မြေသိမ်းမည်ဆိုပါက ပြည်ထောင်စုလွှတ်တော်သို့ တင်ပြပြီး အတည်ပြုချက် ရယူသင့်ကြောင်းနှင့် မရိုးမဖြောင့်လုပ်သူများအား ထောင်ဒဏ်ချမှတ်နိုင်သည်ဟု တိတိကျကျ ပြဋ္ဌာန်းပေးသင့်ကြောင်း လွှတ်တော်ကိုယ်စားလှယ် ဆွေးနွေး

မြေသိမ်းမည်ဆိုပါက ပြည်ထောင်စုလွှတ်တော်သို့ တင်ပြပြီး အတည်ပြုချက် ရယူသင့်ကြောင်းနှင့် မရိုးမဖြောင့်လုပ်သူများအား ထောင်ဒဏ်ချမှတ်နိုင်သည်ဟု တိတိကျကျ ပြဋ္ဌာန်းပေးသင့်ကြောင်း လွှတ်တော်ကိုယ်စားလှယ် ဆွေးနွေး
Published 9 August 2018

မြေသိမ်းမည်ဆိုပါက ပြည်ထောင်စု လွှတ်တော်သို့တင်ပြပြီး အတည်ပြုချက် ရယူသင့်ကြောင်းနှင့် မရိုးမဖြောင့်လုပ်သူများအား ထောင်ဒဏ်ချမှတ်နိုင်သည်ဟု တိတိကျကျ ပြဋ္ဌာန်းပေးသင့်ကြောင်း လွှတ်တော်ကိုယ်စားလှယ်များက ဆွေးနွေးခဲ့သည်။

နေပြည်တော်၌ သြဂုတ် ၈ ရက်က ပြုလုပ်သည့် အမျိုးသားလွှတ်တော် အစည်းအဝေးတွင် ၂၀၁၇ ခုနှစ် မြေသိမ်းဥပဒေကြမ်းနှင့် ပတ်သက်ပြီး လွှတ်တော်ကိုယ်စားလှယ် လေးဦး ဆွေးနွေးစဉ် ထည့်သွင်းပြောကြားခဲ့ခြင်းဖြစ်သည်။

ရှမ်းပြည်နယ် မဲဆန္ဒနယ်အမှတ် (၃) မှ ဦးစိုင်းဝမ်းလှိုင်းခမ်းက “မြေသိမ်းတာတွေနဲ့ ပတ်သက်ပြီး တိုင်းရင်းသားဒေသတွေမှာ ပိုဆိုးတာပေါ့။ တိုင်းရင်းသားတွေရဲ့ အခွင့်အရေး ဆုံးရှုံးရတာပေါ့။ ဒီဥပဒေကို ဆွေးနွေးမယ်ဆိုတော့ မြေသိမ်းခံရတာတွေနဲ့ ပတ်သက်ပြီး လက်မှတ်ထိုးပြီး ကျွန်တော့်ဆီ ပို့လာတာ ထောင်ချီရှိပါတယ်။ နိုင်ငံတော်စီမံကိန်းအတွက်ဆိုလည်း တိတိကျကျပြဋ္ဌာန်းဖို့ လိုတယ်ဆိုပြီး ဆွေးနွေးခဲ့ပါတယ်။ နောက်တစ်ချက်က ဥပဒေပြုရေးကဏ္ဍမှာ အားနည်းနေတာ တွေ့ရတယ်။ အလုံးစုံဆုံးဖြတ်ချက် အာဏာကို အုပ်ချုပ်ရေးဌာနကို ပေးအပ်ထားတာ တွေ့ရတယ်။ ဒါကြောင့်ပြည်နယ်နဲ့ တိုင်းဒေသကြီးတွေမှာ စီမံကိန်းအတွက် မြေသိမ်းတော့မယ်ဆိုရင် ပြည်ထောင်စုလွှတ်တော်ကို တင်ပြပြီး အတည်ပြုချက်ရယူပြီးမှ ဆောင်ရွက်သင့်ပါတယ်။ နောက်ပြီးတော့ တရားရေးပေါ့နော်။ တရားရေးမဏ္ဍိုင်ကလည်း အားနည်းနေတယ်။ ဘယ်လိုပဲဖြစ်ဖြစ် ကိုယ့်မြေကို လာသိမ်းပြီဆိုရင်တော့ တားကြမှာပဲ။ အဲဒါကို ပြစ်မှုလို ဖြစ်နေတယ်။ သိမ်းဆည်းမယ် ဆိုပေမဲ့ ပုံမှန်တားဆီးတာကို တားဆီး နှောင့်ယှက်တယ်ဆိုတာမျိုး မဖြစ်ဖို့ ဆွေးနွေးခဲ့ပါတယ်။ အခုဟာက အမျိုးသား မြေယာပေါ်လစီတော့ ရှိတယ်။ ပြည်ထောင်စုလုံးဆိုင်ရာ မြေယာဥပဒေက မရှိသေးဘူး။ အခုလို အသေးအမွှားတွေ ပြလိုက်တဲ့အချိန်မှာ အကျိုးမဖြစ်ဘူးလို့ မြင်ပါတယ်။ ဒါကြောင့် မြေလွတ် မြေရိုင်းဥပဒေတို့၊ မြေသိမ်းဥပဒေတို့ မပြဋ္ဌာန်းသင့်သေးဘဲ ပြည်ထောင်စုလုံးဆိုင်ရာ မြေယာဥပဒေထွက်လာမှသာ ပြဋ္ဌာန်းသင့်တယ်လို့ ဆွေးနွေးခဲ့တာပါ” ဟု ပြောကြားသည်။

