သြဂုတ် ၂၆ ရက်တွင် ရန်ကုန်မြို့ရှိ Pan Pacific Hotel ၌ ပြုလုပ်သော အခမ်းအနားပွဲမြင်ကွင်းအား တွေ့ရစဉ်
မြန်မာနိုင်ငံ၌ ဒေါ်လာ ရှားပါးနေချိန်တွင် စုပေါင်းပိုင် အဆောက်အအုံဆိုင်ရာ ဥပဒေ Condominium Law အရ ကွန်ဒိုတိုက်ခန်းများ ရောင်းချပါက ဒေါ်လာ အမြန်ဆုံးရှာပေးနိုင်ကြောင်း မြန်မာနိုင်ငံ ဆောက်လုပ်ရေး လုပ်ငန်းရှင်များအသင်းချုပ် ဥက္ကဋ္ဌ ဦးရှိန်ဝင်းက သြဂုတ် ၂၆ ရက်တွင် ရန်ကုန်မြို့ရှိ Pan Pacific Hotel ၌ ပြုလုပ်သော စုပေါင်းပိုင် အဆောက်အအုံဆိုင်ရာဥပဒေ Condominium Law နှင့် ပတ်သက်၍ လက်တွေ့ အကောင်အထည်ဖော်ဆောင်နိုင်ရေး ရှင်းလင်းပွဲတွင် ပြောကြားသည်။
ကွန်ဒိုမီနီယံ တိုက်ခန်းများ ရောင်းချရာတွင် တံဆိပ်ခေါင်းခွန်များ တရားဝင်ကပ်ခြင်း၊ တရားဝင်ရောင်းချ မှတ်ပုံတင်နိုင်သောကြောင့် နိုင်ငံတော်အတွက် တိကျသည့် အချက်အလက်များနှင့် အခွန်ငွေ အတိအကျ ရရှိနိုင်မည် ဖြစ်ကြောင်း ဦးရှိန်ဝင်းက ပြောကြားသည်။
“ဒီနေ့ဆိုရင် ဒေါ်လာဈေးတွေ တက်နေတဲ့ ဒေါ်လာ ရှားပါးနေတဲ့ ကျွန်တော်တို့ မြန်မာနိုင်ငံမှာ ကွန်ဒိုမီနီယံ တိုက်ခန်းသည် ကုစားနိုင်သော တစ်ခုတည်းသော အမြန်ဆုံးနဲ့ အများဆုံး လုပ်ဆောင်နိုင်သော ဒေါ်လာတွေကို ရှာပေးနိုင်တဲ့ တိုက်ခန်းတွေ ရောင်းချနိုင်ခြင်းနဲ့ ပတ်သက်လို့ ဒီဥပဒေက ထွက်ရှိခဲ့ခြင်း ဖြစ်ပါတယ်။ အချိန်နဲ့တစ်ပြေးညီ ထွက်ပေါ်လာတဲ့ Condominium Law ကို အသုံးပြုတဲ့ နေရာမှာ အသုံးဝင်ဖို့လည်း အရေးကြီးပါတယ်။ ကွန်ဒိုမီနီယံတိုက်ခန်း ရောင်းချဖို့ Condominium Law ရှိပါလျက် သို့သော်လည်း Condominium Law နဲ့ပတ်သက်ပြီးတော့ အကန့်အသက်တွေ၊ ဖြေလျှော့မှုတွေ၊ မက်လုံးပေးမှုတွေ မရှိဘဲနဲ့ ဒီတိုက်ခန်းတွေကို ဘယ်လိုမှ ရောင်းနိုင်မှာလည်း မဟုတ်ပါဘူး။ ကျွန်တော်တို့ ဈေးကွက်လည်း ဖြစ်လာနိုင်မှာ မဟုတ်ပါဘူး။ ဒါကြောင့် ကျွန်တော်တို့ အချိန်နဲ့တစ်ပြေးညီ လုပ်ဆောင်ဖို့ လုပ်ပါတယ်။ ကျွန်တော်တို့ Condominium တိုက်ခန်းတွေက တခြားတိုက်ခန်းတွေနဲ့ မတူပါဘူး။ Luxury ဖြစ်ပါတယ်။ နိုင်ငံခြားသားတွေ အားလုံးအတွက်ကို နေထိုင်နိုင်ဖို့အတွက် အကောင်းဆုံး အဆောက်အအုံတွေ၊ အကောင်းဆုံး Infrastructure တွေ ခေတ်အမီဆုံး ဆောက်လုပ်မှာ ဖြစ်တဲ့အတွက်ကြောင့် မက်လုံးပေး ဆွဲဆောင်မှုရှိမှသာလျှင် ကျွန်တော်တို့နိုင်ငံမှာ လူတွေက လာရောက် ရင်းနှီးမြုပ်နှံမှာ ဖြစ်ပါတယ်”ဟု မြန်မာနိုင်ငံ ဆောက်လုပ်ရေးဆိုင်ရာ လုပ်ငန်းရှင်များအသင်းချုပ် ဥက္ကဋ္ဌ ဦးရှိန်ဝင်းက ပြောကြားသည်။
