၂၀၁၈ ခုနှစ် ဇွန်လအထိ မြန်မာနိုင်ငံတွင် Brand New ကားသစ် ၆၈၄၁ စီး ရောင်းချနိုင်ခဲ့ပြီး ယခင်နှစ်ကာလတူထက် ရောင်းအား ၁၁၄ ရာခိုင်နှုန်းကျော် မြင့်တက်

၂၀၁၈ ခုနှစ် ဇွန်လအထိ မြန်မာနိုင်ငံတွင် Brand New ကားသစ် ၆၈၄၁ စီး ရောင်းချနိုင်ခဲ့ပြီး ယခင်နှစ်ကာလတူထက် ရောင်းအား ၁၁၄ ရာခိုင်နှုန်းကျော် မြင့်တက်
Published 21 August 2018

BMW ကားအရောင်းပြခန်းအတွင်း လေ့လာကြည့်ရှုနေသူများကို တွေ့ရစဉ်

၂၀၁၈ ခုနှစ် ဇွန်လအထိ မြန်မာနိုင်ငံတွင် Brand New ကားသစ်စီးရေ ၆၈၄၁ စီး ရောင်းချနိုင်ခဲ့ပြီး ယခင်နှစ်ကာလတူထက် ၁၁၄ ရာခိုင်နှုန်းကျော် များပြားခဲ့ကာ အာဆီယံနိုင်ငံများအနက် တိုးတက်မှုနှုန်း အမြင့်ဆုံး ဖြစ်နေကြောင်း ASEAN Automative Federation မှ ထုတ်ပြန်သော ဒေသတွင်း ကားသစ်ရောင်းချမှုနှင့် ထုတ်လုပ်မှုဆိုင်ရာ အစီရင်ခံစာအရ သိရသည်။

၂၀၁၈ ခုနှစ် ဇွန်လကုန်အထိ အာဆီယံနိုင်ငံများအလိုက် ကားသစ်ရောင်းချမှု ပမာဏမှာ အင်ဒိုနီးရှားတွင် ၅၅၃၇၇၉ စီး၊ ထိုင်းတွင် ၄၈၉၁၁၈ စီး၊ မလေးရှားတွင် ၂၈၉၇၁၄ စီး၊ ဖိလစ်ပိုင်တွင် အစီးရေ ၁၇၁၅၉၀၊ ဗီယက်နမ်တွင် ၁၂၅၆၅၉ စီး၊ စင်ကာပူတွင် ၄၈၄၄၃ စီး၊ မြန်မာတွင် ၆၈၄၁ စီး၊ ဘရူနိုင်းတွင် အစီးရေ ၅၆၉၀ ဖြစ်ပြီး စင်ကာပူ၊ ဘရူနိုင်း၊ ဖိလစ်ပိုင်နိုင်ငံတို့တွင် ယခင်နှစ်ကထက် ရောင်းအားကျဆင်းခဲ့ပြီး ကျန်နိုင်ငံများတွင် ရောင်းအား အနည်းအများအလိုက် တိုးတက်ခဲ့သည်။ အာဆီယံဈေးကွက်တစ်ခုလုံး အနေဖြင့် ယခင်နှစ် ကာလတူနှင့်နှိုင်းယှဉ်ပါက ကားသစ်ရောင်းချမှု ပမာဏ ၄ ဒသမ ၇ ရာခိုင်နှုန်းတိုးတက်ခဲ့ပြီး မြန်မာနိုင်ငံက ၁၁၄ ရာခိုင်နှုန်းကျော်ဖြင့် တိုးတက်မှုနှုန်း အမြင့်ဆုံးဖြစ်သည်။

၂၀၁၇ ခုနှစ်အတွင်း မြန်မာနိုင်ငံတွင် Brand New ကားသစ်စီးရေ ၈၂၂၅ စီး ရောင်းချနိုင်ခဲ့ရာ ၂၀၁၆ ခုနှစ်ကထက် ၉၇ ရာခိုင်နှုန်းကျော် များပြားခဲ့ပြီး လက်ရှိ ၂၀၁၈ ခုနှစ်တွင်လည်း ၂၀၁၇ ခုနှစ်ကာလတူထက် ပိုမိုရောင်းချခဲ့ရသည်။ ၂၀၁၈ ဇန်နဝါရီတွင် ၈၉၁ စီး၊ ဖေဖော်ဝါရီတွင် ၁၀၇၉ စီး၊ မတ်တွင် ၂၉၆၂ စီး၊ ဧပြီတွင် ၃၇၁၅ စီး၊ မေတွင် ၁၅၃၈ စီး၊ ဇွန်တွင် ၁၅၈၈ စီး ရောင်းချနိုင်ခဲ့ပြီး ယခင်နှစ်ကာလတူထက် ၃၆၄၆ စီး ပိုမိုရောင်းနိုင်ခဲ့ကာ တိုးတက်မှုနှုန်း ၁၁၄ ဒသမ ၁ ရာခိုင်နှုန်းအထိ ဖြစ်ပေါ်ခဲ့သည်။

