အကြမ်းဖက်တိုက်ခိုက်မှု တစ်နှစ်ပြည့်မြောက်သည့် ကာလတွင် နယ်စပ်ဖြတ်ကျော် ဝင်ရောက်ပြီး အကြမ်းဖက် တိုက်ခိုက်မှု ထပ်မံမဖြစ်လာရေး နယ်စပ်ခြံစည်းရိုး တစ်လျှောက် နယ်ခြားစောင့်ရဲမှ လုံခြုံရေး ဖြန့်ကြက်နေရာယူထားပြီး မောင်တောခရိုင်အတွင်း မြို့များတွင် ရဲတပ်ဖွဲ့မှ စောင့်ကြည့်ကင်း၊ နေ့ည လှည့်ကင်းများ ဆောင်ရွက်ထားရှိကြောင်း ရခိုင်ပြည်နယ် ရဲတပ်ဖွဲ့မှူးက ပြောကြားသည်။
“မောင်တောမှာ မြန်မာနိုင်ငံ ရဲတပ်ဖွဲ့အနေနဲ့ ပြန်ကြည့်မယ်ဆိုရင် နယ်ခြားစောင့် ရဲတပ်ဖွဲ့ဆိုတာ ရှိပါတယ်။ နယ်စပ်တစ်လျှောက်၊ နယ်စပ်ခြံစည်းရိုး တစ်လျှောက်မှာ ဖြန့်ကြက်ပြီးတော့ လုံခြုံရေး စခန်းပေါင်း အားလုံး ၁၆၀ ကျော် ဖြန့်ကြက်ပြီး နေရာယူထားတာ ရှိပါတယ်။ အတွင်းပိုင်းမှာလည်း မောင်တောခရိုင် ရဲတပ်ဖွဲ့အနေဖြင့် မောင်တောမြို့နယ်ရဲတပ်ဖွဲ့၊ ဘူးသီးတောင်မြို့နယ်ရဲတပ်ဖွဲ့ ဖြန့်ခွဲပြီးတော့မှ လုံခြုံရေးအင်အား တစ်ထောင်နီးပါးနဲ့ ဆောင်ရွက်နေတာ ရှိပါတယ်။ အဲလိုဆောင်ရွက်တဲ့ အခါမှာ ရဲတပ်ဖွဲ့ရဲ့ လုံခြုံရေးလုပ်ငန်းစဉ်ဖြစ်တဲ့ စောင့်ကြည့်ကင်းတွေ ချထားပါတယ်။ နေ့ပိုင်းလှည့်ကင်းတွေ ဆောင်ရွက်ပါတယ်။ ညပိုင်းကိုလည်း လှည့်ကင်းဆောင်ရွက်ပါတယ်။ လုံခြုံရေးအရ မသင်္ကာတဲ့ ကျော်စောသတင်းတွေရှိတဲ့ လုံခြုံရေး ကျိုးပေါက်မှုရှိနိုင်တဲ့ ယခင်ပြစ်ချက်ဟောင်း ရှိတဲ့သူတွေကိုလည်း စောင့်ကြည့်ပြီးတော့ လိုအပ်ရင် လိုအပ်သလို အရေးယူ ဆောင်ရွက်နေတာ ရှိပါတယ်” ဟု ရခိုင်ပြည်နယ်ရဲတပ်ဖွဲ့မှူး ရဲမှူးကြီး အောင်မြတ်မိုးက မီဒီယာများသို့ ပြောကြားသည်။
မောင်တောနယ်စပ်တွင် အကြမ်းဖက် အဖွဲ့မှ လူသစ်စုဆောင်းခြင်း၊ သင်တန်းပေးခြင်း၊ လက်နက်ခဲယမ်းနှင့် ရိက္ခာစုဆောင်းခြင်း သတင်းများ ရရှိထားသဖြင့် နယ်စပ်ဖြတ်ကျော်ပြီး ၂၀၁၂ ခုနှစ်၊ ၂၀၁၆ ခုနှစ်၊ ၂၀၁၇ ခုနှစ်ကကဲ့သို့ အကြမ်းဖက်တိုက်ခိုက်မှု ဖြစ်စဉ်မဖြစ်ရအောင် ကြိုတင်ကာကွယ် တားဆီးမှု လုံခြုံရေးပိုင်းကို လုပ်နေခြင်းဖြစ်သည်။
