည်။
အဆိုပါ အစီရင်ခံစာထုတ်ပြန်ရခြင်းမှာ မြန်မာနိုင်ငံအရှေ့တောင်ပိုင်းရှိ ကရင်ပြည်နယ်အတွင်း မြေယာသိမ်းဆည်းမှုပြဿနာများနှင့် ငြိမ်းချမ်းရေးရပြီးနောက် ကရင် ပြည်နယ်အတွင်း စီမံကိန်းလုပ်ငန်းများလုပ်ကိုင်ရန် ဝင်ရောက်လာသည့် ကုမ္ပဏီများက ဒေသခံပြည်သူများအား လူ့အခွင့်အရေးချိုးဖောက်မှုများကို သက်ဆိုင်ရာတာဝန်ရှိသူများသိရှိစေရန် အစီရင်ခံထုတ်ပြန်ရခြင်း ဖြစ်ကြောင်း သိရသည်။
“အုပ်ချုပ်ရေးယှက်နွှယ်နေတဲ့ Mix Control နေရာမှာဆိုရင် ဒေသခံတိုင်းရင်းသားတွေက သူတို့ ဘယ်အစိုးရဆီမှာ မှတ်ပုံတင်ရမယ်ဆိုတာ မသိဘူး။ မြေယာမှတ်ပုံတင်ဖို့အတွက် အစိုးရနှစ်ရပ်ရှိနေတဲ့ မြေယာဥပဒေတွေက အပြိုင်ရှိနေတယ်။ အဲဒီလို အပြိုင်ရှိနေတဲ့အတွက် ကျေးလက်ဒေသမှာရှိတဲ့ ဒေသခံတွေက သူတို့အတွက်ပိုပြီးတော့ အခက်အခဲရှိနေတာကို ကျွန်မတို့လေ့လာ တွေ့ရှိရတယ်။ နောက်တစ်ချက်က ငြိမ်းချမ်းရေး ရလာပြီးတဲ့ နောက်ပိုင်းမှာဆိုရင် ကုမ္ပဏီတွေ ပိုပြီးတော့ ဝင်လာတယ်။ အခြေခံအဆောက်အအုံတွေ ဖော်ဆောင်တဲ့စီမံကိန်းမှာတွေ၊ သတ္တုတူးဖော်တာတွေ၊ လမ်းဖောက်တာတွေ၊ စီးပွားဖြစ်စိုက်ပျိုးမွေးမြူရေးလုပ်ငန်းတွေ အများကြီး ဝင်လာတယ်။ အဲဒီအချိန်မှာဆိုရင် ကုမ္ပဏီတွေက ဒေသခံတွေရဲ့အခွင့်အရေးတွေကို လျစ်လျူရှုထားကြတယ်” ဟု ကရင်လူ့အခွင့်အရေးအဖွဲ့မှ Programme Director နော်ထူးထူးက ပြောကြားသည်။
မြန်မာနိုင်ငံအရှေ့တောင်ပိုင်းတွင် အဓိကလုပ်ကိုင်နေသည့် စီးပွားဖြစ်ဖွံ့ဖြိုးရေးလုပ်ငန်းများမှာ သတ္တုမိုင်းလုပ်ငန်း၊ ရေအားလျှပ်စစ်၊ လမ်းဖောက်လုပ်ခြင်းနှင့် စိုက်ပျိုးမွေးမြူရေး လုပ်ငန်းများဖြစ်ပြီး စီမံကိန်းများတွင် ပါဝင်ပတ်သက်လုပ်ဆောင်သူများအနေဖြင့် စီးပွားဖြစ် ဖွံ့ဖြိုးရေးလုပ်ငန်းကြီးများမှ အကျိုးအမြတ်ရရန်သာ ရည်ရွယ်သောကြောင့် ဒေသခံပြည်သူများ၏ အခွင့်အရေးများကို လျစ်လျူရှုထားကာ မြေယာနှင့်ပတ်သက်၍ အလွန်စိုးရိမ်ရသည့် အခြေအနေရှိကြောင်း အစီရင်ခံစာတွင် ပါရှိသည်။
“မယာ အသိမ်းခံရတဲ့အတွက် ဒေသခံ ပြည်သူတွေဆီမှာ မြေယာမရှိတော့အတွက် သူတို့ရဲ့ အသက်မွေးဝမ်းကျောင်းလုပ်ငန်းတွေကို ထိခိုက်တယ်။ နေရာအသစ်တွေကို အတင်း အဓမ္မရွှေ့ပြောင်းခံရတယ်။ အဲဒီလို အတင်းအဓမ္မရွှေ့ပြောင်းခံရတဲ့အချိန်မှာဆိုရင် ဒေသခံတွေအတွက် ကြိုတင်ပြင်ဆင်မှုတွေ မရှိဘူး” ဟု နော်ထူးထူးက ဆက်လက် ပြောကြားသည်။
မြန်မာနိုင်ငံအရှေ့တောင်ပိုင်းတွင် မြေယာ စီမံအုပ်ချုပ်မှုနှင့်ပတ်သက်၍ အစိုးရက စီမံအုပ်ချုပ်သည့်နည်းစနစ်နှင့်ကရင် အမျိုးသား အစည်းအရုံး (KNU) က စီမံ အုပ်ချုပ်သည့် နည်းစနစ်တို့ရှိပြီး မြေယာမှတ်ပုံတင်စနစ် နှစ်ခုစလုံးသည် ဒေသခံများအတွက် မြေယာပိုင်ဆိုင်မှု (KNU စနစ်အောက်) သို့မဟုတ် မြေယာလုပ်ပိုင်ခွင့် (မြန်မာအစိုးရ နှင့် KNU စနစ်နှစ်ခုလုံး၏အောက်) တွင် လိုအပ်သော တရားဝင် စာရွက်စာတမ်းများ ရနိုင်ရန် အခွင့်အလမ်းပေးထားကြောင်း၊ ထို့ ပြင် ၂၀၁၂ ခုနှစ်မှစ၍ မြေယာမှတ်ပုံတင်ခြင်း နှင့် မြေပုံရေးဆွဲခြင်းများသာမက မြေယာပို လုပ်ပိုင်ခွင့်လက်မှတ် ထုတ်ပေးခြင်းများ ကြိုတင်လုပ်ဆောင်ခဲ့ကြောင်း၊ ထို့နောက် မြန်မာနိုင်ငံ အရှေ့တောင်ပိုင်းတွင် စီးပွားရေးဆိုင်ရာ ဖွံ့ဖြိုးရေးများမြင့်တက်လာသောကြောင့် ရွာသားများသည် ၎င်းတို့မြေယာများကို ကုမ္ပဏီမှ သိမ်းယူမှုနှင့်ဆုံးရှုံးမှုများမှ ကာကွယ်ရန်အတွက် မြေယာလုပ်ပိုင်ခွင့် လက်မှတ်များရရှိရန် ပိုမိုကြိုးစားလာခဲ့ကြောင်း၊ လက်ရှိတွင် ရွာသားများမှ မြေယာလုပ်ပိုင်ခွင့် လက်မှတ်၏အရေးကြီးမှုများကို ပိုမိုသတိပြုမိလာသော်လည်း မြေယာလုပ်ပိုင်ခွင့်လက်မှတ်အား မည်သို့လျှောက်ထားရမည်၊ မည်သည့် လျှောက်ထားမှု လုပ်ငန်းစဉ်များနှင့် မည်မျှကြာမြင့်မည်စသည်တို့ကို နားလည်ရန် အခက်အခဲများရှိကြောင်း အစီရင်ခံ ဖော်ပြထားသည်။
