နိုင်ငံခြားချေးငွေ၊ ကူညီထောက်ပံ့ငွေ တို့ဖြင့် စီမံကိန်းလုပ်ငန်းများ အကောင်အထည်ဖော် ဆောင်ရွက်နေသည့် ဝန်ကြီးဌာနများ၏ စီမံကိန်းလုပ်ငန်းများ ထိရောက်အောင်မြင်နိုင်ရေး၊ နိုင်ငံတော်၏ဘဏ္ဍာငွေများကို အလေ အလွင့်မရှိစေရေးအတွက် စီမံကိန်းနှင့် ဘဏ္ဍာရေးဝန်ကြီးဌာနက စဉ်ဆက်မပြတ်ကြီးကြပ်သင့်ဟု ပြည်သူ့ငွေစာရင်း ပူးပေါင်းကော်မတီက အကြံပြုခဲ့သည်။
ပြည်ထောင်စုစာရင်းစစ်ချုပ်၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ငွေစာရင်း ပူးပေါင်းကော်မတီက လေ့လာတွေ့ရှိချက်နှင့် သဘောထားမှတ်ချက် အစီရင်ခံစာ တင်သွင်းစဉ် ထည့်သွင်းပြောကြားခဲ့ခြင်းဖြစ်သည်။
ပြည်သူ့ငွေစာရင်း ပူးပေါင်းကော်မတီ အဖွဲ့ဝင် ဒေါ်ထုမေက “နိုင်ငံခြားချေးငွေ၊ ကူညီထောက်ပံ့ငွေတို့နဲ့ စီမံကိန်းလုပ်ငန်း အကောင်အထည်ဖော်ဆောင်ရွက်နေတဲ့ ဝန်ကြီးဌာနတွေရဲ့ စီမံကိန်းလုပ်ငန်းတွေ ထိရောက် အောင်မြင်နိုင်ရေး၊ နိုင်ငံတော်ရဲ့ ဘဏ္ဍာငွေတွေကို အလေအလွင့်မရှိစေရေးတို့အတွက် စီမံကိန်းနဲ့ဘဏ္ဍာရေးဝန်ကြီးဌာနက စဉ်ဆက်မပြတ် ကြီးကြပ်သင့်တယ်“ ဟု အကြံပြု ပြောကြားခဲ့သည်။
ပြည်ထောင်စုစာရင်းစစ်ချုပ်၏ သုံးသပ်အကြံပြူချက်အနေဖြင့် နိုင်ငံခြားချေးငွေ၊ ကူညီထောက်ပံ့ငွေများဖြင့် စီမံကိန်းလုပ်ငန်းများ အကောင်အထည်ဖော်ရာတွင် သတ်မှတ်စီမံကိန်းကာလအတွင်း အချိန်မီပြီးစီးအောင် အကောင်အထည်ဖော်ဆောင်ရွက်နိုင်စေရေး သက်ဆိုင်ရာတာဝန်ရှိသူအဆင့်ဆင့်က ထိရောက်စွာ ကြီးကြပ်ဆောင်ရွက်ခြင်းဖြင့် နိုင်ငံခြားချေးငွေ၊ ကူညီထောက်ပံ့ငွေများအား ပိုမိုထိရောက်စွာနှင့် စွမ်းဆောင် ရည်ပြည့်ဝစွာ အသုံးချနိုင်စေပြီး အများပြည်သူအတွက်လည်း အကျိုးကျေးဇူးများ လျင်မြန်စွာ ရရှိခံစားနိုင်စေမည်ဖြစ်ကြောင်း၊ ထို့အပြင် နိုင်ငံခြားချေးငွေ၊ ကူညီထောက်ပံ့ငွေများအား အမှန်တကယ် လိုအပ်ချက်နှင့် လုပ်ငန်းဆောင် ရွက်နိုင်မှုအပေါ် အခြေခံ၍ ဘဏ္ဍာရန်ပုံငွေအား လျာထားတောင်းခံခြင်းဖြင့် ပိုမိုစနစ်ကျသည့် ငွေသားစီမံခန့်ခွဲမှုတစ်ရပ်ကို ဖြစ်ပေါ် စေပြီး နိုင်ငံဘဏ္ဍာရန်ပုံငွေများကို အလေ အလွင့်မရှိစေဘဲ ထိရောက်အကျိုးရှိစွာ အသုံးပြုနိုင်စေပြီး ပြည်သူ့ဘဏ္ဍာစီမံခန့်ခွဲမှု ပိုမို အထောက်အကူပြုနိုင်မည်ဟုပါရှိသည်။