ထို့ပြင် ဆောက်လုပ်ရေးနှင့် ပတ်သက်ပြီး Condominium Law သည် အထူးဥပဒေ ဖြစ်ကြောင်း၊ အဆိုပါ အထူး ဥပဒေအတွက် အထူးတံဆိပ်ခေါင်းခွန်များနှင့် အထူး ဝင်ငွေခွန်များကို လျှော့ပေါ့ ကောက်ခံစေခြင်းအားဖြင့် ကွန်ဒိုမီနီယံ တိုက်ခန်းရဲ့ ဈေးကွက်တွေကို ပြန်လည် ဖော်နိုင်မည် ဖြစ်ကြောင်း၊ ကွန်ဒိုမီနီယံ တိုက်ခန်းနှင့် ဈေးကွက်များ ဖော်ဆောင်ခြင်းအားဖြင့် မြန်မာနိုင်ငံတွင် ဒေါ်လာအများကြီး စီးဝင်လာနိုင်ကြောင်း၊ မြန်မာနိုင်ငံ ဆောက်လုပ်ရေးဆိုင်ရာ လုပ်ငန်းရှင်များအသင်းချုပ် ဥက္ကဋ္ဌ ဦးရှိန်ဝင်းက ပြောကြားသည်။
အဆိုပါ စုပေါင်းပိုင် အဆောက်အအုံဆိုင်ရာ ဥပဒေရှင်းလင်းပွဲသို့ ဆောက်လုပ်ငန်းရေးဝန်ကြီးဌာန ပြည်ထောင်စုဝန်ကြီး ဦဟန်ဇော်၊ ရန်ကုန်တိုင်းဒေသကြီး အစိုးရအဖွဲ့၊ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်၊ ပါမောက္ခ ဒေါက်တာ အောင်ထွန်းသက်၊ လွှတ်တော် ကိုယ်စားလှယ်များ၊ မြန်မာနိုင်ငံ ဆောက်လုပ်ရေးဆိုင်ရာ လုပ်ငန်းရှင်များအသင်းချုပ် ဥက္ကဋ္ဌ ဦးရှိန်ဝင်းနှင့် အသင်းဝင်များ၊ ဆောက်လုပ်ရေး လုပ်ငန်းရှင်များ၊ ဆောက်လုပ်ရေး လောကနှင့် ဆက်နွှယ် ပတ်သက်သူများ တက်ရောက်ခဲ့ကြသည်။
ဆောက်လုပ်ရေး လုပ်ငန်းရှင်များအနေဖြင့် နည်းဥပဒေပါ လုပ်ငန်းများ ဆောင်ရွက်ရာတွင် အခက်အခဲများ၊ အားနည်းချက် တွေ့ကြုံရပါက ဆောက်လုပ်ရေးဝန်ကြီးဌာနသို့ တင်ပြနိုင်ကြောင်း၊ ပိုမိုကောင်းမွန်ပြည့်စုံတဲ့ ဥပဒေ၊ နည်းဥပဒေများ ဖြစ်ပေါ်လာရေးအတွက် အကြုံပြုချက်များ ပေးပို့နိုင်ကြောင်း ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဟန်ဇော်က ပြောကြားသည်။
အလားတူ မြန်မာနိုင်ငံ ဆောက်လုပ်ရေးဆိုင်ရာ လုပ်ငန်းရှင်များ အသင်းချုပ် အထွေထွေ အတွင်းရေးမှူးချုပ် ဦးမျိုးမြင့်က စုပေါင်းပိုင် အဆောက်အအုံဥပဒေ Condominium Law နှင့် ပတ်သက်၍ ဥပဒေကို ဆက်လက် အကောင်အထည်ဖော်နိုင်ရန် စီမံခန့်ခွဲရေး ကော်မတီ အမြန်ဆုံး ပေါ်ထွက်စေလိုကြောင်း နှင့် ဥပဒေကို လက်တွေ့ အကောင်အထည်ဖော်နိုင်ရေးအတွက် ညှိနှိုင်းဆောင်ရွက်ရမည့် အကြောင်းအရာများကို ရှင်းလင်းပြောကြားသည်။
အဆိုပါ စုပေါင်းပိုင် အဆောက်အအုံဆိုင်ရာ ဥပဒေ Condominium Law ကို ၂၀၁၆ ခုနှစ် ဇန်နဝါရီ ၂၉ ရက်တွင် ပြည်ထောင်စုလွှတ်တော် ဥပဒေအမှတ် (၂၄) ဖြင့် ပြဋ္ဌာန်းခဲ့ပြီး ၂၀၁၇ ခုနှစ် ဒီဇင်ဘာ ၇ ရက်တွင် ဆောက်လုပ်ရေးဝန်ကြီးဌာန၏ အမိန့်ကြော်ငြာ ၂၆၇/၂၀၁၇ ဖြင့် ထုတ်ပြန်ခဲ့ကြောင်း သိရသည်။ ထို့နောက် နည်းဥပဒေ ပြင်ဆင်ချက်များကို ၂၀၁၈ ခုနှစ် သြဂုတ် ၂၄ ရက်တွင် ပြည်ထောင်စုလွှတ်တော်၌ အတည်ပြုခဲ့ကြောင်း သိရသည်။
