ရီးယဲလ်မက်ဒရစ်အသင်းနည်းပြ လိုပယ်တယ်ဟီက ဥရောပစူပါဖလားပွဲစဉ်တွင် အက်သလက်တီကိုအသင်းအား ရှုံးနိမ့်ခဲ့ပြီးနောက် အသင်းအနေဖြင့် များစွာတိုးတက်ရန် ကြိုးစားရဦးမည်ဟု ဝန်ခံပြောကြားခဲ့
ကြောင်း သိရသည်။အက်စ်တိုးရီးယားနိုင်ငံ၊ တယ်လင်မြို့တွင် ကျင်းပခဲ့သည့် ယင်းပွဲစဉ်တွင် ရီးယဲလ်မက်ဒရစ်အသင်းသည် အက်သလက်တီကိုအသင်းနှင့် သာမန်ပွဲချိန်အတွင်း (၂-၂)ဂိုးသရေကျနေရာ အချိန်ပိုဆက်ကစားခဲ့ရာ၌
အက်သလက်တီကိုအသင်းမှ ဆာအူးလ်၊ ကိုကေတို့က ဂိုးများထပ်မံသွင်းယူခဲ့ပြီး (၂-၄)ဂိုးရလဒ်ဖြင့် မြို့ခံပြိုင်ဘက်အား အရှုံးပေးခဲ့ရခြင်းဖြစ်သည်။ ရီးယဲလ်မက်ဒရစ်အသင်းနည်းပြ လိုပယ်တယ်ဟီကမိမိတို့အသင်းမှာ များစွာတိုးတက်ရန် ကြိုးစားရဦးမည်ဖြစ်ကြောင်းနှင့် အက်သလက်တီကိုအသင်းမှာ ချန်ပီယံဆုနှင့်ထိုက်တန်ကြောင်း ပြောကြားခဲ့သည်။
Photo: AFP
လိုပယ်တယ်ဟီက '' ဒီပွဲမှာ ကျွန်တော်တု့ိကစားပုံ ကောင်းမွန်ခဲ့ပါတယ်။ ဒါပေမဲ့ချန်ပီယံဆုအတွက် လုံလောက်တဲ့ခြေစွမ်းမျိုးတော့ မဟုတ်ပါဘူး။ အက်သလက်တီကိုအသင်းအတွက်တော့ ဂုဏ်ယူပါတယ်။
ဒီနိုင်ပွဲဟာ သူတို့နဲ့ထိုက်တန်တယ်လို့ ထင်ပါတယ်။ ပြိုင်ဘက်အသင်းကို (၄)ဂိုးပေးပြီးရှုံးနိမ့်ခဲ့ရတာကို ကျွန်တော်တို့ မပျော်ရွှင်နိုင်ပါဘူး။ ဒါက ပုံမှန်ဖြစ်စဉ်မျိုးလည်း မဟုတ်ပါဘူး။ ကျွန်တော်တု့ိအသင်းအနေနဲ့
နေရာစုံမှာ များစွာတိုးတက်ဖို့ လိုအပ်နေပါသေးတယ်။ တစ်ဦးချင်းအမှားတွေကို ပြင်ဆင်ဖို့တင်မဟုတ်ဘဲတစ်သင်းလုံးအမှားကင်းကင်းနဲ့ကစားနိုင်အောင် ကြိုးစားသွားရမှာပါ'' ဟုပြောကြားခဲ့သည်။ရီးယဲလ်မက်ဒရစ်အသင်းသည် အသင်းအတွက် ဂိုးအများဆုံးသွင်းယူပေးထားသည့် ပေါ်တူဂီတိုက်စစ်မှူး စီရော်နယ်လ်ဒိုထွက်ခွာသွားပြီးနောက် ၎င်း၏နေရာကို အစားထိုးရန် ကစားသမားခေါ်ယူခြင်းမရှိသေးရာယခုရှုံးပွဲကြောင့် ပရိသတ်များ၏ဝေဖန်မှုများနှင့် ပိုမိုရင်ဆိုင်နေရကြောင်း သိရသည်။
Photo: Getty Images
ချန်ပီယံလိဂ်ပြိုင်ပွဲတွင် ပြီးခဲ့သည့် (၃)ရာသီဆက်ဗိုလ်စွဲခဲ့သော ရီးယဲလ်မက်ဒရစ်အသင်းသည် ယခုရာသီတွင်မူ လာလီဂါချန်ပီယံဖြစ်ရေးကိုသာ အာရုံစိုက်ကစားသွားဖွယ်ရှိနေပြီး လူငယ်ကစားသမားများကိုသာ
ခေါ်ယူအားဖြည့်ထားသည်။ နည်းပြသစ်လိုပယ်တယ်ဟီကလည်း မိမိတို့အသင်းအနေဖြင့် ပြီးခဲ့သည့်ရာသီက အဆင့်(၃)နေရာသာရပ်တည်နိုင်ခဲ့သော လာလီဂါပြိုင်ပွဲကို အဓိကအာရုံစိုက်သွားမည်ဖြစ်သော်လည်း
(၃)ရာသီဆက်ဗိုလ်စွဲခဲ့သည့် ချန်ပီယံလိဂ်ပြိုင်ပွဲတွင်လည်း အောင်မြင်မှုရရန် ကြိုးစားသွားမည်ဖြစ်ကြောင်းပြောကြားခဲ့သည်။
အက်သလက်တီကိုအသင်းနည်းပြ ဆီမြွန်နီသည် ယင်းပွဲစဉ်တွင် UEFA ၏ (၄)ပွဲပယ်ပြစ်ဒဏ်ချမှတ်ခံထားရသောကြောင့် ပွဲကြည့်စင်မှသာ ကြည့်ရှုခဲ့ရပြီး ချန်ပီယံဖြစ်ပြီးနောက် ယခုရာသီလာလီဂါပြိုင်ပွဲမှာ ချန်ပီယံဆုအတွက် များစွာခက်ခဲလိမ့်မည်ဖြစ်ကြောင်း သုံးသပ်ပြောကြားခဲ့ကြောင်း သိရသည်။
