ဇူလိုင်လအတွင်း ပြည်ပတရားဝင် အလုပ်အကိုင် ၁၈၀၀၀ ကျော်နှင့် ပြည်တွင်း အလုပ်အကိုင် ၂၃၀၀၀ ကျော် အလုပ်အကိုင် ရရှိကြောင်း အလုပ်သမား၊ လူဝင်မှုကြီးကြပ် ရေးနှင့် ပြည်သူ့အင်အားဝန်ကြီးဌာန၏ ထုတ်ပြန်ချက်အရ သိရသည်။
ယင်းထုတ်ပြန်ချက်တွင် ပြည်တွင်း၌ အစိုးရအလုပ်အကိုင် ၉၅၃ ဦးနှင့် ပုဂ္ဂလိက အလုပ်အကိုင် ၂၂၂၁၁ ဦး၊ စုစုပေါင်း ၂၃၁၆၄ နေရာ အလုပ်အကိုင်ရရှိကြောင်း သိရသည်။ ထို့ပြင် ပြည်ပအလုပ်အကိုင်ရရှိမှု၌ မလေးရှားနိုင်ငံတွင် ၁၈၇၁ ဦး၊ စင်ကာပူနိုင်ငံတွင် ၄၅ ဦး၊ ကိုရီးယားနိုင်ငံတွင် ၂၅၇ ဦး၊ ထိုင်းနိုင်ငံတွင် ၁၆၃၀၇ ဦး၊ ဂျပန်နိုင်ငံတွင် ၄၃၆ ဦး၊ ယူအေအီးနိုင်ငံတွင် ၁၃ ဦး၊ ဂျော်ဒန် နိုင်ငံတွင် ၂၂ ဦး၊ ကာတာနိုင်ငံတွင် သုံးဦး၊ စုစုပေါင်း ၁၈၉၅၄ ဦး တရားဝင်အလုပ်အကိုင် ရရှိကြောင်း သိရသည်။
ယင်းဝန်ကြီးဌာနအနေဖြင့် အလုပ်သမားများ အလုပ်အကိုင်ရရှိရေးနှင့် အလုပ်ရှင်များအတွက် အလုပ်သမားများ လုံလောက်စွာရရှိရေးအတွက် အလုပ်အကိုင်နှင့် အလုပ်သမား ရှာဖွေရေးရုံးများတွင် Labour Exchange Management System ဖြင့် Online မှ ဆောင်ရွက်ပေးလျက်ရှိကြောင်း သိရသည်။
ဇွန်လတွင် ပြည်ပတရားဝင်အလုပ် အကိုင် ၁၇၀၀၀ ကျော်နှင့် ၂၀၀၀၀ ကျော် အလုပ်အကိုင်ရရှိပြီး မေလတွင် ပြည်ပအလုပ်အကိုင် ၂၃၀၀၀ ကျော်နှင့် ပြည်တွင်းအလုပ် အကိုင် ၁၃၀၀၀ ကျော် အလုပ်အကိုင်ရရှိကြောင်း သိရသည်။