နေပြည်တော်တွင် သြဂုတ် ၁၄ ရက်က ကျင်းပသည့် ပြည်သူ့လွှတ်တော် အစည်းအဝေးအပြီး လွှတ်တော်ကိုယ်စားလှယ်များအား တွေ့ရစဉ်
တပ်မတော်အစိုးရကာလကို ပညာရေး အမှောင်ခေတ်ဟု သုံးနှုန်းခဲ့ခြင်းအပေါ် ကန့်ကွက်ကြောင်းနှင့် မှတ်တမ်းမှ ဖြုတ်ချပေးရန် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ မင်းကင်းမဲဆန္ဒနယ် ပြည်သူ့လွှတ်တော် ကိုယ်စားလှယ် ဦးမောင်မြင့်က ပြည်သူ့လွှတ်တော်သို့ တင်ပြခဲ့သည်။
နေပြည်တော်၌ သြဂုတ် ၁၄ ရက်က ပြုလုပ်သော ဒုတိယအကြိမ် ပြည်သူ့လွှတ်တော် နဝမပုံမှန်အစည်းအဝေး နဝမနေ့တွင် တောင်တွင်းကြီးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမင်းသိန်းက အခြေခံ ပညာရေးကဏ္ဍတွင် အမျိုးသားဆရာဦးရေ သိသာစွာ ကျဆင်းနေသည့်အတွက် အမျိုးသားဆရာ ဦးရေတိုးချဲ့ခန့်ထားရန် သင့်လျော်သော အစီအစဉ်များ ဆောင်ရွက်ထား ခြင်း ရှိ/မရှိ မေးမြန်းရာတွင် စကားလုံး အသုံးအနှုန်းနှင့် ပတ်သက်၍ ဦးမောင်မြင့်က အထက်ပါအတိုင်း ကန့်ကွက်ကြောင်း တင်ပြခဲ့ခြင်း ဖြစ်သည်။
“တင်ပြချက်နဲ့ ပတ်သက်ပြီးတော့ မဆီလျော်တဲ့ အကြောင်းပြချက်တွေ ခိုင်လုံအထောက်အထားမပါတဲ့ ယူဆချက်တွေ မသင့်လျော်တဲ့ အသုံးအနှုန်းတွေ ဂုဏ်သရေကို ထိခိုက်စေတဲ့ ဖော်ပြချက်တွေ မပါရှိတဲ့ မေးခွန်းဖြစ်ရမယ်ဆိုတဲ့ အချက်တွေအရ စောစောကမေးမြန်းသွားတဲ့ တောင်တွင်းကြီးမဲဆန္ဒနယ်မှ ဦးမင်းသိန်းမေးသွားတဲ့ အထဲမှာ နှုတ်ချော်ပြီး တပ်မတော်အစိုးရ ကာလကို ပညာရေးအမှောင်ခေတ်ဆိုပြီး ပြောသွားတာကို ကျွန်တော်ကန့်ကွက်တာပါ။ ဒီလိုမဆီလျော်တဲ့ စကားလုံးအသုံးအနှုန်း၊ ပြီးခဲ့တဲ့ အစိုးရအပေါ် ပြက်ရယ်ပြုတဲ့ အသုံးအနှုန်း ရှုတ်ချတဲ့အသုံးအနှုန်းတွေကို မှတ်တမ်းတင်ထားမယ်ဆိုရင် လွှတ်တော်လည်း မကောင်းပါဘူး။ ဒါကြောင့် ပညာရေး အမှောင်ခေတ်ဆိုတဲ့ အသုံးအနှုန်းကို ဖြုတ်ချပေးဖို့အတွက် တင်ပြအပ်ပါတယ်” ဟု ဦးမောင်မြင့်က ပြောကြားသည်။
ထိုသို့ ပြည်ခိုင်ဖြိုးပါတီ၏ ပြည်သူ့လွှတ်တော်ကိုယ်စားလှယ် ဦးမောင်မြင့်၏ တင်ပြချက်နှင့်ပတ်သက်၍ ပြည်သူ့လွှတ် တော်ဥက္ကဋ္ဌ ဦးတီခွန်မြတ်က ပညာရေး အမှောင်ဆိုသည့် စကားလုံးကို လွှတ်တော်မှတ်တမ်းမှ ပယ်ဖျက်ရန် ဆုံးဖြတ်ကြောင်း ပြောကြားခဲ့သည်။
ကျောင်းဆရာဦးရေ မသိမသာ လျော့ပါးလာခြင်းသည် ၁၉၈၈ ခုနှစ် နောက်ပိုင်းကာလတွင် ပိုမိုသိသာလာပြီး ပညာရေး အမှောင်ခေတ်ကြီးတွင် ကျောင်းဆရာလုပ်ရခြင်းကိုစိတ်နာ၍ ပညာရေးလောကကို ကျောခိုင်းထွက်သွားခဲ့ကြသူများစွာ ရှိခဲ့ဖူးကြောင်း၊ ယနေ့ အခြေအနေတွင်လည်း ပညာရေးကောလိပ် ပညာရေးတက္ကသိုလ်များကို လျှောက်ထားသင်ယူကြသည့် ကျောင်းသားသည် ရှားပါးကြောင်း တောင်တွင်းကြီးမဲဆန္ဒနယ်မှ ဦးမင်းသိန်းက မေးခွန်းမေးရာတွင် ထည့်သွင်းပြောကြားခဲ့သည်။
“၁၉၈၈ နောက်ပိုင်းမှာ ကျောင်းဆရာတွေက တက္ကသိုလ်တွေက ထွက်ကြတာ အများကြီးပဲ။ အခြေခံပညာကဏ္ဍာမှာလည်း ထွက်ကြတာ အများကြီးပဲ။ အခုလည်း လုပ်ချင်တဲ့သူတွေကရှားနေတာ။ ဒါကြောင့် ပညာရေး အမှောင်ခေတ်ဆိုတဲ့ စကားလုံးကို သုံးလိုက်တာ။ အဲဒီမှာ အမှောင်ခေတ်ဆိုတဲ့ စကားလုံးကို မကြိုက်ပါဘူး မသုံးသင့်ပါဘူးဆိုပြီး ထပြီးကန့်ကွက်တာပါ။ အမှောင်ခေတ်ရဲ့ သဘောက လွတ်လပ်စွာ ပညာသင်ကြားခွင့် ဆုံးရှုံးတာလည်း အမှောင်ခေတ်ပဲ။ စစ်မှန်တဲ့ ပညာသင်ကြားခွင့် ဆုံးရှုံးတာလည်း အမှောင်ခေတ်ပဲ။ ပညာရေး အခွင့်အလမ်းကင်းမဲ့တာလည်း အမှောင်ခေတ်ပဲ။ ပညာရေး အသုံးစရိတ်နည်းပါးတာလည်း အမှောင်ခေတ်ပဲ။ ဒါကို ရည်ရွယ်တာ။ သို့သော်လည်း ၈၈ နောက်ပိုင်းဆိုတဲ့ စကားလုံးကို သုံးလိုက်တော့ ထကန့်ကွက်တာ။ အဲဒါပါပဲ” ဟု ဦးမင်းသိန်းက ဆိုသည်။
ပြည်သူ့လွှတ်တော် ဥက္ကဋ္ဌ ဦးတီခွန်မြတ်က မေးခွန်းရှင်အား သတိပေးပြောဆိုခြင်း ပြုလုပ်ခဲ့ပြီးဆောင်ရန်၊ ရှောင်ရန်ကိစ္စရပ်များနှင့် လိုက်နာရမည့် အချက်များကို ပြောကြားခဲ့သည်။