“တစ်ဖက်နိုင်ငံက ဒုက္ခသည် စခန်းတွေမှာ ဒုက္ခသည်အသွင်ယူပြီးတော့ စိမ့်ဝင်ရောက်ရှိနေတာ ရှိပါတယ်။ တစ်ဖက်နိုင်ငံက ဖမ်းဆီးရမိမှု ဖြစ်စဉ်တွေကို ပြန်လေ့လာကြည့်တဲ့အခါ လုပ်သေနတ်တွေကို ဖမ်းဆီးရမိတယ်။ မူးယစ်ဆေးဝါးတွေ အမြောက်အမြား ဖမ်းဆီးရမိတယ်။ အကြမ်းဖက်နဲ့ ဆက်သွယ်ပတ်သက် သူတွေကိုလည်း အမြောက်အမြား ဖမ်းဆီးရမိတာ ရှိပါတယ်။ နောက်တစ်ခါ နယ်စပ်ဒေသမှာ လူသစ်တွေ စုဆောင်းနေတယ်။ သင်တန်းတွေ ပေးနေတယ်။ လက်နက်ခဲယမ်းတွေ စုဆောင်းနေတယ်။ ရိက္ခာတွေ စုဆောင်းနေတယ်ဆိုတဲ့ သတင်းတွေ ရရှိထားပါတယ်။ အဲဒီအတွက် နယ်စပ်ဖြတ်ကျော်ပြီးတော့မှ ၂၀၁၂ ခုနှစ်၊ ၂၀၁၆ခုနှစ်၊ ၂၀၁၇ ခုနှစ်ကလို ဝင်ရောက်ပြီးတော့ အကြမ်းဖက် တိုက်ခိုက်မှုဖြစ်စဉ် မဖြစ်ရအောင်လို့ အခုလို ကြိုတင်ကာကွယ် တားဆီးမှုတွေ လုံခြုံရေးပိုင်းကို လုပ်နေတာ ဖြစ်ပါတယ်” ဟု ရခိုင်ပြည်နယ် ရဲတပ်ဖွဲ့မှူး ရဲမှူးကြီး အောင်မြတ်မိုးက ပြောကြားသည်။
ထို့အပြင် အခြေအနေ လိုအပ်ချက်အရ တပ်မတော်ကို အကူအညီတောင်းခံပြီး လှည့်ကင်းများ ပူးပေါင်းဆောင်ရွက်နေပြီး သြဂုတ်လကုန်အထိ တောက်လျှောက် ဆောင်ရွက်သွားမည် ဖြစ်ကြောင်းနှင့် နောက်ထပ် လိုအပ်သလို ဆက်လက်ဆောင်ရွက်မည် ဖြစ်ကြောင်း၊ မြန်မာ-ဘင်္ဂလားဒေ့ရှ် နယ်စပ်ခြံစည်းရိုး တစ်လျှောက် နယ်မြေလုံခြုံရေးအတွက် နှစ်နိုင်ငံ ညှိနှိုင်း၍ မြန်မာနိုင်ငံ နယ်ခြားစောင့် ရဲတပ်ဖွဲ့ဝင်များနှင့် ဘင်္ဂလားဒေ့ရှ် နယ်ခြားစောင့်တပ်မှ လုံခြုံရေး တပ်ဖွဲ့ဝင်များသည် မိမိတို့နိုင်ငံ အသီးသီး အတွင်းရှိ နယ်စပ်ခြံစည်းရိုး လမ်းအတိုင်း နှစ်နိုင်ငံ နှစ်ဘက်ညှိနှိုင်း၍ မြေပြင်လှည့်ကင်း ဆောင်ရွက်ခြင်းနှင့် နတ်မြစ်အတွင်း ရေကြောင်းကင်းလှည့်ခြင်းတို့ကို ဆောင်ရွက်နေခြင်းဖြစ်ကြောင်း သိရသည်။
၂၀၁၇ ခုနှစ် သြဂုတ် ၂၅ ရက်က မောင်တောခရိုင်အတွင်း ရဲကင်းစခန်း ၃၀ နှင့် တပ်စခန်းတစ်ခုကို ARSA အစွန်းရောက် ဘင်္ဂါလီ အကြမ်းဖက်အဖွဲ့က ဝင်ရောက်စီးနင်း တိုက်ခဲ့သဖြင့် တပ်ဖွဲ့ဝင် ၁၁ ဦး၊ ဒုလဝကမှူး တစ်ဦးကျဆုံးခဲ့ပြီး ဒဏ်ရာရ တပ်ဖွဲ့ဝင်ပေါင်း ၁၁ ဦး ရှိခဲ့ကြောင်း သိရသည်။