ဌာန၊ အဖွဲ့အစည်းများ၏ စီမံကိန်းလုပ်ငန်းများ အကောင်အထည်ဖော်ဆောင်ရွက်မှုကို စစ်ဆေးရာတွင် အချို့စီမံကိန်းများတွင် စီမံကိန်းအစောပိုင်းကာလများ၌ လုပ်ငန်းများ ဆောင်ရွက်နိုင်မှုမရှိခြင်း၊ သတ်မှတ်စီမံကိန်း ကာလအတွင်း လုပ်ငန်းများပြီးစီးအောင် မဆောင်ရွက်နိုင်ခြင်းများကို တွေ့ရှိရကြောင်း၊ ယင်းသို့ဖြစ်ခဲ့သည့်စီမံကိန်းအချို့မှာ ဆောက် လုပ်ရေးဝန်ကြီးဌာန အာရှဖွံ့ဖြိုးရေးဘဏ်၏ ထောက်ပံ့ငွေဖြင့် ဆောင်ရွက်သည့် နွမ်းပါး လူထု လူမှုအဆောက်အအုံနှင့် အခြေခံ ဝန်ဆောင်မှုလုပ်ငန်းများ ဖွံ့ဖြိုးရေးစီမံကိန်း၊ ကျန်းမာရေးနှင့် အားကစားဝန်ကြီးဌာန ခုခံကျကာလသားရောဂါ တိုက်ဖျက်ရေးစီမံချက်မှ ဂျပန်အစိုးရ၏ ဆင်းရဲမှုလျှော့ချရေး ရန်ပုံငွေ၏ အထောက်အပံ့နှင့် အာရှဖွံ့ဖြိုးရေးဘဏ်၏ စီမံခန့်ခွဲမှုဖြင့် ဆောင်ရွက်သည့် မဟာ မဲခေါင်ဒေသ HIV/AIDS ရောဂါကာကွယ်ရေး စွမ်းရည်မြှင့်တင်ရေး စီမံကိန်းများဖြစ်ကြောင်း အစီရင်ခံစာတွင် ပါရှိသည်။
ထို့အပြင် ဌာန၊ အဖွဲ့အစည်းများအနေဖြင့် စီမံကိန်းများအကောင်အထည်ဖော်ရန် ရရှိသည့် ချေးငွေ၊ ထောက်ပံ့ငွေများကို မလိုအပ်ဘဲ လက်ဝယ်ကြာမြင့်စွာ ကိုင်ဆောင်ထားခြင်းမပြုရန်၊ သုံးစွဲရန် လိုအပ်သလောက်ကို အနီးစပ်ဆုံးခန့်မှန်းတောင်းခံသွားရန်၊ လုပ်ငန်း လျာထားချက်အတိုင်း အပြည့်အဝအကောင်အထည်ဖော်နိုင်မှုမရှိလျှင် မလိုအပ်ဘဲ ငွေများ ပိုမိုတောင်းခံထားပါက ဌာနအဖွဲ့အစည်းများအနေဖြင့် Service Fee များ ပိုမိုပေးချေရခြင်းဖြင့် နိုင်ငံတော်အတွက် ကုန်ကျစရိတ်များ ပိုမိုလာနိုင်ဖွယ်ရှိကြောင်း ပြည်သူ့ငွေစာရင်း ပူးပေါင်းကော်မတီအစီရင်ခံစာတွင် ဖော်ပြထားသည်။
