ဖိလစ်ပိုင်၏ သုံးပုံတစ်ပုံရှိသော နိုင်ငံတောင်ပိုင်းတွင် ဖိလစ်ပိုင်သမ္မတ ဒူတာတေး၏ စစ်အုပ်ချုပ်ရေးပြဋ္ဌာန်းမှုကို တရားရုံးချုပ်က ဇူလိုင် ၄ ရက်တွင် အတည်ပြုထောက်ခံပေးခဲ့သည်။ ဒူတာတေးကမူ IS တို့က ထောက်ပံ့ပေးထားသည့် စစ်သွေးကြွများအား နှိမ်နင်းရန်အတွက် စစ်အုပ်ချုပ်ရေးမှာ မဖြစ်မနေလိုအပ်သည်ဟု ဆိုခဲ့သည်။

IS အလံကိုင်ဆောင်ထားသော သေနတ်သမား ရာပေါင်းများစွာသည် မေ ၂၃ ရက်က မာရာဝီမြို့၏နေရာအချို့ကို သိမ်းပိုက်ကာ စစ်တပ်နှင့် တိုက်ပွဲများဖြစ်ပွားနေစဉ် ဒူတာတေးသည် မာရာဝီမြို့ရှိရာ မင်ဒါနာအိုဒေသတွင် စစ်အုပ်ချုပ်ရေးကြေညာခဲ့ခြင်းဖြစ်သည်။

အတိုက်အခံအမတ်များက ဒူတာတေး၏ စစ်အုပ်ချုပ်ရေးပြဋ္ဌာန်းမှုသည် လုံလောက်သော အခြေခံဖြစ်ရပ်မှန်မရှိဟုဆိုပြီး ပယ်ချပေးရန် တရားရုံးချုပ်သို့လျှောက်ထားခဲ့ကြသည်။ ထိုလျှောက်ထားမှုကို တရားရုံးချုပ်တွင် ကန့်ကွက်မဲအများစုဖြင့် ပယ်ချလိုက်ကြောင်း တရားရုံးချုပ်ပြောခွင့်ရပုဂ္ဂိုလ် သီအိုဒိုရီတီက သတင်းထောက်များအား ဇူလိုင် ၄ ရက်တွင် ပြောကြားခဲ့သည်။ သို့သော်ယင်းကဲ့သို့ ပယ်ချရသည့် အကြောင်းရင်းကို မထုတ်ဖော်ခဲ့ပေ။

စစ်သွေးကြွများသည် လက်ရှိအချိန်အထိ မာရာဝီမြို့၏နေရာတချို့ကို သိမ်းပိုက်ထားဆဲဖြစ်ပြီး သေဆုံးသူ ၄၆၀ ရှိနေပြီဖြစ်ကာ နေရပ်ရွှေ့ပြောင်း ထွက်ပြေးရသူ ၄၀၀,၀၀၀ နီးပါးရှိနေပြီဖြစ်သည်။