၂၈ ဘီလျံကျော် အလဟဿ ဖြစ်ခဲ့ရသည့် လှိုင်သာယာ-ဟင်္သာတ ရထားလမ်းသည် အာဏာပိုင်များ၏ လမ်းညွှန်မှုကြောင့် အကောင်အထည်ဖော်ခဲ့ရခြင်းဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန ဒုတိယဝန်ကြီး ဦကျော်မျိုးက ပြောကြားသည်။
နေပြည်တော်၌ သြဂုတ် ၂၁ ရက်က ပြုလုပ်သော ဒုတိယအကြိမ် ပြည်သူ့လွှတ်တော် နဝမပုံမှန်အစည်းအဝေး ၁၁ ရက်မြောက်နေ့တွင် လေးမျက်နှာမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဇော်မင်းသိန်း၏ လှိုင်သာယာ - ဟင်္သာတ ရထားလမ်းပိုင်းသည် စီမံကိန်း ပြီးစီးသွားသော်လည်း ရထားပြေးဆွဲခြင်းမပြုတော့သည့်အတွက် နိုင်ငံတော်နှင့် နိုင်ငံသားများ အကျိုးစီးပွားဖြစ်ထွန်းစေရန် ကောင်းမွန်၍ စနစ်ကျသော စီမံခန့် ခွဲမှုများဖြင့် မည်သည့်အချိန်တွင် မည်ကဲ့သို့ ပြန်လည်ဆောင်ရွက်ပေးမည်ကို သိရှိလိုခြင်း နှင့် စပ်လျဉ်းသည့် မေးခွန်းအပေါ် ဒုတိယဝန်ကြီးက ဖြေကြားရာတွင် အထက်ပါအတိုင်း ပြောကြားခဲ့ခြင်း ဖြစ်သည်။
“လှိုင်သာယာ-ဟင်္သာတ ရထားလမ်း စီမံကိန်းကို အထက်အာဏာပိုင်တွေရဲ့ လမ်းညွှန်မှုကြောင့်သာ အကောင်အထည်ဖော်ခဲ့ရခြင်းဖြစ်ပြီး ဖြစ်မြောက်နိုင်စွမ်း လေ့လာမှု မပြုလုပ်နိုင်ခဲ့ခြင်း၊ ရေဝပ်ဧရီယာတွေကို ဖြတ်သန်းဖောက်လုပ်ထားသဖြင့် ရထားရဲ့ ပျမ်းမျှအမြန်နှုန်းဟာ တစ်နာရီ ၁၅ မိုင်နှုန်းခန့်သာ ပြေးဆွဲနိုင်ပြီး ကားလမ်းခရီးနဲ့ ယှဉ်ပြိုင်နိုင်မှု မရှိခြင်း၊ ရထားပြေးဆွဲမှု ကုန်ကျစရိတ်မှာ စက်သုံးဆီဖိုးကိုပင် မကာမိနိုင်ခြင်း စတဲ့အကြောင်းတွေကြောင့် လှိုင်သာယာ-ဟင်္သာတလမ်းပိုင်းမှာ ရထားပြေးဆွဲမှုကို ၂၀၁၆ ခုနှစ် ဇွန် ၁၀ ရက်က စတင်ပြီး ရပ်ဆိုင်းခဲ့ရပါတယ်” ဟု ဒုတိယဝန်ကြီး ဦးကျော်မျိုးက ပြောကြား သည်။
