<

နယ်စပ်ခြံစည်းရိုးကာရန်ခြင်း လုပ်ငန်းသည် နိုင်ငံတော်လုံခြုံရေး၊ တည်ငြိမ်အေးချမ်းရေးနှင့် တရားဥပဒေစိုးမိုးရေးအတွက် အလေးပေး ဆောင်ရွက်ရမည့်လုပ်ငန်းဖြစ်၍ အမျိုးသားစီမံကိန်းအရ အဆိုပြုငွေအပေါ် ဖြတ်တောက်ခြင်းမပြုဘဲ အပြည့်အ၀ ခွင့်ပြုသင့်ဟု ပြည်ထောင်စုစာရင်းစစ်ချုပ် အကြံပြု

နယ်စပ်ခြံစည်းရိုး ကာရန်ခြင်းလုပ်ငန်းသည် နိုင်ငံတော်လုံခြုံရေး၊ တည်ငြိမ်အေးချမ်းရေးနှင့် တရားဥပဒေစိုးမိုးရေးအတွက် အလေးပေး ဆောင်ရွက်ရမည့် လုပ်ငန်းဖြစ်၍ အမျိုးသားစီမံကိန်းအရ အဆိုပြုငွေအပေါ် ဖြတ်တောက်ခြင်းမပြုဘဲ အပြည့်အ၀ ခွင့်ပြုသင့်ဟု ပြည်ထောင်စုစာရင်းစစ်ချုပ်က အကြံပြုခဲ့သည်။

သြဂုတ် ၂၀ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ပြည်သူ့ငွေစာရင်းပူးပေါင်းကော်မတီက ပြည်ထောင်စုစာရင်းစစ်ချုပ်၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် လေ့လာတွေ့ရှိချက်နှင့် သဘောထားမှတ်ချက် အစီရင်ခံစာတင်သွင်းစဉ် ထိုကဲ့သို့ ပြောကြားခဲ့ခြင်း ဖြစ်သည်။

နယ်စပ်ခြံစည်းရိုးကာရန်ခြင်း ကိစ္စနှင့်ပတ်သက်ပြီး ပြည်ထောင်စုစာရင်းစစ်ချုပ်က နယ်စပ်ခြံစည်းရိုး ကာရန်ခြင်းလုပ်ငန်းသည် နိုင်ငံတော်လုံခြုံရေး၊ တည်ငြိမ်အေးချမ်းရေးနှင့် တရားဥပေးစိုးမိုးရေးအတွက် အထူးအလေးပေး ဆောင်ရွက်ရမည့် လုပ်ငန်းဖြစ်၍ အမျိုးသားစီမံကိန်းအရ အဆိုပြုငွေအပေါ် ဖြတ်တောက်ခြင်းမပြုဘဲ အပြည့်အ၀ ခွင့်ပြုခြင်းဖြင့် လုံခြုံရေးစနစ် ကောင်းမွန်လာသည်နှင့်အမျှ နယ်မြေတည်ငြိမ် အေးချမ်းလာနိုင်သည်ဟု သုံးသပ်ကြောင်း၊ ထို့အတွက် ခြံစည်းရိုးကာရံရန် ကျန်ရှိနေသောနေရာများကို ခိုင်ခံ့ကောင်းမွန်သော ခြံစည်းရိုးများဖြင့် ကာရံရန်၊ ပျက်စီးနေရာများကို ခိုင်ခံ့ကောင်းမွန်အောင် ပြုပြင်မှုများ ဆောင်ရွက်ရန် အကြံပြုကြောင်း သုံးသပ်ထားသည်ဟု အစီရင်ခံစာတွင် ဖော်ပြထားသည်။

