ကျွဲ၊ နွားများ ခိုးရောင်းနေခြင်းကြောင့် နှစ်ဖက် အကျိုးမရှိသည့်အတွက် တရားဝင် ခွင့်ပြုခြင်း ဖြစ်ကြောင်းနှင့် တောင်သူများ ကြုံတွေ့နေရသည့် အခြေအနေကြောင့် ပြန်လည်သုံးသပ်မည် ဖြစ်ကြောင်း နိုင်ငံတော်၏ အတိုင်ခံပင်ပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
ပခုက္ကူမြို့နယ် ချောက်ကန်ကျေးရွာတွင် သြဂုတ် ၉ ရက် နံနက်က ပြုလုပ်သည့် ပခုက္ကူဒေသခံ ရှစ်ဦး ပါဝင်သည့် ငြိမ်းချမ်းရေး စကားဝိုင်းတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ထည့်သွင်း ပြောဆိုခဲ့ခြင်း ဖြစ်သည်။
“ခိုင်းစားနွားတွေကို ရောင်းစားလိုက်မယ်ဆိုရင် တောင်သူ လယ်သမားတွေအတွက် ပြဿနာရှိတယ်။ သို့သော်ငြားလည်း ဒီလို တရားဝင်လုပ်ရတဲ့ အကြောင်းရင်းက ဘာလဲဆိုတော့ ခိုးခိုးပြီး ရောင်းနေလို့။ ခိုးခိုးပြီး ရောင်းနေတဲ့အတွက် ဘယ်ဘက်ကမှ အမြတ်မရှိဘူး။ ဒီဟာကို တရားဥပဒေ ဘောင်အတွင်းဝင်အောင် လုပ်ရတဲ့သဘောပဲ။ ဒါပေမဲ့ ဒါကို အလေးအနက်ထားပြီး ပြန်သုံးသပ်ပါမယ်” ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
အဆိုပါ ငြိမ်းချမ်းရေး စကားဝိုင်းတွင် ပခုက္ကူမြို့နယ် ကိုင်းကျေးရွာမှ တောင်သူ ကိုသက်ခိုင်က လက်ရှိ ဖြစ်ပေါ်နေသည့် တောင်သူလုပ်ငန်း အခြေအနေအရ စက်မှုလယ်ယာသို့ ပြောင်းလဲရန် မလွယ်ကူသေးကြောင်း၊ ကျွဲနွား တရားဝင် တင်ပို့မှုကြောင့် ကျွဲနွားဈေး မြင့်တက်လာပြီး ကျေးလက်ဒေသတွင် ကျွဲနွား ရှားပါးလာကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား တင်ပြ ဆွေးနွေးခဲ့သည်။
ပခုက္ကူမြို့နယ် ကိုင်းကျေးရွာမှ တောင်သူ ကိုသက်ခိုင်ကပင် တောင်သူများ ချေးငွေရရှိမှုမှာ စိုက်ပျိုးစရိတ်ထက် နည်းပါးကြောင်း၊ အချိန်မီ မရရှိသည့်အတွက် ပြင်ပငွေတိုး ရှာဖွေရကြောင်း ၊ သုတေသန စိုက်ခင်းများ လုပ်ဆောင်ပေးစေလိုကြောင်းနှင့် စိုက်ပျိုးရေးဌာနသည် တောင်သူများနှင့် ကင်းကွာနေကြောင်း ဆွေးနွေးခဲ့သည်။
“ကျွဲနွားတွေကို မကွေးတိုင်းအနေနဲ့ အခုချိန်အထိ ၁၇၀၀၀ ကျော်လောက် တင်ပို့ထားပါတယ်။ ကုမ္ပဏီပေါင်း ၁၇၀ ကနေ တင်ပို့ထားတာပါ။ တရားမဝင် တင်ပို့ထားတာတွေ ရှိတယ်လို့လည်း ကြားသိရပါတယ်။ သက်ဆိုင်ရာ လွှတ်တော် ကိုယ်စားလှယ်တွေရယ် ညှိနှိုင်းပြီး တတ်နိုင်သမျှ ထိန်းချုပ်သွားမှာပါ” ဟု မကွေးတိုင်းဒေသကြီး စိုက်ပျိုးရေးနှင့် ဆည်မြောင်းဝန်ကြီး ဦးဝင်းမော်ဌေးက အများပြည်သူသို့ ပြန်လည် ဖြေကြားခဲ့သည်။
ပခုက္ကူမြို့နယ် ချောက်ကန်ကျေးရွာတွင် ပြုလုပ်သည့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် ပခုက္ကူဒေသခံ ရှစ်ဦးတို့၏ ငြိမ်းချမ်းရေးစကားဝိုင်းတွင် ကျန်းမာရေး ၊ ပညာရေးနှင့် ငြိမ်းချမ်းရေး ကိစ္စများလည်း ဆွေးနွေးခဲ့ကြသည်။