မြေသိမ်းဥပဒေနှင့်ပတ်သက်ပြီး ပြည်သူများကြားတွင် ကျယ်ကျယ်ပြန့်ပြန့် ပြောနေကြကြောင်း၊ နစ်နာခဲ့သူအချို့သည် မြေယာသိမ်းဆည်းခံရသည့်အပြင် တရားလည်း စွဲခံရကြောင်း၊ မြေယာနှင့်ပတ်သက်သည့် မပြီးပြတ်သေးသည့်အမှု အများအပြား ရှိသကဲ့သို့ မြေသိမ်းဥပဒေကြောင့် ပြည်သူများ စိုးရိမ်နေမှုများရှိကြောင်း၊ မြေယာကိစ္စများသည် တိုင်းရင်းသားဒေသများတွင် ပိုဆိုးကြောင်း၊ တစ်နေ့တစ်နေ့ မြေယာကိစ္စပြဿနာများစွာ ရှိကြောင်း၊ မြေသိမ်းဥပဒေဆိုပြီး ပြောသည့်အတွက် အလွယ်တကူ မြေသိမ်းလို့ရမည်ဆိုပြီး စိုးရိမ်နေကြကြောင်း၊ ဥပဒေကြမ်းထဲမှ ပုဒ်မများထဲတွင် အန္တရာယ်ရှိသည့်ပုဒ်မ အများကြီးရှိကြောင်း၊ ယခင်က စီမံကိန်းအတွက် မြေသိမ်းပြီး ဖြစ်ဖြစ်မြောက်မြောက် မလုပ်ခဲ့ခြင်း များစွာရှိကြောင်း၊ သိမ်းဆည်းခံရသည့်သူများ အများကြီး နစ်နာခဲ့ကြောင်း၊ ကိုယ်ပိုင်မြေထဲ ဝင်ရောက်လုပ်ကိုင်ပါက ဝတ္တရားနှောင့်ယှက်မှုနှင့် ဖမ်းဆီးခံရခြင်းများ များစွာရှိခဲ့ကြောင်း ဦးစိုင်းဝမ်းလှိုင်းခမ်းက ဆွေးနွေးသည်။