ထို့အတူ ပြည်သူ့ငွေစာရင်းပူးပေါင်း ကော်မတီကလည်း မြန်မာနိုင်ငံရဲတပ်ဖွဲ့မှ တင်ပြလာသည့်လုပ်ငန်းဆောင်ရွက်မှု မှတ်တမ်းဓာတ်ပုံများအရ ရေတိုက်စားခံရ၍ ပျက်စီးသည်ကို ပြန်လည်ပြုပြင်ထားသည့် မြေထိန်းနံရံများ၊ ခြံစည်းရိုးများတွင် ရေထွက်ပေါက်များ မပါရှိခြင်း၊ အချို့ပါရှိသော်လည်း လုံလောက်နိုင်မှုမရှိခြင်းများ တွေ့ရှိရကြောင်း၊ ခြံစည်းရိုးများ တည်ဆောက်မှု၊ ပျက်စီး၍ ပြန်လည်ပြုပြင်မှုများကို ရေရှည်ခိုင်ခံ့ကောင်းမွန်ပြီး စံချိန်စံညွှန်း သတ်မှတ်ချက် ကိုက်ညီစေရန်နှင့် မြေပြင်အနေအထားအရ လိုအပ်သည့် ရေထွက်ပေါက်များ၊ ရေကျော်များ ပြုလုပ်ထားရှိ ဆောင်ရွက်သင့်ကြောင်း အကြံပြုထားသည်။

မြန်မာ-ဘင်္ဂလားဒေ့ရှ် နှစ်နိုင်ငံကုန်းမြေ ထိစပ်လျက်ရှိသော နယ်နိမိတ်အရှည်သည် ၁၈၂ ဒသမ ၆၈ မိုင်ရှိပြီး ခြံစည်းရိုးကာရံခြင်းကို အဆင့်လေးဆင့်ဖြင့် ဆောင်ရွက်လျက်ရှိကြောင်း၊ ခြံစည်းရိုး ကာရံပြီးစီးမှုအနေဖြင့် ၁၃၈ ဒသမ ၁၈ မိုင်ဖြစ်ကြောင်း၊ ၂၀၁၇-၂၀၁၈ ခုနှစ်တွင် ဆောင်ရွက်ဆဲအဖြစ် ၁၄ ဒသမ ၇၀ မိုင်ဖြစ်ပြီး ခြံစည်းရိုး ကာရံရန်ကျန်ရှိမှု အနေဖြင့် ၂၉ ဒသမ ၈၀ မိုင်ဖြစ်ကြောင်း၊ ၂၀၀၉ ခုနှစ်မှ ၂၀၁၇-၂၀၁၈ခုနှစ်အထိ စုစုပေါင်းကျပ် ၂၁၃ ဒသမ ၂၆၈ ဘီလျံ သုံးစွဲခဲ့ပြီး ကာကွယ်ရေးဝန်ကြီးဌာနသို့ Deposit Work အဖြစ် လုပ်ငန်းအပ်နှံ ဆောင်ရွက်လျက်ရှိကြောင်း အစီရင်ခံစာအရ သိရသည်။

၂၀၁၆-၂၀၁၇ ခုနှစ် ငွေလုံးငွေရင်း အသုံးစရိတ် အနေဖြင့် နယ်စပ်ခြံစည်းရိုးကာရံခြင်း လုပ်ငန်များအား မြန်မာနိုင်ငံရဲတပ်ဖွဲ့ အနေဖြင့် ရခိုင်ပြည်နယ်၌ မြန်မာ-ဘင်္ဂလားဒေ့ရှ် နယ်စပ်ခြံစည်းရိုး ကာရံခြင်းလုပ်ငန်း ခြောက်ခု၊ စစ်ကိုင်းတိုင်းဒေသကြီး၌ မြန်မာ-အိန္ဒိယနယ်စပ် ခြံစည်းရိုးကာရံခြင်းလုပ်ငန်း တစ်ခု ဆောင်ရွက်ခဲ့ကြောင်း၊ မြန်မာ-ဘင်္ဂလားဒေ့ရှ် နယ်စပ်ခြံစည်းရိုး ကာရံခြင်းလုပ်ငန်း ခြောက်ခုအတွက် ကျပ် ၂၂ ဒသမ ၂၃၉ ဘီလျံနှင့် မြန်မာ-အိန္ဒိယ နယ်စပ်ခြံစည်းရိုးကာရံခြင်း လုပ်ငန်းတစ်ခုအတွက် ကျပ် သုည ဒသမ ၃၅၄ ဘီလျံ၊ စုစုပေါင်း ကျပ် ၂၂ ဒသမ ၅၉၃ ဘီလျံ သုံးစွဲခဲ့ကြောင်း ပြည်သူ့ငွေစာရင်း ပူးပေါင်းကော်မတီ၏ အစီရင်ခံစာတွင် ဖော်ပြထားသည်။

August 21, 2018














Copy Protected by Chetan's WP-Copyprotect.