မြန်မာနိုင်ငံတွင် မူးယစ်ဆေးဝါး သုံးစွဲမှုကြောင့် အရွယ်မတိုင်မီ သေဆုံးသူ တစ်နှစ်လျှင် ၁၉၀၀၀၀ ကျော်ရှိပြီး မူးယစ်ဆေးဝါးနှင့် ဆက်နွှယ်သည့် ရောဂါများ ကူးစက်မှုနှုန်း မြင့်တက်နေ

မြန်မာနိုင်ငံတွင် မူးယစ်ဆေးဝါး သုံးစွဲမှုကြောင့် အရွယ်မတိုင်မီ သေဆုံးသူ တစ်နှစ်လျှင် ၁၉၀၀၀၀ ကျော်ရှိပြီး မူးယစ်ဆေးဝါးနှင့် ဆက်နွှယ်သည့် ရောဂါများ ကူးစက်မှုနှုန်း မြင့်တက်နေ
Published 12 August 2018

အပြည်ပြည်ဆိုင်ရာ မူးယစ်ဆေးဝါး အလွဲသုံးစားမှုနှင့် တရားမဝင်ရောင်းဝယ်မှု တိုက်ဖျက်ရေးနေ့တွင် မူးယစ်ဆေးဝါးများကို မီးရှို့ဖျက်ဆီးနေစဉ် (ဓာတ်ပုံ - အောင်မျိုးသန့်)

မူးယစ်ဆေးဝါးသုံးစွဲမှုကြောင့် အရွယ်မတိုင်မီ သေဆုံးသူပေါင်း ၁၉၀၀၀၀ ကျော်ရှိပြီး မူးယစ်ဆေးဝါးနှင့် ဆက်နွှယ်သည့် အိပ်ချ်အိုင်ဗွီ၊ အသည်းရောင်အသားဝါ၊ တီဘီရောဂါများ ကူးစက်မှုနှုန်း မြင့်တက်နေကြောင်း ၂၀၁၇ခုနှစ် ကမ္ဘာ့မူးယစ်ဆေးဝါး အစီရင်ခံစာအရ သိရသည်။

မြန်မာနိုင်ငံသည် ပထဝီအနေအထားအရ မူးယစ်ဆေးဝါးပြဿနာကို ရင်ဆိုင်နေရသည့်အပြင် ဝေးလံခေါင်ဖျားပြီး ဖွံ့ဖြိုးမှုနောက်ကျသည့် ဒေသများတွင် ဘိန်းစိုက်ပျိုးမှု ပြဿနာ၊ ဘိန်းဖြူနှင့် စိတ်ကြွဆေးဝါး ထုတ်လုပ်မှုပြဿနာ၊ သုံးစွဲမှု ပြဿနာများကိုလည်း ရင်ဆိုင်နေရကြောင်း၊ မူးယစ်ဆေးစွဲသူများ အတွက် ကုသရေးလုပ်ငန်းများ ဆောင်ရွက်ပေးနိုင်ရန် မူးယစ်ဆေးစွဲ ကုသရေး ဌာနကြီး ၂၆ ခုနှင့် ဌာနငယ် ၄၇ ခု တို့ကို ဖွင့် လှစ်၍ မူးယစ်ဆေးဝါးဆိုင်ရာ ကုသရေးလုပ်ငန်းများကို ဆောင်ရွက်လျက်ရှိပြီး မက်သာဒုန်း အစားထိုး တိုက်ကျွေးမှု အစီအစဉ်အရ မက်သာဒုန်း တိုက်ကျွေးသည့်ဌာန ၅၁ ခုကိုလည်း မူးယစ်ဆေးဝါး သုံးစွဲမှုများသည့် မြို့နယ်များတွင် ဖွင့်လှစ်လုပ်ဆောင် ပေးလျက်ရှိကြောင်း သိရသည်။

ဆေးစွဲလူနာများအတွက် တစ် နေရာတည်းတွင် ကုသရေးဝန်ဆောင်မှုအားလုံး ရရှိစေရန် ပြည်သူလူထု အခြေပြု One Stop Service လုပ်ငန်းများနှင့် ပြည်သူလူထု ဆေးကုသရေး ဝန်ဆောင်မှုပေးခြင်း အစီအစဉ်များကိုလည်း ဆောင်ရွက်ပေးလျက်ရှိကြောင်းနှင့် မူးယစ်ဆေးဝါး အကြောတွင်း ထိုးသွင်းခြင်းကြောင့် ကူးစက်တတ်သော အိပ်ချ်အိုင်ဗွီ၊ အသည်းရောင်အသားဝါ ရောဂါပိုး (ဘီ၊ စီ)နှင့် သွေးမှတစ်ဆင့် ကူးစက်တတ်သော ရောဂါများ အန္တရာယ်လျှော့ချရေး လုပ်ငန်းများကိုလည်း ပူးပေါင်းဆောင်ရွက် လျက်ရှိကြောင်းလည်း သိရသည်။

