မြစ်ကြီးနား စက်မှုဇုန်ကိစ္စ ပွင့်လင်းမြင်သာမှုရှိရန်နှင့် မြစ်ဆုံစီမံကိန်းကဲ့သို့ တရားမျှတမှုမရှိသော စာချုပ်များ ဖြေရှင်းဆဲ ကာလဖြစ်၍ ကချင်ပြည်သူတို့အပေါ် မျှတစွာ ဆောင်ရွက်နိုင်စွမ်း၊ လိုအပ်ချက်များ ရှိလာမည်ကို စိုးရိမ်ကြောင်း ကချင်အမျိုးသား ကွန်ဂရက်ပါတီ တောင်းဆို

မြစ်ကြီးနား စက်မှုဇုန်ကိစ္စ ပွင့်လင်းမြင်သာမှုရှိရန်နှင့် မြစ်ဆုံစီမံကိန်းကဲ့သို့ တရားမျှတမှုမရှိသော စာချုပ်များ ဖြေရှင်းဆဲ ကာလဖြစ်၍ ကချင်ပြည်သူတို့အပေါ် မျှတစွာ ဆောင်ရွက်နိုင်စွမ်း၊ လိုအပ်ချက်များ ရှိလာမည်ကို စိုးရိမ်ကြောင်း ကချင်အမျိုးသား ကွန်ဂရက်ပါတီ တောင်းဆို
Published 24 August 2018

မြစ်ကြီးနား စက်မှုဇုန်ကိစ္စ ပွင့်လင်းမြင်သာမှုရှိရန်နှင့် ကချင်အမျိုးသား ကွန်ဂရက်ပါတီက သြဂုတ် ၂၃ ရက်တွင် သတင်းထုတ်ပြန် တောင်းဆိုခဲ့ကြောင်း သတင်းရရှိသည်။

ထုတ်ပြန်ချက်တွင် မြစ်ကြီးနားမြို့ နန်ကျင်ကျေးရွာအနီးတွင် နိုင်ငံခြားရင်းနှီးမြှုပ်နှံမှုဖြင့် ပြည်နယ်အစိုးရအဖွဲ့ စီးပွားရေးဇုန် တည်ဆောက်ရန် ကြိုးပမ်းနေကြောင်း၊ နားလည်မှု စာချွန်လွှာကိုလည်း လက်မှတ်ရေးထိုးပြီး ဖြစ်ကြောင်း၊ လုပ်ငန်း အကောင်အထည် ဖော်ရာတွင် EIT ကို ယူနန်-ထိန်ချုံး ဟုန်ရင် ကုမ္ပဏီက လုပ်ဆောင်မည်ဖြစ်ပြီး ဖြစ်မြောက်နိုင်စွမ်း အစီရင်ခံစာကို တစ်လအတွင်း ရေးသွင်းခြင်း၊ မြေနေရာ ရွေးချယ်ခြင်း၊ မြေယာလျော်ကြေး ကိစ္စများ ရှင်းလင်းခြင်းကို ကချင်ပြည်နယ် အစိုးရအဖွဲ့၏ အများပိုင် ကုမ္ပဏီက ဆောင်ရွက်ရမည် ဖြစ်ကြောင်း၊ MoA အတွက် အဆင့်ဆင့် ဆွေးနွေးနေဆဲ ဖြစ်ကြောင်း၊ ကချင်ပြည်နယ်သည် ငြိမ်းချမ်းရေး ဆွေးနွေးဆဲကာလ၊ စစ်ဒဏ်ခံနေရဆဲကာလ၊ မြစ်ဆုံစီမံကိန်းကဲ့သို့ ကချင်ပြည်သူတို့ တရားမျှတမှု မရှိသော စာချုပ်များ ဖြေရှင်းဆဲကာလ ဖြစ်သဖြင့် စာချုပ်ပါ သဘောတူညီချက်များက ကချင်ပြည်သူအပေါ် မျှတစွာ ဆောင်ရွက်နိုင်စွမ်း၊ လိုအပ်ချက်များ ရှိလာမည်ကို စိုးရိမ်ပါကြောင်း၊ မြန်မာနိုင်ငံ၏ ရေရှည်အကျိုးစီးပွားများ အကောင်အထည်ဖော်မှု အပိုင်းတွင် လိုအပ်ချက်များ ဖြစ်လာမည်ကို စိုးရိမ်ပါကြောင်း၊ တရုတ်ကုမ္ပဏီဘက်က မူလတောင်းဆိုချက်များတွင် မမျှတသော တောင်းဆိုမှုများ ရှိခဲ့ကြောင်း၊ MoU၊ MoA ရေးထိုးရာတွင် ကချင်ပြည်သူများ၏ ကိုယ်စားပြုဆွေးနွေးချက်များ လုပ်ဆောင်မှသာ ပိုမိုကောင်းမွန်သော နိုင်ငံခြားရင်းနှီးမြှုပ်နှံမှု စီမံကိန်း ဖြစ်ပေါ်လာမည်ဟု ယုံကြည်ပါကြောင်း၊ နိုင်ငံရေးပဋိက္ခများ ဖြေရှင်းဆဲကာလတွင် စီးပွားရေးဘက် တစ်ခုတည်း မကြည့်ဘဲ နိုင်ငံရေးအရ ဖြေရှင်းဆောင်ရွက်နိုင်သော စီမံကိန်းဖြစ်ရေးမှာ MoA အတွက် ဆွေးနွေးချက် အဆင့်တိုင်းတွင် ကချင်နိုင်ငံရေး အစုအဖွဲ့များ ထည့်သွင်းဆွေးနွေးချက်များကို တောင်းဆိုပါကြောင်း ပါရှိသည်။

