၂၀၁၈ခုနှစ် ဇူလိုင်လကုန်အထိရရှိသော စာရင်းများအရ သီလဝါအထူးစီးပွားရေးဇုန် တွင် နိုင်ငံပေါင်း ၁၇နိုင်ငံမှ ရင်းနှီးမြှုပ်နှံမှု လုပ်ငန်းပေါင်း ၉၇ ခုကို ခွင့်ပြုမိန့်ထုတ်ပေးထားပြီး ရင်းနှီးမြှုပ်နှံမှုပမာဏဒေါ်လာ ၁၄၉၁ သန်းကျော်ရှိကာ လုပ်ငန်း ၅၂ခုမှာ စီးပွားဖြစ် လည်ပတ်လုပ်ကိုင်လျက်ရှိကြောင်း သီလဝါ အထူးစီးပွားရေးဇုန်စီမံခန့်ခွဲမှုကော်မတီမှ သိရသည်။
“ဇုန်အတွင်း စက်ရုံများမှာ လုပ်ကိုင်နေတဲ့ လုပ်သားတွေအနေနဲ့ လုပ်သားအခွင့်အရေးဆိုင်ရာ တည်ဆဲဥပဒေပါအခွင့်အရေးတွေ အကာအကွယ်တွေခံစားနိုင်ဖို့ အလုပ်ခန့်ထားမှုဆိုင်ရာ သဘောတူစာချုပ်ချုပ်ဆိုလုပ်ကိုင်ရန် တိုက်တွန်းဆောင်ရွက်နေပါတယ်။ ဒီလိုဆောင်ရွက်ရာမှာ အမြဲတမ်းလုပ်သားပေါင်း ၄၅၀၀ ကျော်ဟာ စာချုပ်ချုပ်ဆိုပြီး ဖြစ်ပါတယ်” ဟု သီလဝါအထူးစီးပွားရေးဇုန် စီမံခန့်ခွဲမှုကော်မတီမှ တာဝန်ရှိသူတစ်ဦးက ပြောကြားသည်။
သီလဝါအထူးစီးပွားရေးဇုန်တွင် စက်ရုံများရှိ အမြဲတမ်းလုပ်သားများ၊ အလုပ်သင်များ၊ အချိန်ပိုင်းဝန်ထမ်းများနှင့်ဆောက်လုပ်ဆဲ စက်ရုံများ၏ တည်ဆောက်ရေးလုပ်ငန်းခွင်များနှင့် ဇုန်အဆောက်အအုံဆိုင်ရာ တည်ဆောက်မှုများလည်းရှိရာ ယင်းတို့တွင် ကန်ထရိုက်စနစ်လုပ်ငန်းများ အပါအဝင်ဆောက်လုပ်ရေးလုပ်ငန်းမျိုးစုံ၌ လုပ်ကိုင်သူတစ်သောင်းကျော်ရှိသဖြင့် သီလဝါအထူးစီးပွားရေးဇုန်တွင် နေ့စဉ်အလုပ်လုပ်နေသူပေါင်း ၁၅၀၀၀ အတွက် လုပ်ငန်းခွင်ကြီးဖြစ်နေကြောင်း ၎င်းက ဆက်လက်ပြောကြားသည်။
မြန်မာကုမ္ပဏီ ဥပဒေအသစ်သည် ၂၀၁၈ ခုနှစ် သြဂုတ်၁ရက်တွင် စတင်အကောင်အထည်ဖော်ခဲ့ရာ သီလဝါအထူးစီးပွားရေးဇုန်ရှိ ဖွဲ့စည်းမှတ်ပုံတင်ပြီးသည့် ကုမ္ပဏီအားလုံးသည်လည်း အွန်လိုင်းစနစ်ဖြင့် ပြန်လည်မှတ်ပုံတင်ရမည်ဖြစ်ကြောင်း သိရသည်။
သီလဝါအထူးစီးပွားရေးဇုန်စီမံခန့်ခွဲမှု ကော်မတီသည် ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန၊ ပြည်တွင်းအခွန်များ ဦးစီးဌာနတို့ ပူးပေါင်း၍ သီလဝါအထူးစီးပွားရေးဇုန်အတွင်းရှိ ရင်းနှီးမြှုပ်နှံသူကုမ္ပဏီများအတွက် မြန်မာကုမ္ပဏီဥပဒေအသစ်ဆိုင်ရာနှင့် အွန်လိုင်းဖြင့် ကုမ္ပဏီပြန်လည်မှတ်ပုံတင်ခြင်းကို သီလဝါအထူးစီးပွားရေးဇုန် အုပ်ချုပ်မှုရုံး၌ လုပ်ငန်းရှင်များနှင့် ဆွေးနွေးခဲ့ကြောင်း သိရသည်။
လက်ရှိအချိန်တွင် လုပ်ငန်းများကို အီလက်ထရောနစ်စနစ်ဖြင့် သုံးစွဲရန်ကြိုးပမ်းနေရာ အကောက်ခွန်ရှင်းလင်းခြင်းကို မြန်မာအလိုအလျောက် အကောက်ခွန်ရှင်းလင်းစနစ် (MACCS) သုံးစွဲ၍လည်းကောင်း၊ ထုတ်ကုန်သွင်းကုန်ကိစ္စများ၊ ဗီဇာကိစ္စများ၊ ကုမ္ပဏီ မှတ်ပုံတင်ကိစ္စ၊ ရင်းနှီးမြှုပ်နှံမှုအဆိုပြုလွှာ တင်ခြင်းကိစ္စတို့ကို အွန်လိုင်းစနစ်တင်ပြ ဆောင်ရွက်နေပြီဖြစ်ရာ ကုမ္ပဏီများပြန်လည် မှတ်ပုံတင်ခြင်းနှင့်ဝင်ငွေခွန်ကိစ္စကိုပါ တိုးချဲ့နိုင်ရန် ကြိုးပမ်းနေကြောင်း သိရသည်။
၂၀၁၄ ခုနှစ် မြန်မာအထူးစီးပွားရေးဇုန် ဥပဒေအရ မြန်မာနိုင်ငံတွင်သီလဝါ၊ ထားဝယ်နှင့် ကျောက်ဖြူအထူးစီးပွားရေးဇုန်များကို အကောင်အထည်ဖော်နိုင်ရေး ဆောင်ရွက်လျက်ရှိရာ သီလဝါအထူးစီးပွားရေးဇုန်တွင် ဇုန်Aသည် အကောင်အထည်ဖော် ဆောင်ရွက်ပြီး စီးလုနီးပါးရှိပြီဖြစ်ပြီး ဇုန်B ကို ဆက်လက်အကောင်အထည်ဖော်နေပြီ ဖြစ်သည်။
