ရန်ကုန်တိုင်းဒေသကြီးအတွင်း နှစ်စဉ်လျှပ်စစ်ဓာတ်အား လိုအပ်ချက် ၁၅ ရာခိုင်နှုန်း တိုးတက်နေသဖြင့် ဓာတ်အားလိုအပ်ချက် ဖြည့်ဆည်းနိုင်ရန်အတွက် ဓာတ်အားထုတ်လုပ်မှု အပိုင်းနှင့် ဖြန့်ဖြူးရေးအပိုင်းများ တိုးမြှင့်ဆောင်ရွက်နေဟုဆို

ရန်ကုန်တိုင်းဒေသကြီးအတွင်း နှစ်စဉ်လျှပ်စစ်ဓာတ်အား လိုအပ်ချက် ၁၅ ရာခိုင်နှုန်း တိုးတက်နေသဖြင့် ဓာတ်အားလိုအပ်ချက် ဖြည့်ဆည်းနိုင်ရန်အတွက် ဓာတ်အားထုတ်လုပ်မှု အပိုင်းနှင့် ဖြန့်ဖြူးရေးအပိုင်းများ တိုးမြှင့်ဆောင်ရွက်နေဟုဆို
Published 12 August 2018

ရန်ကုန်တိုင်းအတွင်းရှိ လျှပ်စစ်ကြိုးများ ပြုပြင်နေမှုကို တွေ့ရစဉ် (ဓာတ်ပုံ-ကျော်ဇင်ဖြိုး)

ရန်ကုန်တိုင်းဒေသကြီးအတွင်း နှစ်စဉ်လျှပ်စစ်ဓာတ်အား လိုအပ်ချက် ၁၅ ရာခိုင်နှုန်း တိုးတက်နေသဖြင့် ဓာတ်အားလိုအပ်ချက် ဖြည့်ဆည်းနိုင်ရန်အတွက် ဓာတ်အားထုတ်လုပ်မှု အပိုင်းနှင့် ဖြန့်ဖြူးရေးအပိုင်းများ တိုးမြှင့်ဆောင်ရွက်နေကြောင်း လျှပ်စစ်နှင့် စွမ်းအင်ဝန်ကြီးဌာနမှ သိရသည်။

ရန်ကုန်တိုင်းဒေသကြီးအတွင်း အိမ်ထောင်စုပေါင်း ၁ ဒသမ ၅ သန်းခန့်ရှိရာ ၁ ဒသမ ၃ သန်းခန့် လျှပ်စစ်မီးရရှိပြီး ဖြစ်သည့်အတွက် ၈၃ ရာခိုင်နှုန်း လျှပ်စစ်ဓာတ်အား ရရှိပြီဖြစ်ကြောင်း၊ ထို့ပြင် ရန်ကုန်တိုင်းဒေသကြီး၏ လူနေသိပ်သည်းဆသည် အခြားတိုင်းဒေသကြီး၊ ပြည်နယ်များ၏ လူနေသိပ်သည်းဆထက် လွန်စွာများပြားပြီး 1900 People/ sq mile ခန့် ဖြစ်ပေါ်လျက်ရှိကာ လက်ရှိမြန်မာနိုင်ငံ၏ အမြင့်ဆုံး လျှပ်စစ်ဓာတ်အား ထုတ်လုပ်သုံးစွဲမှုမှာ ၃၃၅၇ ဒသမ ၈ မဂ္ဂါဝပ်တွင် ရန်ကုန်တိုင်းဒေသကြီး၏ လျှပ်စစ်ဓာတ် အားသုံးစွဲမှုမှာ ၁၅၄၈ မဂ္ဂါဝပ်ဖြစ်သည့်အတွက် တစ်နိုင်ငံလုံး လျှပ်စစ် ဓာတ်အားသုံးစွဲမှု၏ ၄၆ ရာခိုင်နှုန်း သုံးစွဲလျက်ရှိပြီး ရန်ကုန်တိုင်းဒေသကြီး၏ ၂၀၁၅ ခုနှစ် အမြင့်ဆုံး ဓာတ်အားသုံးစွဲမှုမှာ ၁၀၉၅ မဂ္ဂါဝပ်ဖြစ်သည့်အတွက် လက်ရှိတွင် ၄၅၃ မဂ္ဂါဝပ်အထိ တိုးတက်သုံးစွဲခဲ့ကြောင်း သိရသည်။

