သြဂုတ် ၂၁ ရက်က စင်ကာပူနိုင်ငံတွင်ကျင်းပသည့် 43rd SINGAPORE LECTURE ပွဲတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား တွေ့ရစဉ် (Photo – AFP)
မြန်မာနိုင်ငံတွင် စီးပွားရေးလုပ်ငန်းများ ဆက်လက်ပြီး အဆင်ပြေနိုင်ရန် ၂၀၂၀ ရွေး ကောက်ပွဲတွင် မိမိတို့ကို အားပေးသင့်သည်ဟု စင်ကာပူနိုင်ငံသို့ ချစ်ကြည်ရေးခရီး ရောက်ရှိနေသည့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
စင်ကာပူနိုင်ငံ SEAS(Insitute of South East Asia Studies) တွင် သြဂုတ် ၂၁ ရက်က ပြုလုပ်သော Democratic း Challenges and Way Forward ဟောပြောပွဲ၌ ရှေ့နေဖြစ်သည့်အပြင် နိုင်ငံခြား စီးပွားရေးလုပ်ငန်းရှင် တစ်ဦးဖြစ်သူက ပြုပြင်ပြောင်းလဲထားသည့် ကုမ္ပဏီများနှင့်သက်ဆိုင်သော ဥပဒေများကြောင့် လုပ်ကိုင်ရမှုတွင် အခက်အခဲဖြစ်နေကြောင်းနှင့် လာမည့် ၂၀၂၀ ရွေးကောက်ပွဲတွင် မည်ကဲ့သို့ ဖြစ်လာမည်နည်းဟု မေးမြန်းမှုအပေါ် ဒေါ်အောင်ဆန်းစုကြည်က ပြန်လည်ဖြေကြားရာ၌ အထက်ပါအတိုင်း ထည့်သွင်းပြောကြားခဲ့ခြင်း ဖြစ်သည်။
“ကျွန်မကတော့ ၂၀၂၀ ရွေးကောက်ပွဲမှာ ဘယ်လိုဖြစ်လာမယ်လို့တော့ ဟောကိန်း မထုတ်နိုင်ပါဘူး။ ဒါပေမဲ့ စီးပွားရေးတွေ လုပ်လို့ကိုင်လို့ကောင်းမယ့် အခြေအနေကို ဆက်ပြီးလိုချင်တယ်ဆိုရင် ကျွန်မတို့ကို အားပေးသင့်တယ်” ဟု နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြန်လည်ဖြေကြားသည်။
အဆိုပါဟောပြောပွဲတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မိန့်ခွန်းပြောကြားရာ၌ ရခိုင်ပြည်နယ်တွင် ဖြစ်ပွားနေသော ပဋိပက္ခများပြီးလျှင် နိုင်ငံတကာ အသိုင်းအဝိုင်းအနေဖြင့် ဒုတိယ စိတ်ဝင်စားမှုအများဆုံးမှာ နိုင်ငံခြားရင်းနှီးမြှုပ်နှံမှု (FDI ) ဖြစ်ကြောင်း၊ လက်ရှိအစိုးရသည် မြန်မာနိုင်ငံအား နိုင်ငံခြားစီးပွားရေးလုပ်ငန်းများအတွက် သင့်တော်သော ပတ်ဝန်းကျင်တစ်ခုဖြစ်ရန် လုပ်ဆောင်နေကြောင်း၊ ရင်း နှီးမြှုပ်နှံမှုနှင့် ကုမ္ပဏီဥပဒေများအား နိုင်ငံ၏အကျိုးအမြတ်များနှင့် ကောင်းမွန်သော စီးပွားရေးအလေ့အကျင့်များ ပေါ်ပေါက်လာနိုင်ရန် ညှိနှိုင်းပြင်ဆင်ထားကြောင်း၊ အာဆီယံ အဖွဲ့အစည်း နိုင်ငံများကြောင့် မြန်မာနိုင်ငံ စီးပွားရေး တိုးတက်မှုများရှိကြောင်းနှင့် ဆက်လက်ပူးပေါင်းလုပ်ဆောင်သွားပါက အကျိုးအမြတ်များအား အပြန်အလှန်ခံစားရမည်ဖြစ်ကြောင်း ပြောကြားသည်။
