ကဒုံကနိ လိပ်မျိုးထိန်းသိမ်းရေးစခန်းတွင် ပင်လယ်လိပ်တစ်ကောင်ကို တွေ့ရစဉ်
ဧရာဝတီတိုင်းဒေသကြီးအတွင်းရှိ ပင်လယ်လိပ်မျိုး ထိန်းသိမ်းရေးစခန်းများ ဖြစ်သည့် သမီးလှလိပ်ကျွန်းနှင့် ကဒုံကနိ လိပ်မျိုး ထိန်းသိမ်းရေးစခန်းများတွင် ၂၀၁၇-၂၀၁၈ လိပ်သားပေါက်ချိန်တွင် လိပ်သားပေါက် ၅၄၁၀ ကောင်အား ထိန်းသိမ်းစောင့်ရှောက်နိုင်ခဲ့ပြီး ပင်လယ်ပြင်အတွင်း သဘာဝအတိုင်း ကြီးပြင်းစေရန် ပြန်လည်လွှတ်ပေးနိုင်ခဲ့ကြောင်း သတင်းရရှိသည်။
ပုသိမ်ခရိုင် ဟိုင်းကြီးကျွန်းသမီးလှ လိပ်ကျွန်းတွင် ၁၉၈၆ ခုနှစ်မှစတင်၍ ပင်လယ်လိပ်မျိုး ထိန်းသိမ်းရေးသုတေသန နှင့် ပညာပေးရေးလုပ်ငန်းများကို စတင် ဆောင်ရွက်ခဲ့ပြီး သမီးလှလိပ်ကျွန်းတွင် ၂၀၁၇-၂၀၁၈ လိပ်ဥဥချတတ်သည့် အချိန်တွင် ဥချကျင်းရေ ၇၂ကျင်း၊ ဥလုံးရေ ၅၈၆၅ ဥအား ထိန်းသိမ်းနိုင်ခဲ့ပြီး လိပ်သားပေါက်ကောင်ရေ ၄၀၈၁ အား ထိခိုက်မှုများမရှိစေရန် အောင်မြင်စွာ ထိန်းသိမ်းစောင့်ရှောက် နိုင်ခဲ့ပြီး ပင်လယ်အတွင်းသို့ ပြန်လည်လွှတ်ပေးနိုင်ခဲ့ကြောင်း၊ ဖျာပုံခရိုင် ဘိုကလေးမြို့ နယ်နှင့် အမာမြို့နယ်များရှိ လိပ်ကျွန်းလိပ်သောင်များကို ကဒုံကနိလိပ်မျိုးထိန်းသိမ်းရေး စခန်းအဖြစ် ၁၉၉၇ ခုနှစ်မှ စတင်၍ ဖွဲ့စည်းခဲ့ပြီး ပင်လယ်လိပ်မျိုးထိန်းသိမ်းရေး သုတေသနနှင့် ပညာပေးရေးလုပ်ငန်းများ ဆောင်ရွက်ခဲ့ကြောင်း၊ ၂၀၁၇-၂၀၁၈ ခုနှစ် တွင် သဘာဝပတ်ဝန်းကျင်ပြောင်းလဲမှုအရ ကတုံးကလေးကျွန်း၊ ဂယက်ကြီးကျွန်း၊ ငမန်း သောင်ဒေသများတွင် လိပ်များပိုမိုဥချမှုများ ပြားမှုကြောင့် ယင်းဒေသများကိုအဓိကထား လေ့လာစောင့်ကြည့်ခဲ့ကြကြောင်း၊ ကဒုံကနိ လိပ်မျိုးထိန်းသိမ်းရေးစခန်းတွင် ၂၀၁၇-၂၀၁၈ လိပ်ဥဥချတတ်သည့်အချိန်တွင် ဥချ ကျင်းရေ ၁၆ ကျင်း၊ ဥလုံးရေ ၁၅၉၇ ဥအား ထိန်းသိမ်းနိုင်ခဲ့ပြီး လိပ်သားပေါက်ကောင်ရေ ၁၃၂၉ အား ထိခိုက်မှုများမရှိစေရန်
အောင်မြင်စွာ ထိန်းသိမ်းစောင့်ရှောက်နိုင်ခဲ့ပြီး ပင်လယ်အတွင်းသို့ ပြန်လည်လွှတ်ပေးနိုင်ခဲ့ကြောင်း ဧရာဝတီတိုင်းဒေသကြီး ငါးလုပ်ငန်းဦးစီးဌာန၏ ထုတ်ပြန်ချက်များအရ သိရသည်။
“ကျွန်တော်တို့ ဧရာဝတီတိုင်းထဲမှာ လိပ် ထိန်းသိမ်းစောင့်ရှောက်ရေးစခန်းက နှစ်ခုရှိပေါ့။ စခန်းတွေမှာ ပင်လယ်လိပ်မျိုး ထိန်းသိမ်းရေးသုတေသနနှင့် ပညာပေးရေး လုပ်ငန်းများကိုဆောင်ရွက်နေပါတယ်။ ပင်လယ်လိပ်များ ဘေးအန္တရာယ်ကင်းစေရန် စားကျက်များကို လက်ရှိအခြေအနေကို ထိန်းသိမ်းနိုင်ပြီး ပိုမိုကောင်းမွန်သောအခြေအနေကို ရောက်ရှိလာစေရန်၊ ပင်လယ်လိပ်များ မျိုးပွားသည့် လိပ်သောင် လိပ်ကျွန်းကမ်းခြေများနှင့် ပတ်ဝန်းကျင်ရေပြင်ကို အကာအကွယ်ပေးနိုင်ရန်၊ ပင်လယ်လိပ်များကို သတ်ဖြတ်ခြင်း၊ ဥများကို တူးဖော်ရောင်းချ စားသုံးခြင်းများကို တားမြစ်နိုင်ရန်၊ ပင်လယ်ပြင် ဂေဟစနစ် ကောင်းမွန်စေရေး အထောက်အကူပြုစေရန် ရည်ရွယ်ပြီးတော့လုပ်ဆောင်နေပါတယ်” ဟု ဧရာဝတီတိုင်းဒေသကြီး ငါးလုပ်ငန်းဦးစီးဌာန ဒုတိယဦးစီးမှူး ဦးစုံမိုင်းက ပြောကြားသည်။
မြန်မာ့ ပင်လယ်ပြင်အတွင်း ပင်လယ်လိပ်များ ဖမ်းဆီးခြင်း၊ ဥများကို တရားမဝင် ရောင်းချခြင်းများကို ဥပဒေအရတင်းကျပ်စွာ တားမြစ်ထားသော်လည်း တရားမဝင် ဖမ်းဆီးရောင်းချမှုများ ဆက်လက်ဖြစ်ပေါ်နေကာ ပင်လယ်လိပ်မျိုး မျိုးသုန်းပျောက်ကွယ်လာမည်ကို စိုးရိမ်နေရကြောင်း၊ ပင်လယ်လိပ် ထိန်းသိမ်းစောင့်ရှောက်ရေး စခန်းများတွင်လည်း ထိန်းသိမ်းစောင့်ရှောက်မည့် ဝန်ထမ်းအင်အားများစွာ လိုအပ်နေကြောင်း သိရသည်။
