<

မြန်မာနိုင်ငံ၌ ရေအားလျှပ်စစ်စက်ရုံ တည်ဆောက်ပြီး ၂၇ ရုံရှိကာ တည်ဆောက်ဆဲစီမံကိန်း ရှစ်ခုနှင့် ထပ်မံတည်ဆောက်မည့် စီမံကိန်းများအတွက် တိုင်းထွာတွက်ချက်၍ ဖြစ်မြောက်နိုင်စွမ်း အစီရင်ခံစာများ ပြုစုလျက်ရှိကြောင်း ဒုတိယ၀န်ကြီး ပြောကြား

ရွှေကျင် ရေအားလျှပ်စစ်စက်ရုံ တစ်နေရာကို တွေ့ရစဉ်

မြန်မာနိုင်ငံတွင် ရေအားလျှပ်စစ်နှင့် ပတ်သက်၍ တည်ဆောက်ပြီး စက်ရုံ ၂၇ ရုံရှိပြီး တည်ဆောက်ဆဲ စီမံကိန်း ရှစ်ခုနှင့် ထပ်မံတည်ဆောက်မည့် စီမံကိန်းများအတွက် ကွင်းဆင်းတိုင်းထွာ တွက်ချက်၍ ဖြစ်မြောက်နိုင်စွမ်း အစီရင်ခံစာများ ပြုစုလျက်ရှိကြောင်း လျှပ်စစ်နှင့် စွမ်းအင်ဝန်ကြီးဌာန ဒုတိယ၀န်ကြီး  ဒေါက်တာထွန်းနိုင်က ပြောကြားသည်။

နေပြည်တော်၌ သြဂုတ် ၁၀ ရက်က ပြုလုပ်သော ဒုတိယအကြိမ် ပြည်သူ့လွှတ်တော် န၀မပုံမှန် အစည်းအဝေး အဋ္ဌမနေ့တွင် ကျောက်တံတား မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးနေမျိုးထက်၏ Base Load ဖြစ်သော ရေအားလျှပ်စစ် စီမံကိန်းများကို လျှပ်စစ်လိုအပ်လျက်ရှိသော မြန်မာနိုင်ငံအတွင်းတွင် လျှပ်စစ်ဓာတ်အား ထုတ်လုပ်နိုင်ရန် မည်ကဲ့သို့ စီစဉ်ဆောင်ရွက်နေသည်ကို သိလိုခြင်းနှင့် စပ်လျဉ်းသည့်မေးခွန်းကို ဒုဝန်ကြီးက ဖြေကြားရာတွင် အထက်ပါအတိုင်း ပြောကြားခဲ့ခြင်း ဖြစ်သည်။

“မြန်မာနိုင်ငံမှာ လက်ရှိတည်ဆောက်ပြီး ရေအားလျှပ်စစ်စက်ရုံ ၂၇ ရုံရှိပြီး စက်တပ်ဆင်အားမှာ ၂၈၀၀ မဂ္ဂါဝပ်ဖြစ်တယ်။ ရေအားစက်ရုံ ၂၇ ရုံအနက် Intermediate Load Generation အဖြစ် သုံးသင့်တဲ့ Reservoir type ရေအားက ၂၁ ရုံ၊ စက်တပ်ဆင်အင်အား ၂၁၀၇ မဂ္ဂါဝပ်ရှိပြီး Base Load Generation အဖြစ် သုံးသင့်တဲ့ Run-off-river type ရေအားက ခြောက်ရုံ၊ စက်တပ်ဆင်အင်အားက ၆၃၀ မဂ္ဂါဝပ်သာ ရှိပါတယ်။ နောင်မှာ ထပ်မံတည်ဆောက်နိုင်မယ့် ရေအားလျှပ်စစ် စီမံကိန်းတွေကို နိုင်ငံဘဏ္ဍာ ရန်ပုံငွေနဲ့ဖြစ်စေ၊ ပြည်တွင်း၊ ပြည်ပ ရင်းနှီးမြှုပ်နှံမှုနဲ့ဖြစ်စေ ဆောင်ရွက်နိုင်ဖို့ ကွင်းဆင်းတိုင်းထွာ တွက်ချက်ပြီး ဖြစ်မြောက်နိုင်စွမ်း အစီရင်ခံစာတွေ ပြုစုလျက်ရှိပါတယ်” ဟု ဒေါက်တာထွန်းနိုင်က ပြောကြားသည်။

လက်ရှိကာလတွင် စက်တပ်ဆင်အင်အား ၁၃၅၈ ဒသမ ၆ မဂ္ဂါဝပ်ရှိ တည်ဆောက်ဆဲ ရေအားလျှပ်စစ်စီမံကိန်း ရှစ်ခုမှာ အထက်ကျိုင်းတောင်း ၅၁ မဂ္ဂါဝပ် (Reservoir type)၊ အထက်ရဲရွာ ၂၈၀ မဂ္ဂါဝပ် (Reservoir type)၊ သူဌေး ၁၁၁ မဂ္ဂါဝပ် (Reservoir type)၊ ရွေလီ (၃) ၆၇၁ မဂ္ဂါဝပ် (Reservoir type)၊ အလယ်ပေါင်းလောင်း ၁၅၂ မဂ္ဂါဝပ် (Reservoir type)၊ အထက်နမ့်ထွမ် ၃ ဒသမ ၂ မဂ္ဂါဝပ် (Reservoir type)၊ အထက်ဘီလူးချောင်း ၃၀ ဒသမ ၄ မဂ္ဂါဝပ် (Reservoir type) နှင့် ဒီဒုတ် ၆၀ မဂ္ဂါဝပ် (Low Head Dam) တို့ဖြစ်ကြောင်း သိရသည်။

ထို့ပြင် ထပ်မံတည်ဆောက်မည့် စီမံကိန်းများနှင့် ပတ်သက်၍ စီမံကိန်းဒေသ၏ မြေပြင်အနေအထား၊ ဘူမိဗေဒ အခြေအနေ၊ မိုးရေချိန် ရေစီးဝင်မှုနှုန်း၊ ရေသိုလှောင်နိုင်မှု အလားအလာ၊ ထုတ်လုပ်နိုင်မည့် လျှပ်စစ်ပမာဏ၊ ရေလွှမ်းဧရိယာ ကျရောက်သွားနိုင်မည့် သစ်တော၊ ကျေးရွာ၊ စိုက်ပျိုးမြေ၊ သယံဇာတ လုပ်ကွက် အစရှိသည်တို့ကို စူးစမ်းလေ့လာ တွက်ချက်မှုများအား အနည်းဆုံး သုံးနှစ်ခန့် အချိန်ယူ ဆောင်ရွက်ရပြီး တည်ဆောက်ရေး ကာလသည် ၄ နှစ်မှ ၁၀ နှစ်အထိ အချိန်ယူ ဆောင်ရွက်ရကြောင်း ဒုဝန်ကြီးက ပြောကြားသည်။

 

August 12, 2018














Copy Protected by Chetan's WP-Copyprotect.