လှိုင်သာယာ-ဟင်္သာတ ရထားလမ်းပိုင်းသည် ၈၉ ဒသမ ၇၆ မိုင် အကွာအဝေးရှိပြီး နိုင်ငံတော်အေးချမ်းသာယာရေးနှင့် ဖွံ့ ဖြိုးရေးကောင်စီ အစိုးရလက်ထက် ၂၀၁၀ ခုနှစ် မတ် ၅ ရက်နေ့တွင် ကျင်းပပြုလုပ်သော အထူးစီမံကိန်းများ အကောင်အထည်ဖော်ရေး အစည်းအဝေးအမှတ်စဉ် ၁/၂၀၁၀ ဆုံးဖြတ်ချက်အရ ယခင်ရထားပို့ဆောင်ရေး ဝန်ကြီးဌာန၊ မြန်မာ့မီးရထားက ၂၀၀၉-၂၀၁၀ ဘဏ္ဍာရေးနှစ်တွင် စတင်ဖောက်လုပ်ခဲ့ခြင်းဖြစ်ကာ ဟင်္သာတ-ဇလွန်လမ်းပိုင်း ၁၆ ဒသမ ၂၅ မိုင်ကို ၂၀၁၀ ပြည့်နှစ် ဇူလိုင် ၂၀ ရက်တွင် လည်းကောင်း၊ ဇလွန် - ညောင်တုန်း လမ်းပိုင်း ၄၆ မိုင်ကို ၂၀၁၃ ခုနှစ် မေ ၂၃ ရက်တွင် လည်းကောင်း၊ ညောင်တုန်း- လှိုင်သာယာလမ်းပိုင်း ၂၇ ဒသမ ၇၅ မိုင်ကို ၂၀၁၄ ခုနှစ် မေ၂၄ ရက်တွင်လည်းကောင်း အသီးသီး ဖွင့်လှစ်ခဲ့ပြီး စုစုပေါင်း မိုင် ၉၀ အတွက် ကုန်ကျစရိတ် ငွေကျပ် ၂၈ ဒသမ ၇ ဘီလျံဖြစ်ကြောင်း ဒုတိယဝန်ကြီးက ပြောကြားသည်။
လှိုင်သာယာ-ဟင်္သာတ ရထားလမ်းပိုင်းခရီးစဉ်ပြေးဆွဲမှုကို ၂၀၁၄ခုနှစ် မေလ ၂၄ ရက်နေ့မှ စတင်ကာ အစုန်အဆန်ရထားနှစ် လိုင်းပြေးဆွဲပေးခဲ့ပြီး ၂၀၁၄-၂၀၁၅ဘဏ္ဍာရေးနှစ်တွင် အဆန်ရထားတစ်ရက်ပျမ်းမျှ ခရီးသည် ခုနစ်ဦးနှင့် ဝင်ငွေ ၃၆၄၂ကျပ်၊ အစုန်ရထား တစ်ရက်ပျမ်းမျှခရီးသည် ၅ဦးနှင့် ဝင်ငွေ ၂၈၀၄ ကျပ်သာ ရရှိခဲ့ကြောင်း၊ ၂၀၁၅-၂၀၁၆ဘဏ္ဍာရေးနှစ်တွင်လည်း အဆန်ရထား တစ်ရက်ပျှမ်းမျှ ခရီးသည် ခြောက်ဦးနှင့် ဝင်ငွေ ၂၉၁၅ကျပ်၊ အစုန်ရထားတစ်ရက်ပျှမ်းမျှခရီးသည် လေးဦးနှင့် ဝင်ငွေ ၂၅၅၈ ကျပ်သာရရှိခဲ့ကြောင်း၊ ၂၀၁၆-၂၀၁၇ ဘဏ္ဍာရေးနှစ်တွင် ရထားပြေးဆွဲမှု ရပ်ဆိုင်းခြင်း မပြုမီကာလအထိ အဆန်ရထား တစ်ရက်လျှင် ပျှမ်းမျှခရီးသည် ၁၁ဦးနှင့် ဝင် ငွေ ၈၆၁၃ကျပ်၊ အစုန်ရထား တစ်ရက်ပျမ်းမျှ ခရီးသည် ၁၃ဦးနှင့် ဝင်ငွေ ၉၃၃၈ ကျပ်သာ ရရှိခဲ့ကြောင်း သိရသည်။
