<

၂၀၁၈ ခုနှစ် ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်မည့် ကိုယ်စားလှယ်လောင်းများ စက်တင်ဘာ ၃ ရက်မှစ၍ နိုဝင်ဘာ ၁ ရက်အထိ မဲဆွယ်စည်းရုံးနိုင်မည်

၂၀၁၈ ခုနှစ် နိုဝင်ဘာ ၃ ရက်တွင် ကျင်းပမည့် ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းများအနေဖြင့် စက်တင်ဘာ ၃ ရက်မှစတင်၍ နိုဝင်ဘာ ၁ ရက်အထိ  မဲဆွယ်စည်းရုံးနိုင်မည်ဖြစ်ကြောင်း ပြည်ထောင်စုရွေးကောက်ပွဲကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင် က သြဂုတ် ၁၆ ရက်တွင် ပြောကြားသည်။

၂၀၁၈ ခုနှစ် ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်း စုစုပေါင်း ၆၉ ဦးရှိပြီး လွှတ်တော်ကိုယ်စားလှယ်လောင်းများ၏ အမည်စာရင်းများကို သက်ဆိုင်ရာရွေးကောက်ပွဲ ကော်မရှင်အဖွဲ့ခွဲများတွင် သြဂုတ် ၆ ရက်မှ စတင်၍ ကပ်ထားကြေညာပြီးဖြစ်ကြောင်း ပြည်ထောင်စုရွေးကောက်ပွဲကော်မရှင်က သတင်းထုတ်ပြန်ထားသည်။

“စက်တင်ဘာ ၃ ရက် မနက် ၆ နာရီက နေပြီးတော့ နိုဝင်ဘာ ၁ ရက် ည ၁၂ နာရီအထိပေါ့။ ရက်ပေါင်း ၆၀ ပေးထားပါတယ်” ဟု ပြည်ထောင်စုရွေးကောက်ပွဲကော်မရှင် အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က ပြောကြားသည်။

မူလက ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်ရန် ကိုယ်စားလှယ်လောင်း ၆၉ ဦး အမည်စာရင်းတင်သွင်းထားပြီး အဆိုပါကိုယ်စားလှယ်များကို သက်ဆိုင်ရာ လွှတ်တော်ရွေးကောက်ပွဲဥပဒေများအရ စစ်ဆေးရာတွင် အရည်အချင်းသတ်မှတ်ချက်နှင့် မကိုက်ညီသော ကိုယ်စားလှယ်လောင်းများမရှိကြောင်း ဦးမြင့်နိုင်က ဆိုသည်။

၂၀၁၈ ခုနှစ် ကြားဖြတ်ရွေးကောက်ပွဲတွင် လစ်လပ်မဲဆန္ဒနယ် ၁၃ နေရာ ရှိသည်။

လစ်လပ်ပြည်သူ့လွှတ်တော်မဲဆန္ဒနယ်များတွင် ကန်ပက်လက်၊ လဲချား၊ တာမွေနှင့် မြင်းခြံတို့ဖြစ်ကာ အမျိုးသားလွှတ်တော်မဲဆန္ဒနယ်မှာ ကချင်ပြည်နယ် အမျိုးသားလွှတ်တော်မဲဆန္ဒနယ်အမှတ်(၂) (အကျုံးဝင်သောမြို့နယ် မြစ်ကြီးနား) ဖြစ်သည်။

ထို့အတူ လစ်လပ်တိုင်းဒေသကြီးနှင့် ပြည်နယ်လွှတ်တော်မဲဆန္ဒနယ်များမှာ မတူပီ၊ တမူး၊ အုတ်တွင်း၊ သပိတ်ကျင်း၊ ရသေ့တောင်၊ မင်းဘူး၊ ဆိပ်ကမ်းနှင့် မန္တလေးတိုင်းဒေသကြီးလွှတ်တော် ရှမ်းတိုင်းရင်းသားလူမျိုး မဲဆန္ဒနယ်တို့ ဖြစ်ကြသည်။

ပါတီကြီးများဖြစ်ကြသော အမျိုးသား ဒီမိုကရေစီအဖွဲ့ချုပ် (NLD) က မဲဆန္ဒနယ်အားလုံးတွင် ၀င်ရောက်ယှဉ်ပြိုင်မည်ဖြစ်ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) က မဲဆန္ဒနယ် ၁၀ နေရာတွင် ၀င်ရောက်ယှဉ်ပြိုင်သွားမည် ဖြစ်သည်။

ကြားဖြတ်ရွေးကောက်ပွဲအတွက် မဲစာရင်းကို ပထမအကြိမ်အဖြစ် ဇူလိုင် ၉ ရက်မှ ၂၂ ရက်အထိ သက်ဆိုင်ရာ ရွေးကောက်ပွဲကော်မရှင်အဖွဲ့ခွဲရုံးများတွင် ကပ်ထားကြေညာထားပြီး အောက်တိုဘာလတွင် နောက်ဆုံးအကြိမ်ဖြစ် ၁၄ ရက်ကြာ ထပ်မံကပ်ထား ကြေညာမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က သတင်းထုတ်ပြန်ထားသည်။

မဲစာရင်းများ ကြေညာကပ်ထားခြင်းနှင့်ပတ်သက်၍ အငြင်းပွားမှုများ မရှိသေးကြောင်း  ပြည်ထောင်စုရွေးကောက်ပွဲကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင် ပြောကြားသည်။

August 17, 2018














Copy Protected by Chetan's WP-Copyprotect.