ယင်းထုတ်ပြန်ချက်နှင့် ပတ်သက်၍ ကချင်အမျိုးသား ကွန်ဂရက်ပါတီမှ ပြောဆိုခွင့်ရှိသူ ဦးလဖိုင်အောင်လက “မြေယာပြဿနာနဲ့ ပတ်သက်ပြီး စိုးရိမ်စရာရှိတယ်။ ဖြစ်ပေါ်လာမယ့် ကိစ္စတွေကို ပွင့်ပွင့်လင်းလင်းမရှိဘူး။ သူတို့ချည်းပဲ ဆွေးနွေးတိုင်ပင်တယ်။ လုပ်ဆောင်ချက်တွေ၊ တရုတ်ကုမ္ပဏီတွေကိုရော နစ်နာမှုမရှိအောင် လူထုကိုချပြသင့်တယ်။ အခုအချိန်က ငြိမ်းချမ်းရေး ဆွေးနွေးနေချိန် ဖြစ်နေတယ်။ စစ်ဒဏ်ခံရချိန်၊ မြစ်ဆုံလို ဒဏ်ခံရချိန်တွေမှာ စိတ်ဒဏ်ရာ ဖိအားရှိနေချိန်ဆိုတော့ စီမံကိန်းကို နားစေချင်တယ်။ တကယ်လို့ ဆက်လုပ်မယ် ဆိုရင်လည်း လူထုကို ရှင်းရှင်းလင်းလင်း ပြတ်ပြတ်သားသားပြောဖို့ လိုပါတယ်။ အဲဒါတွေကြောင့် ထုတ်ပြန်ချက် ထုတ်တာပါ” ဟု ပြောကြားသည်။

ကချင်ပြည်နယ် အစိုးရအဖွဲ့၏ ပြောဆိုခွင့်ရှိသူ ဥပဒေချုပ် ဦးဒီဆင်ရမ်က “ဒီကိစ္စကို ပြည်နယ်ဝန်ကြီးချုပ် ကိုယ်တိုင် လာမယ့် ၂၅ ရက်မှာ ရှင်းလင်းမယ်။ MoA ထိုးနိုင်ဖို့က အဆင့်အများကြီး ကျန်သေးတယ်။ အခုက နေရာအနေထားနဲ့ မြေယာကိစ္စပါတော့ ပြည်ထောင်စုကို တင်ပြထားဆဲပါ။ ပြည်ထောင်စုက မချပေးသေးဘူး။ တရုတ်နိုင်ငံဘက်ကတော့ သူတို့ဘက်က လုပ်မယ့်ဟာကို အရင်ကတည်းက ချပြသွားပြီ။ အသေးစိတ်တွေ  ဖြေရှင်းပြီးမှပဲ အားလုံးကို ချပြလို့ရမှာ။ ခုကဘာမှလုပ်လို့ မရနိုင်သေးဘူး” ဟုဆိုသည်။

မြစ်ကြီးနား စီးပွားဖွံ့ဖြိုးရေးဇုန် တည်ဆောက်ရေးအတွက် ကချင်ပြည်နယ် အစိုးရအဖွဲ့နှင့် တရုတ်ပြည်သူ့ သမ္မတနိုင်ငံ ပေါင်စန်းပြည်နယ်ခွဲမှ ဒုတိယအုပ်ချုပ်ရေးမှူးအဖွဲ့တို့ မေ ၈ ရက် နံနက်ပိုင်းက နားလည်မှုစာချွန်လွှာ MoU ကို ကချင်ပြည်နယ် အစိုးရအဖွဲ့ရုံးတွင် လက်မှတ်ရေးထိုးခဲ့ကြောင်း သိရသည်။