ရန်ကုန်တိုင်းဒေသကြီး မဲဆန္ဒနယ် အမှတ် (၂) ဦးဌေးဦးက မြေသိမ်းဥပဒေကြမ်းတွင် နစ်နာသူများအတွက် ကာကွယ်ပေးနိုင်ရန် လိုအပ်ကြောင်း၊ မရိုးမဖြောင့် ဆောင်ရွက်သည့် တာဝန်ရှိသူများကို အပြစ်ပေး အရေးယူနိုင်ရန် တိတိကျကျ ပြဋ္ဌာန်းသင့်ကြောင်း ဆွေးနွေးခဲ့သည်။

၂၀၁၇ ခုနှစ် မြေသိမ်းဥပဒေကြမ်းအား ရန်ကုန်တိုင်းဒေသကြီး မဲဆန္ဒနယ်အမှတ် (၅) အမျိုးသားလွှတ်တော်ကိုယ်စားလှယ်၊ တောင်သူလယ်သမားရေးရာကော်မတီ၏ဥက္ကဋ္ဌ ဦးဘမျိုးသိမ်းက အမျိုးသားလွှတ်တော်သို့ ဆွေးနွေးနိုင်ရန် တင်သွင်းခဲ့ခြင်းဖြစ်သည်။

“လက်ရှိဖြစ်နေတဲ့ မြေသိမ်းအမှုတွေက မပြီးပြတ်သေးဘူး။ မြေသိမ်းဆည်းမှု ဆိုတာကတော့ နိုင်ငံရဲ့ လိုအပ်ချက်အရ လုပ်ရတာလည်း ရှိပါတယ်။ နောင်လည်းဖြစ်လာဦးမှာပဲ။ ဖြစ်ပေါ်လာမယ့် ကိစ္စရပ်တွေကို အကောင်းဆုံး ဖြေရှင်းဆောင်ရွက်ပေးနိုင်ဖို့ လိုပါတယ်။ နိုင်ငံတော်ဆိုပေမဲ့ နိုင်ငံသားတွေအားလုံး ပိုင်တဲ့မြေဖြစ်တယ်။ ဒါကြောင့်ကာကွယ်ထိန်းသိမ်း စောင့်ရှောက်ရမယ်။ မြေသိမ်းဆည်းလိုက်လို့ ဖြစ်ပေါ်လာတဲ့ကိစ္စက နိုင်ငံတော်အတွက် အကျိုးရှိရမယ်။ ထိခိုက်နစ်နာတဲ့ မြေသိမ်းဆည်းခံတွေလည်း အကျိုးရှိရမယ်။ မျှမျှတတဖြစ်အောင်၊ လက်တွေ့ဆောင်ရွက်လို့ရအောင် အားလုံးရဲ့ အကြံပြုချက်တွေကိုယူပြီး ဆောင်ရွက်ထားတာ ဖြစ်ပါတယ်။ တချို့ဥပဒေတွေမှာ နစ်နာတဲ့သူတွေ၊ တာဝန်ဝတ္တရား နှောင့်ယှက်တဲ့သူတွေအတွက်ဆိုတဲ့ သဘောမျိုးလောက်ပဲ ထည့်ထားပြီးတော့ ကျန်တဲ့ မရိုးမဖြောင့် လုပ်ဆောင်တဲ့သူတွေကိုကျတော့ အားနည်းနေတာတွေ ရှိနေပါတယ်။ နှစ်ဖက်စလုံးကို ထည့်ထားရမယ်။ တာဝန်ရှိသူတွေဘက်ကိုလည်း အရေးယူနိုင်အောင် ထည့်ထားရမယ်။ လွှတ်တော်မှာ ဆွေးနွေးလိုက်တဲ့ အခါကျ ပေါ်လာမှာပဲ။ မရိုးမဖြောင့် လုပ်ဆောင်တဲ့ တာဝန်ရှိသူတွေကိုလည်း ခြောက်လကနေ သုံးနှစ်အထိ ချကိုချရမယ်။ ထောင်ဒဏ်လည်း ချကိုချရမယ်။ ဥပဒေကြမ်းမှာ တင်ပြထားတာက သုံးနှစ်အထိဖြစ်စေ၊ ငွေဒဏ်ဖြစ်စေ ချမှတ်နိုင်သည်ဆိုတာမျိုးထက် မရိုးမဖြောင့်လုပ်တဲ့သူတွေကို မဖြစ်မနေ အရေးယူဖို့လိုတယ်။ ကျွန်တော့်အနေနဲ့တော့ မရိုးမဖြောင့်သူတွေကို အပြစ်ပေးဖို့ ဆွေးနွေးကြတာကို ကြိုဆိုပါတယ်” ဟု ဦးဘမျိုးသိမ်းက မီဒီယာများအား ပြောကြားသည်။

