၂၀၁၇-၂၀၁၈ ဘဏ္ဍာနှစ်တွင် မြန်မာနိုင်ငံအတွင်း နိုင်ငံခြားကုမ္ပဏီပေါင်း ၆,၀၀၀ ကျော်ရှိသည့်အနက် နိုင်ငံခြားကုမ္ပဏီ ၅,၀၀၀ ကျော်သည် အခွန်စည်းကြပ်စိစစ်မှု လာရောက်ခံယူခြင်းမရှိကြောင်း သြဂုတ် ၁၅ ရက်က အောင်ဘာလေသိန်းဆုခွန်ဌာနခွဲ အစည်းအဝေးခန်းမတွင် ပြုလုပ်သည့် အခွန်ဆိုင်ရာ ပညာပေးဆွေးနွေးပွဲ အခမ်းအနားမှ သိရသည်။
“စိစစ်မှုပြုလုပ်တဲ့အခါမှာ ကျွန်တော်တို့ ၂၀၁၇-၂၀၁၈ ဘဏ္ဍာနှစ်ကုန်တဲ့ထိအောင် နိုင်ငံခြားကုမ္ပဏီစုစုပေါင်း ၆,၀၀၀ ကျော် ရှိတဲ့အထဲက ၁,၀၀၀ ကျော်လောက်ပဲ ကျွန်တော်တို့နဲ့ လာရောက်ဆက်သွယ်ပြီးတော့ အခွန်စည်းကြပ်မှု စိစစ်မှုခံယူတယ်။ ကျန်တဲ့ ၅,၀၀၀ ကျော်လောက်က လာရောက် ဆက်သွယ်ခြင်းမရှိတာကို တွေ့ရပါတယ်” ဟု ပြည်တွင်းအခွန်ဦးစီးဌာန၊ အလယ်အလတ် အခွန်ထမ်းများဆိုင်ရာ အခွန်ရုံး (၂) မှ ညွှန်ကြားရေးမှူး ဦးထွန်းသန်းက ပြောကြားသည်။
ယင်းကဲ့သို့ အခွန်စည်းကြပ်မှုစိစစ်မှု ခံယူရန် ပျက်ကွက်နေသော နိုင်ငံခြားကုမ္ပဏီများကို ပြန်လည်စိစစ်မှုများ ပြုလုပ်ရာတွင် လာရောက်မဆက်သွယ်ရခြင်း အဓိက အကြောင်းသုံးချက်ကို တွေ့ရှိကြောင်း သိရသည်။
“ပထမအချက်က MIC မြန်မာနိုင်ငံ ရင်းနှီးမြှုပ်နှံမှုကော်မရှင်က အခွန်ကင်းလွတ်ခွင့်ပေးထားတဲ့ နိုင်ငံခြားကုမ္ပဏီများ၊ အခွန်ပေးဖို့မလိုဘူး။ အခွန်ရုံးသွားစရာမလိုဘူး ဆိုပြီးတော့ လာရောက်ဆက်သွယ်တာ မရှိတာကို တွေ့ရပါတယ်။ ကုမ္ပဏီတော့ ဖွဲ့ထားတယ်။ လုပ်ငန်းက အခုအချိန်အထိ မလုပ်နိုင်သေးဘူး ဝင်ငွေလည်း မရသေးဘူး မရသေးတဲ့အတွက်ကြောင့် ငါတို့ အခွန်ပေးဖို့လည်း မလိုဘူးဆိုပြီး လာရောက်မဆက်သွယ်တာ တွေ့ရပါတယ်။ နောက်ဆုံးအချက်ကတော့ စီးပွားရေးလုပ်ငန်းတွေလည်း လုပ်နေပါတယ်။ ဝင်ငွေတွေလည်း ရနေပါတယ်။ ဒါပေမဲ့ ငါတို့ကို DICA ကနေပြီးတော့ မှတ်ပုံတင်သက်တမ်း ငါးနှစ်တောင်ပေးထားတာပဲ။ အဲဒီတော့ ငါတို့ နှစ်တိုင်းသွားစရာမလိုဘူး။ နောက်ဆုံးသက်တမ်းကုန်တော့မှ ငါတို့သွားမယ်။ ငါးနှစ်ကြာမှ လာရောက်ဆက်သွယ်တဲ့ ကုမ္ပဏီတွေလည်း တွေ့ရပါတယ်” ဟု ဦးထွန်းသန်းက ပြောကြားသည်။
အဆိုပါ ကုမ္ပဏီများအနေဖြင့် တစ်နှစ် တစ်ကြိမ် အခွန်စည်းကြပ်မှု လာရောက်မခံယူခြင်းကြောင့် အခက်အခဲများ ဖြစ်ပေါ်လျက်ရှိကြောင်း သိရသည်။
“လုပ်ငန်းလည်းလုပ်တယ်၊ အခွန်ရှင်းလင်းဖို့လည်း မလာဘူးဆိုတဲ့ ကုမ္ပဏီတွေအတွက် အခက်အခဲ ရှိပါတယ်။ ငါးနှစ်သက်တမ်းပြည့်တဲ့အခါမှ လာတဲ့အတွက် ငါးနှစ်လုံးစာ စိစစ်ရတာတွေ ရှိပါတယ်” ဟု ဦးထွန်းသန်းက ပြောကြားသည်။
မြန်မာနိုင်ငံအတွင်း၌ လုပ်ငန်းဆောင်ရွက်လျက်ရှိသော နိုင်ငံခြားကုမ္ပဏီအားလုံးအတွက် အလယ်အလတ် အခွန်ထမ်းများဆိုင်ရာ အခွန်ရုံး (၂) တွင် စိစစ်ဆောင်ရွက်ပေးနေခြင်းဖြစ်ကြောင်း သိရသည်။
