တောင်ဥက္ကလာပမြို့နယ်တွင် စက်ဘီးစီးလာသည့် အမျိုးသားက လမ်းလျှောက်လာသော အမျိုးသမီးကို မဖွယ်မရာ ကိုင်တွယ်ပြီး ဆွဲကြိုးလုယက် ထွက်ပြေးမှု ဖြစ်ပွားခဲ့ကြောင်း သြဂုတ် ၁၅ ရက်တွင် ရန်ကုန်တိုင်းဒေသကြီး ရဲတပ်ဖွဲ့မှ သိရသည်။
ဖြစ်စဉ်မှာ တောင်ဥက္ကလာပမြို့နယ်နေ မ....(၂၅ နှစ်)သည် သြဂုတ် ၁၄ ရက် ညနေ ၆ နာရီခန့်က ကမာရွတ်မြို့နယ်၊ လှည်းတန်းမှ ၎င်းနေထိုင်ရာ တောင်ဥက္ကလာပမြို့နယ်ရှိ အဆောင်တစ်ဆောင်သို့ ပြန်လာခဲ့ကြောင်း၊ ထိုသို့ ပြန်လာခဲ့ပြီး အဆောင်သို့ တောင်ဥက္ကလာပမြို့နယ် မြင်သာ ၄ လမ်းအတိုင်း လမ်းလျှောက်လာခဲ့ရာ အဆောင်အနီးအရောက်တွင် စက်ဘီးစီးလာသူ အမျိုးသားတစ်ဦးက ၎င်း၏အနီးသို့ ရောက်ရှိလာခဲ့ကြောင်း သိရသည်။
ယင်းသို့ရောက်ရှိလာပြီးနောက် အဆိုပါ အမျိုးသားက မ.... ၏ ရင်သားကို ညှစ်ကာ လည်ပင်းတွင် ဆွဲထားသည့် ရွှေနှင့်ပလက်တီနမ်ရော စပ်ထားသော ဆွဲကြိုးကို လုယက်ပြီး စက်ဘီးကိုနင်း၍ ထွက်ပြေးခဲ့ကြောင်း သိရသည်။
“စုံစမ်းဆောင်ရွက်တော့ ကျူးလွန်သူက အရင်ကလည်းခိုးမှုနဲ့ ထောင်ကျခဲ့ဖူးတဲ့လူလို့ သိရတယ်။ ခုကျူးလွန်သူကို ဖမ်းမိပါပြီ” ဟု ရန်ကုန်တိုင်းဒေသကြီးရဲတပ်ဖွဲ့မှ ရဲအရာရှိတစ်ဦးက ပြောကြားသည်။
ကျူးလွန်သူမှာ တောင်ဥက္ကလာပမြို့နယ် (၁၄/၁) ရပ်ကွက်တွင်နေထိုင်၍ စက်ချုပ်သည့် အလုပ်လုပ်ကိုင်သော ကိုကိုအောင် (၂၃ နှစ်) ဆိုသူဖြစ်ကြောင်း သိရပြီး ၎င်းကို သက်ဆိုင်ရာရဲစခန်းတွင် ဖမ်းဆီးစစ်ဆေးလျက်ရှိကာ ကိုကိုအောင်မှာ ၂၀၁၆ ခုနှစ်အတွင်းက တောင်ဥက္ကလာပမြို့နယ်အတွင်း ခိုးမှုကျူးလွန်သဖြင့် ထောင်ဒဏ်တစ်နှစ်နှင့် လေးလကျခံပြီး ပြန်လည်လွတ်မြောက်လာသူဖြစ်ကြောင်း ရန်ကုန်တိုင်းဒေသကြီးရဲတပ်ဖွဲ့မှ သိရသည်။