၂၀၁၆ ခုနှစ်တွင် မြန်မာနိုင်ငံအတွင်း ကားသစ်စီးရေ ၄၁၆၈ စီး ရောင်းချခဲ့ရပြီး ၂၀၁၇ ခုနှစ်အတွင်း မြန်မာအစိုးရ၏ ကားတင်သွင်းမှုဆိုင်ရာမူဝါဒ အပြောင်းအလဲကြောင့် ကားသစ်အစီးရေ ၈၂၀၀ ကျော်အထိ ရောင်းချခဲ့ရခြင်း ဖြစ်သည်။ ကားသစ်များ ရောင်းချမှုနှင့် ထုတ်လုပ်မှုများအတွက် မြန်မာဈေးကွက်သည် ထွန်းသစ်စဈေးကွက်တစ်ခုဖြစ်လာပြီး နှစ်အလိုက် တိုးတက်မှုနှုန်း ဆက်လက်မြင့်မားမည်ဟု ခန့်မှန်းထားကြောင်း သိရသည်။

ကားသစ်ရောင်းချမှု ပမာဏ တိုးတက်မှုနည်းတူ မြန်မာနိုင်ငံတွင် ကားသစ်ထုတ်လုပ်မှု ပမာဏတိုးတက်မှုလည်း အာဆီယံနိုင်ငံများအနက် အမြင့်ဆုံးဖြစ်နေသည်။ အာဆီယံနိုင်ငံများတွင် မြန်မာနိုင်ငံအပါအဝင် နိုင်ငံခြောက်နိုင်ငံတွင် ကားသစ်တပ်ဆင် ထုတ်လုပ်မှုများ ပြုလုပ်နေပြီး အာဆီယံဒေသတစ်ခုလုံး အနေဖြင့် ၂၀၁၇ ခုနှစ်တွင် ၀ ဒသမ ၆ ရာခိုင်နှုန်းသာ တိုးတက်မှုရှိသော်လည်း မြန်မာနိုင်ငံက ရာခိုင်နှုန်း ၃၂၀ ကျော် တိုးတက်ခဲ့သည်။

၂၀၁၈ ခုနှစ် ဇွန်လကုန်အထိ အာဆီယံနိုင်ငံများအလိုက် ကားတပ်ဆင်ထုတ်လုပ်မှု ပမာဏမှာ ထိုင်းက ၁၀၅၆၅၆၉ စီး၊ အင်ဒိုနီးရှားက ၆၂၄၄၀၈ စီး၊ မလေးရှားက ၂၈၀၉၄၇ စီး၊ ဗီယက်နမ်က ၁၀၁၄၅၉ စီး၊ ဖိလစ်ပိုင်က ၄၀၉၈၂ စီး၊ မြန်မာက ၄၆၈၃ စီးဖြစ်ပြီး ဖိလစ်ပိုင်နိုင်ငံမှလွဲ၍ ကျန်နိုင်ငံများတွင် ထုတ်လုပ်မှုပမာဏ တိုးတက်ခဲ့သည်။ အာဆီယံဈေးကွက်တစ်ခုလုံး အနေဖြင့် ၂၀၁၈ ခုနှစ် မေလအထိ ကားသစ်တပ်ဆင်ထုတ်လုပ်မှု ပမာဏ ၆ ဒသမ ၆ ရာခိုင်နှုန်း တိုးတက်ခဲ့ပြီး မြန်မာနိုင်ငံက ၁၉၄ ရာခိုင်နှုန်းကျော်ဖြင့် တိုးတက်မှုနှုန်း အမြင့်ဆုံးဖြစ်သည်။

မြန်မာနိုင်ငံတွင် ၂၀၁၇ ခုနှစ်အတွင်း တပ်ဆင်ထုတ်လုပ်သည့် ကားသစ်အစီးရေမှာ ၄၉၃၀ ဖြစ်ပြီး ၂၀၁၆ ခုနှစ်ကထက် ၃၇၇၈ စီး ပိုမိုခဲ့ကာ တိုးတက်မှုပမာဏ ၃၂၈ ရာခိုင်နှုန်း ရှိခဲ့သည်။ ၂၀၁၈ ခုနှစ်တွင်လည်း ဇန်နဝါရီတွင် ၆၁၀၊ ဖေဖော်ဝါရီတွင် ၇၇၇ စီး၊ မတ်တွင် ၆၆၅ စီး၊ ဧပြီတွင် ၆၁၈ စီး၊ မေတွင် ၉၈၂ စီး၊ ဇွန်တွင် ၁၀၃၁ စီးတပ်ဆင် ထုတ်လုပ်နိုင်ခဲ့ပြီး ယခင်နှစ်ကာလတူထက် ၃၀၉၄ စီး ပိုမိုခဲ့ကာ တိုးတက်မှုနှုန်း ၁၉၄ ဒသမ ၇ ရာခိုင်နှုန်းအထိ ရှိခဲ့သည်။

Most Read

Most Recent