နိုင်ငံတော်၏ ပြည်ပကြွေးမြီ လက်ကျန်အခြေအနေအရ ကြွေးမြီခံနိုင်ရည်ရှိမှု အတိုင်းအတာအတွင်း ရှိသော်လည်း ချေးငွေအလွန်များပြားနေပြီးနောင်တွင် ငွေချေးယူလိုမှုများရှိပါက အခက်အခဲ ရှိလာမည်ကို စိုးရိမ်ပူပန်မိကြောင်း တပ်မတော်သားကိုယ်စားလှယ် ပြောကြား

နိုင်ငံတော်၏ ပြည်ပကြွေးမြီ လက်ကျန်အခြေအနေအရ ကြွေးမြီခံနိုင်ရည်ရှိမှု အတိုင်းအတာအတွင်း ရှိသော်လည်း ချေးငွေအလွန်များပြားနေပြီးနောင်တွင် ငွေချေးယူလိုမှုများရှိပါက အခက်အခဲ ရှိလာမည်ကို စိုးရိမ်ပူပန်မိကြောင်း တပ်မတော်သားကိုယ်စားလှယ် ပြောကြား
Published 14 August 2018

သြဂုတ် ၁၃ ရက်က ကျင်းပသည့် ပြည်ထောင်စုလွှတ်တော်အစည်းအဝေး ခေတ္တရပ်နားနေချိန်တွင် လွှတ်တော်ကိုယ်စားလှယ်များအား တွေ့ရစဉ်

နိုင်ငံတော်၏ ပြည်ပကြွေးမြီလက်ကျန် အခြေအနေအရ ကြွေးမြီခံနိုင်ရည်ရှိမှု အတိုင်းအတာအတွင်း ရှိသော်လည်း ချေးငွေများ အလွန်များပြားနေပြီး နောင်တွင် ငွေချေးယူလိုမှုများရှိပါက အခက်အခဲ ရှိလာမည်ကို စိုးရိမ်ပူပန်မိကြောင်း တပ်မတော်သား ပြည်သူ့လွှတ်တော် ကိုယ်စားလှယ် ဗိုလ်မှူးဇော်ဝင်းနိုင်က ပြောကြားသည်။

နိုင်ငံတော်သမ္မတထံမှ ပေးပို့ထားသော စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ စီမံကိန်းလုပ်ငန်းများ ဆောင်ရွက်ရန်အတွက် အာရှဖွံ့ဖြိုးရေးဘဏ်ထံမှ အမေရိကန်ဒေါ်လာ ၄၀ ဒသမ ၅ သန်း ချေးယူရန် ကိစ္စနှင့်စပ်လျဉ်း၍ နေပြည်တော်၌ သြဂုတ် ၁၃ ရက်က ပြုလုပ်သော ဒုတိယအကြိမ် ပြည်ထောင်စုလွှတ်တော် နဝမပုံမှန်အစည်းအဝေး အဋ္ဌမနေ့တွင် တပ်မတော်သား လွှတ်တော်ကိုယ်စားလှယ်က ဆွေးနွေးရာတွင် အထက်ပါအတိုင်း ပြောကြားခဲ့ခြင်းဖြစ်သည်။

“နိုင်ငံတော်ရဲ့ ပြည်ပကြွေးမြီလက်ကျန် အခြေအနေအရ ၂၀၁၈ ခုနှစ် မတ် ၃၁ ရက်အထိ ပြည်ပကြွေးမြီနဲ့ GDP အချိုးဟာ ၁၅ ဒသမ ၄၅ ရာခိုင်နှုန်းခန့်ဖြစ်သဖြင့် ကြွေးမြီခံနိုင်ရည်ရှိမှု အတိုင်းအတာအတွင်း ရှိကြောင်းကိုလည်း တင်ပြခဲ့ပါတယ်။ သို့သော်လည်း ၂၀၁၈ ခုနှစ် သြဂုတ် ၁ ရက်မှာ ကျင်းပပြုလုပ်တဲ့ ပြည်ထောင်စုလွှတ်တော်နာယက တာဝန်လွဲှပြောင်း၊ လက်ခံတဲ့အခမ်းအနားမှာ ပြည်ထောင်စုလွှတ်တော် နာယကဟောင်းရဲ့ မိန့်ခွန်းမှာပါရှိတာက ပြည်ထောင်စုလွှတ်တော် အနေဖြင့် လပေါင်း ၃၀ အတွင်း ပြည်တွင်း၊ ပြည်ပချေးငွေ ၄၀ ခုအား သဘောတူညီခဲ့ကြောင်း ပြောကြားသွားခဲ့ပါတယ်။ ဒါကြောင့် ချေးငွေတွေ အလွန်များပြားနေပြီး နောင်မှာ ယခုထက် ပိုအရေးကြီးတဲ့ ငွေချေးယူလိုမှုများရှိပါက အခက်အခဲ ရှိလာမှာကို စိုးရိမ်ပူပန်မိပါတယ်” ဟု ဗိုလ်မှူးဇော်ဝင်းနိုင်က ပြောကြားသည်။