မြစ်ကြီးနား စီးပွားဖွံ့ဖြိုးရေးဇုန် စီမံကိန်းသည် မြစ်ကြီးနားမြို့နယ်၊ နန်ကျင်ကျေးရွာအုပ်စု၊ ပလနကျေးရွာအုပ်စုတွင် တည်ရှိပြီး  ၄၇၅၁ ဧကကျော်ရှိကြောင်း သိရသည်။

စီမံကိန်းကို တရုတ်နိုင်ငံဘက်မှ ဟိန်ယုံရင်းနှီးမြှုပ်နှံမှု ကုမ္ပဏီလီမိတက်နှင့် ကချင်ပြည်နယ် စီးပွားဖွံ့ဖြိုး တိုးတက်ရေး ပြည်သူ့ကုမ္ပဏီလီမိတက်တို့ ပူးပေါင်း၍ စုပေါင်းရင်းနှီးမြုပ်နံှရေးကုမ္ပဏီ (Joint Venture Company) ဖြင့် အကောင်အထည်ဖော် ဆောင်ရွက်ရန် ရည်ရွယ်ကြောင်း သိရသည်။

ကုမ္ပဏီရင်းနှီးမြုပ်နှံမှု ရှယ်ယာကို မြန်မာနိုင်ငံဘက်မှ အနည်းဆုံး ၅၁ ရာခိုင်နှုန်း ယူထားပြီး ၁၀ နှစ်ကြာ တည်ဆောက်ရန် လျာထားကြောင်း သိရသည်။

ကျပ် ၃၇၂ ဘီလျံ (ဒေါ်လာ ၂၇၃ သန်း) တန်ဖိုးရှိ မြစ်ကြီးနား စီးပွားဖွံ့ဖြိုးရေးဇုန် စီမံကိန်းအတွက် ပြည်ထောင်စု စီမံကိန်းနှင့် ဘဏ္ဍာရေးဝန်ကြီးက ကချင်ပြည်နယ် အစိုးရအဖွဲ့နှင့် စီးပွားရေး လုပ်ငန်းရှင်များနှင့် ၂၀၁၈ ခုနှစ် ဇန်နဝါရီ ၂၃ ရက်က တွေ့ဆုံဆွေးနွေးခဲ့သည်။ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက အကြံပြုရာတွင် တစ်ဖက်နိုင်ငံကုမ္ပဏီ၏ နောက်ခံ၊ ငွေကြေးခိုင်မာမှု၊ နိုင်ငံအပေါ်တွင် တာဝန်ကျေပွန်စေသည့် အချက်အလက်များကို သံရုံးများမှတစ်ဆင့် တောင်းယူမှတ်တမ်းတင်ရန်၊ သီလဝါစက်မှုဇုန်အပြင် မင်္ဂလာဒုံ စက်မှုဇုန်ကို လေ့လာရန်၊ ပတ်ဝန်းကျင်မှ ချဉ်းကပ်ဖော်ဆောင်နိုင်မည့် လုပ်ငန်းငယ်များကိုပါ ထည့်သွင်းစဉ်းစားရန်၊ ထိုင်းနှင့် ဗီယက်နမ်တို့ရှိ စက်မှုဇုန်များမှာ အတုယူစရာများ ရှိနေပြီး လုပ်ငန်းသဘောအရ အရှုံးအမြတ် ရှိနိုင်သဖြင့် ရှယ်ယာအများဆုံး ယူထားသူက တာဝန်အရ အရှုံးအမြတ်ကို ထည့်သွင်းတွက်ချက်ရန်၊ သီလဝါစက်မှုဇုန် အောင်မြင်ခြင်းမှာ နိုင်ငံရေးအရလည်း ပါဝင်နေကြောင်း စသည့် အကြံပြုချက်များ ပြောကြားခဲ့သည်။

ကချင်ပြည်နယ်သည် တရုတ်နိုင်ငံနှင့် အိန္ဒိယနိုင်ငံတို့နှင့် ဆက်သွယ်ထားသည့် လီဒိုလမ်းမကြီးက ပြည်နယ်အလယ်ပိုင်းမှ ဖြတ်သန်းထားသည်။ လက်ရှိတွင် တရုတ်နိုင်ငံနှင့် ကချင်ပြည်နယ်တို့ တရားဝင် အဓိက ဆက်သွယ်သည့် ဝင်ပေါက်မှာ ကန်ပိုင်တည် ဝင်ပေါက်နှင့် လွယ်ဂျွယ်ဝင်ပေါက်၊ ပန်ဝါဝင်ပေါက်တို့ကို အဓိက အသုံးပြုနေသည်။ ထို့ပြင် လိုင်ဇာ၊ မန်ဝိန်းကြီး ဝင်ပေါက်များကိုလည်း အသုံးပြုနေကြသည်။

Most Read

Most Recent