ရန်ကုန်တိုင်းဒေသကြီး၏ လျှပ်စစ်ဓာတ်အားသုံးစွဲမှုမှာ နှစ်စဉ် ၁၅ ရာခိုင်နှုန်း တိုးတက်နေသည့်အတွက် အဆိုပါ ဓာတ်အားတိုးတက် သုံးစွဲမှုများကို ဖြည့်ဆည်းပေးနိုင်ရန် အတွက် ဓာတ်အားထုတ်လုပ်မှုအပိုင်း အပြင် ဓာတ်အားဖြန့်ဖြူးခြင်း အပိုင်းများကိုလည်း တိုးချဲ့ပြုပြင် ဆောင်ရွက်လျက်ရှိကြောင်း၊ ရန်ကုန်တိုင်းဒေသကြီးအတွင်း လျှပ်စစ်ဓာတ်အား တိုးတက်သုံးစွဲနိုင်ရေးအတွက် System Development လုပ်ငန်းများ ဖြစ်သည့် ဓာတ်အားပေးစက်ရုံများ၊ ဓာတ်အားလိုင်း၊ ဓာတ်အားခွဲရုံအသစ်များ တိုးချဲ့တည်ဆောက်ခြင်းအပြင် System Improvement လုပ်ငန်းများဖြစ်သော ဝန်အားနိုင်နင်းမှုမရှိသည့် ဓာတ်အားလိုင်းများကို ဝန်အားနိုင်နင်းသော ဓာတ်အားလိုင်းကြိုးများဖြင့် အစားထိုးလဲလှယ်ခြင်း၊ ဝန်အားနိုင်နင်းမှု မရှိသော ဓာတ်အားခွဲရုံများရှိ Power Transformer များကို အင်အားတိုးချဲ့တပ်ဆင်ခြင်း၊ ဝန်အားမနိုင်နင်းသော Distribution Transformer များအတွက် Load Center ကျသောနေရာများတွင် Distribution Transformer များ တိုးချဲ့တပ်ဆင်ခြင်း၊ HDBC ဓာတ်အားလိုင်းကြိုးများကို Spaced Aerial Cable (SAC) ကြိုးများဖြင့် အစားထိုးလဲလှယ်ခြင်း လုပ်ငန်းများကို နိုင်ငံတော်ဘတ်ဂျက်အပြင် ADB၊ JICA၊ World Bank၊ ODA ချေးငွေတို့ဖြင့် ဆောင်ရွက်နေကြောင်း သိရသည်။

ထို့ပြင် ရန်ကုန်တိုင်းဒေသကြီးအတွင်း လျှပ်စစ်ဓာတ်အားဖြန့်ဖြူးရေးလိုင်း အများစုသည် HDBC လိုင်းကြိုးများဖြစ်သဖြင့် ရာသီဥတု၊ သစ်ပင်သစ်ကိုင်း၊ တိရစ္ဆာန်တို့ကြောင့် ယာယီဓာတ်အား ပြတ်တောက်ခြင်းများမှ ကာကွယ်ရန်နှင့်  အများပြည်သူ လျှပ်စစ်အန္တရာယ် မဖြစ်ပေါ်စေရန်အတွက် Insulation Cover ပါသော SAC ကြိုးများဖြင့် လဲလှယ်တည်ဆောက်ခြင်း လုပ်ငန်းများကို ဆောင်ရွက်ခဲ့ပြီး အရှေ့ပိုင်းခရိုင်အတွင်း ၁၂ ဒသမ ၄၂ မိုင်၊ အနောက်ပိုင်းခရိုင်အတွင်း ၁၁ ဒသမ ၈၃ မိုင်၊ တောင်ပိုင်းခရိုင်အတွင်း ၂၂ ဒသမ ၁၈ မိုင်၊ မြောက်ပိုင်းခရိုင် အတွင်းတွင် ၁၈ ဒသမ ၈၁ မိုင် စုစုပေါင်း ၆၅ ဒသမ ၂၄ မိုင် တည်ဆောက်ပြီးစီးခဲ့ပြီး ထပ်မံ၍ ၇၁ ဒသမ ၁၅ မိုင်လဲလှယ်ခြင်း လုပ်ငန်းများ ဆောင်ရွက်မည် ဖြစ်ကြောင်း သိရသည်။

ဆက်လက်ပြီး ရန်ကုန်တိုင်းဒေသကြီးအတွင်း ဓာတ်အားခွဲရုံများကို တည်ဆောက်ဓာတ်အားပေး လျက်ရှိရာ ယခုလက်ရှိတွင် ၂၆၆၅ အမ်ဗွီအေသာရှိသဖြင့် ထပ်မံ၍ ၂၀၁၈ ခုနှစ်တွင် တည်ဆောက်ဆဲ ဓာတ်အားခွဲရုံအင်အား အနေဖြင့် ၆၈၅ အမ်ဗွီအေ တည်ဆောက်လျက်ရှိပြီး ၂၀၁၈-၂၀၁၉ ခုနှစ်တွင် ဓာတ်အားခွဲရုံအင်အား အနေဖြင့် ၉၀၀ အမ်ဗွီအေ ထပ်မံတည်ဆောက်မည် ဖြစ်သည့်အတွက် စုစုပေါင်း ၄၂၅၀ အမ်ဗွီအေ တပ်ဆင်မည်ဖြစ်ကြောင်း သိရသည်။

 

Most Read

Most Recent