ဆက်လက်၍ ၎င်းက “အမျိုးသားမြေအသုံးချမှု မူဝါဒဥပဒေအပေါ် မူတည်ပြီးတော့ ကျန်တဲ့မြေယာနဲ့ ဥပဒေတွေ ရေးဆွဲသင့်တယ်ဆိုပြီး အကြံပြုကြတယ်။ အမျိုးသားမြေအသုံးချမှု မူဝါဒက ၂၀၁၆ ခုနှစ်မှ ပေါ်ထွက်လာတာ။ ဒီမူဝါဒကို လက်တွေ့ကျင့်သုံး အကောင်အထည်ဖော်တာ ၂၀၁၇ ခုနှစ်ထဲမှာ စခဲ့တာပါ။ ဗဟိုအဆင့်ကနေ ပြည်နယ်နဲ့တိုင်းဒေသကြီး အဆင့်တွေကို စတင်ဖွဲ့စည်းပြီ။ အမျိုးသား မြေအသုံးချမှုမူဝါဒကနေ အမျိုးသားမြေဥပဒေကြီး ပေါ်ထွက်လာဖို့ ဦးတည်တာပါ။ အခုကတော့ မြေအသုံးချမှု မူဝါဒကို ကျင့်သုံးနေတဲ့ကာလဖြစ်တယ်။ ဒီကာလထဲမှာပဲ မြေနဲ့ သက်ဆိုင်တဲ့ ဥပဒေတွေ ပေါ်ထွက်လာတာပါ။ မြေလွတ်မြေလပ်မြေရိုင်း ဥပဒေတို့၊ တောင်သူလယ်သမား အကျိုးစီးပွားကာကွယ်ရေး ဥပဒေတို့ မြေသိမ်းဥပဒေတို့က အမျိုးသားမြေယာဥပဒေအောက်မှာပဲ ရှိရမှာပါ။ လတ်တလော ရင်ဆိုင်ရမယ့်ကိစ္စတွေ၊ ဖြေရှင်းရမယ့် ကိစ္စတွေ ဖြေရှင်းဖို့လိုတဲ့အတွက် အခုလို ဥပဒေတွေကို ဆောင်ရွက်နေရခြင်း ဖြစ်ပါတယ်။ မြေသိမ်းဥပဒေက ၂၀၁၆ ခုနှစ် ဇွန် ၁ ရက်မှာ လွှတ်တော်မှာ စတင်ဆွေးနွေးခဲ့တယ်။ ၂၀၁၇ အောက်တိုဘာလကျမှ မြေသိမ်းဥပဒေဆိုပြီး ပေါ်ထွက်လာတာပါ။ ဆွေးနွေးမှုတွေကတော့ အကြိမ်ကြိမ် ပြုလုပ်ပါတယ်။ မြန်မာနိုင်ငံရဲ့ မြေယာကိစ္စတွေ ဖြေရှင်းနိုင်ဖို့အတွက် မြေသိမ်းဥပဒေက လိုအပ်ပါတယ်။ အကြံပြုချက်တွေကို သေချာနားထောင်ပါတယ်။ အကြံပြုချက်တွေအပေါ် အခြေခံပြီး တော်တော် ပြောင်းလဲထားပါတယ်။ ဥပဒေကြောင်းအရ ကာကွယ်မှုရှိအောင်၊ ဥပဒေကြောင်းအရ ခံစားခွင့်ရှိအောင် ရည်ရွယ်တာပါ” ဟု ဆိုသည်။

Most Read

Most Recent