နိုင်ငံတော်တွင် တင်ရှိနေသည့် ပြည်ပကြွေးမြီ အခြေအနေကို ပြည်သူလူထု သိရှိရန်အတွက် အသိပေးသင့်ကြောင်း တပ်မတော်သား ပြည်သူ့လွှတ်တော်ကိုယ်စားလှယ် ဗိုလ်မှူးတင်လင်းက အကြုံပြု ပြောကြားခဲ့သည်။

နိုင်ငံတော်သမ္မတထံမှ ပေးပို့သော စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ စီမံကိန်းလုပ်ငန်းများ ဆောင်ရွက်ရန်အတွက် အီတလီနိုင်ငံမှ အတိုးမဲ့ချေးငွေ ယူရို သန်း ၃၀ ရယူရန် ကိစ္စနှင့် စပ်လျဉ်း၍ နေပြည်တော်၌ သြဂုတ် ၉ ရက်က ပြုလုပ်သော ဒုတိယအကြိမ် ပြည်ထောင်စုလွှတ်တော် နဝမပုံမှန် အစည်းအဝေး သတ္တမနေ့တွင် တပ်မတော်သားပြည်သူ့လွှတ်တော်ကိုယ်စားလှယ်များက ဆွေးနွေးရာတွင် အထက်ပါအတိုင်း အကြံပြုခဲ့ခြင်းဖြစ်သည်။

“ပြည်ပကြွေးမြီ အခြေအနေကိုကြည့်ရင် ၂၀၁၈ ခုနှစ် မတ် ၃၁ ရက်အထိ ပြည်ပကြွေးမြီနဲ့ ဂျီဒီပီအချိုးဟာ ၁၅ ဒသမ ၄၅ ရာခိုင်နှုန်းဖြစ်ကြောင်း တွေ့ရှိရပါတယ်။ ကမ္ဘာ့ဘဏ်နဲ့ အပြည်ပြည်ဆိုင်ရာ ငွေရေးကြေးရေး ရန်ပုံငွေအဖွဲ့တို့က သတ်မှတ်ထားတဲ့ နိုင်ငံရဲ့ မူဝါဒနဲ့ အဖွဲ့အစည်းဆိုင်ရာ မူဘောင်ကို တိုင်းတာတဲ့ Score အရ အလယ်အလတ်ဝင်ငွေရှိတဲ့ နိုင်ငံအတွက် စံသတ်မှတ်ချက်မှာ ပြည်ပချေးငွေနဲ့ ဂျီဒီပီအချိုး ၃၀ ရာခိုင်နှုန်း မကျော်လွန်သင့်ကြောင်း ဖော်ပြထားချက်နဲ့လည်း ကိုက်ညီတာကြောင့် ချေးငွေရယူရန် သင့်လျော်မှု ရှိတာကိုလည်း တွေ့ရှိရပါတယ်။ နိုင်ငံတော်မှာ တင်ရှိနေတဲ့ ပြည်ပကြွေးမြီ အခြေအနေကို ပြည်သူလူထုသိရှိရန်အတွက် အသိပေးသင့်ကြောင်း အကြံပြုလိုပါတယ်” ဟု ဗိုလ်မှူးတင်လင်းက ပြောကြားသည်။

ထို့ပြင် ဗိုလ်မှူးတင်လင်းက လျှပ်စစ်ဓာတ်အားရရှိပြီး ဆက်သွယ်ရေး စနစ်ကောင်းမွန်လာခြင်း၊ သတင်းအချက်အလက်များ အချိန်နှင့် တစ်ပြေးညီရရှိလာနိုင်ခြင်း၊ အသေးစားကုန်ထုတ်လုပ်ငန်းများ ဆောင်ရွက်လာနိုင်ခြင်းကြောင့် ဝင်ငွေရရှိမှု အခွင့်အလမ်းများ တိုးပွားလာပြီး ကျေးရွာနေပြည်သူများ၏ လူမှုစီးပွားဘဝနှင့် လူနေမှုအဆင့်အတန်း တိုးတက်မြင့်မားလာခြင်းစသည့် ထပ်ဆင့်အကျိုးကျေးဇူးများပါ ရရှိမည်ဖြစ်သောကြောင့် အီတလီ၏ အတိုးမဲ့ချေးငွေကို အလေအလွင့်မရှိစေဘဲ စီမံကိန်းဝင် ဒေသခံပြည်သူများအတွက် အမှန်တကယ် အကျိုးရှိအောင် ဆောင်ရွက်ပေးရန် တိုက်တွန်းပြောကြားသည်။

နိုင်ငံတော်သမ္မတထံမှ ပေးပို့သော စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ စီမံကိန်းလုပ်ငန်းများ ဆောင်ရွက်ရန်အတွက် အီတလီနိုင်ငံမှ အတိုးမဲ့ချေးငွေ ယူရို သန်း ၃၀ ရယူရန်ကိစ္စနှင့် စပ်လျဉ်း၍ လွှတ်တော်ကိုယ်စားလှယ် ၁၈ ဦးက ဆွေးနွေးခဲ့ကြသည်။