“မြန်မာနိုင်ငံရဲ့ လျင်မြန်သောစီးပွားရေး တိုးတက်မှုတွေက အာဆီယံနိုင်ငံများနှင့် တခြားအရှေ့အာရှနိုင်ငံများ၏ ကုန်သွယ်ရေးနှင့် ရင်းနှီးမြှုပ်နှံမှုများကြောင့်ဖြစ်သည်ဟု ယူဆလို့ရပါတယ်။ မြန်မာနဲ့ စင်ကာပူက စီးပွားရေး စိုပြည်စိမ်းလန်းတဲ့ (အာဆီယံ) ဒေသထဲတွင် အချက်အချာကျတဲ့ လမ်းဆုံပေါ်မှာ တည်ရှိနေပြီး အာဆီယံနိုင်ငံများရဲ့ ဆက်လက်ဖွံဖြိုးတိုးတက်ရေးအတွက် အရေးပါ အရာရောက်ပါတယ်။ ကျွန်မတို့တစ်ဦးစီက အားသာချက်တွေကို ပူးပေါင်းလိုက်ရင် အကျိုးအမြတ်တွေကို ကျွန်မတို့တွေပဲ အပြန်အလှန်ခံစားရမှာမဟုတ်ဘဲ ဒေသတစ်ခုလုံး အတွက်ပါ ကောင်းမွန်မှာပါ။ မြန်မာနိုင်ငံက အရှေ့တောင်အာရှတိုက်မှာ အကြီးဆုံး နိုင်ငံဖြစ်ပြီး စိုက်ပျိုးရေးလုပ်ငန်းများအတွက် ကောင်းမွန်သောမြေများနှင့် သစ်တောထွက် ပစ္စည်းများ၊ ကျောက်မျက်ရတနာများ၊ သဘာဝဓာတ်ငွေ့ စသည့်သယံဇာတများ ပိုင်ဆိုင်တဲ့အပြင် လူဦးရေအသင့်အတင့်များပြားပြီး ငယ်ရွယ်သောလုပ်သားအင်အားများ ရှိပါတယ်” ဟု ဒေါ်အောင်ဆန်းစုကြည်က ဆိုသည်။
ဆက်လက်ပြီး ဒေါ်အောင်ဆန်းစုကြည်က မြန်မာနိုင်ငံအနေဖြင့် လက်ရှိတိုးတက်မှုနှုန်းအား ထိန်းကျောင်းမြှင့်တင်သွားမည် ဆိုပါက လူသားအရင်းအမြစ်အပေါ် ရင်းနှီးမြှုပ်နှံမှုသည် အရေးကြီးကြောင်း၊ စီးပွားရေးဈေးကွက် ညွှန်းပြချက်ကိန်းကဏ္ဍများ ကောင်းသောဘက်သို့ ရွေ့လျားနေကြောင်း၊ လူသားအရင်းအမြစ်နှင့် အဘက်ဘက်က တိုးတက်မှုများအတွက် လမ်းပန်းဆက်သွယ်ရေးနှင့် လျှပ်စစ်မီးရရှိရေးက အရေးကြီးကြောင်း၊ ပညာရေးကဏ္ဍများတွင်လည်း ပြုပြင်ပြောင်းလဲမှု လုပ်ဆောင်နေကြောင်း ပြောကြားသည်။
လူသားအရင်းအမြစ်အပေါ် ရင်းနှီးမြှုပ်နှံမှုနှင့် ပတ်သက်ပြီး ပညာရေးကဏ္ဍပြုပြင်ပြောင်းလဲမှု လုပ်ဆောင်ရာတွင် နိုင်ငံတကာ အဖွဲ့အစည်းများနှင့် ပူးပေါင်းဆောင်ရွက်ခဲ့သော ဘဏ္ဍာရေးနှင့် စီမံရေးဝန်ကြီးဌာနက ၂၀၁၇ နှစ်တွင် Myanmar Living Conditions Survery ထုတ်ပြန်ခဲ့ကြောင်း၊ အဆိုပါစစ်တမ်းတွင် စာရေးတတ်မှုနှင့် ဖတ်တတ်မှုနှုန်း၊ ကျောင်းသားအရေအတွက်နှုန်း၊ လျှပ်စစ်မီးရရှိမှုနှုန်းအပြင် တခြားအရေးပါသော နှုန်းများလည်း မြင့်တက်လာမည်ကို တွေ့ရမည်ဖြစ်ကြောင်း၊ မြန်မာနိုင်ငံမှ လူငယ်များသည် တိုင်းပြည်က ဂုဏ်ယူနိုင်သည့် လူငယ်များဖြစ်ရန် အလားအလာများစွာရှိကြောင်း ဒေါ်အောင်ဆန်းစုကြည်က ပြောကြားသည်။