ထို့ပြင် စီမံကိန်းလုပ်ငန်းများ အကောင်အထည်ဖော်ရာတွင် အောင်မြင်ထိရောက်အောင် ဆောင်ရွက်သွားရန်၊ စီမံကိန်းလုပ်ငန်းများ ပွင့်လင်းမြင်သာမှု ရှိရန်နှင့် Oversight Team များ ဖွဲ့စည်းပြီး စောင့်ကြည့်သွားရန် လိုအပ်မည်ဖြစ်ကြောင်းနှင့် စိုက်ပျိုးစီးပွားရေးကို အဓိကထားနေရသော မြန်မာနိုင်ငံအနေဖြင့် ပြည်သူလူထုအများစုကို အကျိုးပြုမည့် စီမံကိန်းဖြစ်သည့်အတွက် အောင်မြင်အောင် ဆောင်ရွက်နိုင်မည်ဆိုပါက ချေးငွေနှင့် ပတ်သက်ပြီး ကန့်ကွက်ရန်မရှိကြောင်း တပ်မတော်သား ပြည်သူ့လွှတ်တော်ကိုယ်စားလှယ်က ပြောကြားသည်။

မြန်မာနိုင်ငံ၏ ပြည်ပချေးငွေသည် စုစုပေါင်း အမေရိကန်ဒေါ်လာ ၉ ဒသမ ၅၇၁ ဘီလျံဖြစ်ပြီး အာရှဖွံ့ဖြိုးရေးဘဏ်မှ ချေးငွေသည် အမေရိကန်ဒေါ်လာ ၀ ဒသမ ၅၄၆ ဘီလျံရှိကာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ချေးယူငွေသည် အမေရိကန်ဒေါ်လာ ၀ ဒသမ ၇၁၄ ဘီလျံဖြစ်၍ ဝန်ကြီးဌာနများတွင် တတိယအများဆုံး ချေးယူထားသည်ကို တွေ့ရကြောင်း၊ ယခုကဲ့သို့ ချေးငွေများကို ချေးယူသုံးစွဲသည့်နေရာတွင် တိုင်းပြည်အတွက် အမှန်တကယ် အကျိုးရှိရန်နှင့် တိုင်းပြည်စီးပွားဖွံ့ဖြိုးတိုးတက်ရန် လိုအပ်ကြောင်း ပွင့်ဖြူမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးထွန်းထွန်းက ပြောကြားသည်။

“သုံးစွဲတဲ့နေရာမှာလည်း အကျိုးရှိရှိ ထိထိရောက်ရောက် အလေအလွင့်မရှိအောင် မဖိတ်မစင်အောင် သုံးစွဲဖို့ လိုအပ်ပါတယ်။ ချေးငွေတွေကို ၂၀၁၇-၂၀၁၈ ဘဏ္ဍာနှစ်ကစပြီး ပြန်ဆပ်နေရပါပြီ။ ချေးငွေတွေကို ဘယ်လိုဆပ်မယ်၊ အတိုးတွေကို ဘယ်လိုရအောင် ရှာမယ်ဆိုတာကိုလည်း ရေရှည်ထည့်တွက် စဉ်းစားသင့်ပါတယ်” ဟု ဦးထွန်းထွန်းက ပြောကြားသည်။

နှစ်စဉ်ပြည်ပချေးငွေများ အခြေအနေများနှင့် ပတ်သက်၍ ပြည်ထောင်စုလွှတ်တော် ပထမသက်တမ်းငါးနှစ်ကာလနှင့် ဒုတိယသက်တမ်း ၂၀၁၇ ခုနှစ် ဇူလိုင် ၃၁ ရက်အထိ ပြည်ထောင်စုလွှတ်တော်၏ သဘောတူညီချက် ရယူထားသော ပြည်ပချေးငွေများစာရင်းကို ၂၀၁၈ ခုနှစ် မေလတွင် ပြည်ထောင်စု လွှတ်တော်သို့ ပထမဆုံးအကြိမ် တင်ပြခဲ့သည်မှာ ကောင်းမွန်သော တင်ပြချက်ဖြစ်ပြီး တင်ပြချက်များတွင် လုပ်ဆောင်သည့် အကြောင်းအရာ ခေါင်းစဉ်ကိန်းဂဏန်းများသာ ဖော်ပြသည်ကို တွေ့မြင်ရကာ စီမံကိန်းအောင်မြင်ခြင်း (သို့) မအောင်မြင်ခြင်းများအတွက် အားသာချက်၊ အားနည်းချက်များကို ဖော်ပြပေးသင့်ကြောင်း ချောက်မဲဆန္ဒနယ်မှ ဦးဘိုကြီးက ပြောကြားသည်။

“မအောင်မြင်သည့် အချက်ကိုလည်းကောင်း၊ ဝန်ထမ်းတွေရဲ့ အားနည်းချက်တွေရှိရင် ဖော်ထုတ် အရေးယူခြင်းကိုလည်းကောင်း၊ ပွင့်လင်းမြင်သာစွာ ရှင်းလင်းဖော်ပြသင့်ပါတယ်။ ဒီလိုအကြုံပြုတင်ပြနေရတာဟာ ချေးငွေယူပြီး အကြွေးတင်၍ အချိန်တန်ရင် ပြန်ဆပ်ရုံသာမဟုတ်ဘဲ ချေးငွေတွေ ချေးယူခဲ့ခြင်းမှာ တိုင်းပြည်အတွက် မည်သို့အကျိုးသက်ရောက်သည်ကို နိုင်ငံသူ၊ နိုင်ငံသားတွေ သိမြင်နိုင်စေရန် ဖြစ်ပါတယ်။ သို့မှသာ အကြွေးတင်ပေမယ့် တိုင်းပြည်အတွက် အကျိုး ရှိ၊ မရှိကို မြင်သာစေပါမယ်” ဟု ဦးဘိုကြီးက ပြောကြားသည်။

Most Recent