အဆိုပါ အစီရင်ခံစာအရ ကမ္ဘာ့လူဦးရေ၏ ငါးရာခိုင်နှုန်းသည် တစ်နှစ်အတွင်း မူးယစ်ဆေးဝါး အနည်းဆုံး တစ်ကြိမ် သုံးစွဲမှုရှိပြီး ကမ္ဘာ့လူဦးရေ ၂၅၅ သန်းရှိသည့် အနက် ၂၉ ဒသမ ၅ သန်းသည် မူးယစ်ဆေးဝါး ကုသမှုခံယူရန် လိုအပ်နေသူများဖြစ်ပြီး ၁၂ သန်းသည် မူးယစ်ဆေးဝါး အကြောတွင်း ထိုးသွင်းသူများ ဖြစ်ကြောင်း၊ တစ်နှစ်ထက်တစ်နှစ် မူးယစ်ဆေးလွန် သေဆုံးမှုများ၊ မူးယစ်ဆေးစွဲမှုကြောင့် ကူးစက်ခံရသော အိပ်ချ်အိုင်ဗွီရောဂါ၊ အသည်းရောင်အသားဝါ ဘီနှင့်စီ၊ တီဘီရောဂါများ ဖြစ်ပွားမှု မြင့်တက်လာကြောင်းနှင့် မူးယစ်ဆေးဝါး ထုတ်လုပ်မှုမှာ ဘိန်းဖြူ၊ ဆေးခြောက်၊ ကိုကင်းနှင့် အဖက်တမင်း စိတ်ကြွရူးသွပ် ဆေးပြားများအပြင် စိတ်ပြောင်းဆေးဝါး သစ်ထုတ်လုပ်မှုများကိုပါ တွေ့ရှိလာရကြောင်းနှင့် ၂၀၁၂ ခုနှစ်တွင် စိတ်ပြောင်းဆေးဝါးသစ် အမျိုးပေါင်း၂၆၀ ခန့် တွေ့ရှိခဲ့သော်လည်း ၂၀၁၇ ခုနှစ်အတွင်း အမျိုးပေါင်း ၆၃၀ မျိုးအထိ မြင့်တက်လာကြောင်း ဖော်ပြထားသည်။

မြန်မာနိုင်ငံတွင် ဓာတုပစ္စည်းမှတစ်ဆင့် ထုတ်လုပ်သည့် စိတ်ကြွဆေးပြား ပြဿနာသည် ၁၉၉၆ ခုနှစ် မှစပြီး ပျံ့နှံ့လာခဲ့ကြောင်းနှင့် အစပျိုးဓာတုပစ္စည်းများ နယ်စပ်များမှတစ်ဆင့် ဝင်ရောက်လာခြင်းကို ထိန်းချုပ်ရန်ခက်ခဲခြင်း၊ စိတ်ကြွဆေးပြားကို လွယ်ကူစွာ ထုတ်လုပ်နိုင်ခြင်း၊ နယ်မြေအခြေအနေ ကန့်သတ်ချက်ရှိခြင်းများကို အခွင့်ကောင်းယူပြီး မြန်မာနိုင်ငံ၏ နယ်စပ်ဒေသအချို့တွင် စိတ်ကြွဆေးပြားများ ထုတ်လုပ်လာခဲ့ခြင်းများကြောင့် စိတ်ကြွဆေးပြားများ လူငယ်ထုအတွင်း သုံးစွဲမှု မြင့်တက်လျက်ရှိကြောင်း သိရသည်။

မြန်မာနိုင်ငံ၏ မူးယစ်ဆေးဝါး အခြေအနေမှာ ဘိန်းစိုက်ပျိုးမှုအပြင် စိတ်ကြွဆေးပြား ထုတ်လုပ်မှု၊ သုံးစွဲမှု စသည့်စိန်ခေါ်မှုများနှင့် ထပ်မံရင်ဆိုင် နေရခြင်းကြောင့် ၂၀၁၅ ခုနှစ် အာဆီယံဒေသ မူးယစ်ဆေးဝါး ကင်းစင်ရေး ရည်မှန်းချက်၊ ၂၀၁၅ ခုနှစ်အလွန် မူးယစ်ဆေးဝါး လျှော့ချရေး လုပ်ငန်းစဉ်များနှင့်အညီ စတုတ္ထငါးနှစ် စီမံကိန်းကို ၂၀၁၄-၂၀၁၅ မှ ၂၀၁၈-၂၀၁၉ ခုနှစ်အထိ ထပ်မံတိုးမြှင့်ပြီး ထုတ်လုပ်မှု  ပပျောက်ရေးနှင့် သုံးစွဲမှု ပပျောက်ရေးတို့ကို ဆောင်ရွက်လျက်ရှိကြောင်း သိရသည်။

 

Most Read

Most Recent