<

မန္တလေး-ညောင်ဦး ရေလမ်းကြောင်းတွင် ရေယာဉ်များ ၂၄ နာရီ အသုံးပြုသွားလာနိုင်မည့် ရေလမ်းပြ အမှတ်အသားများကို ယခုလကုန်တွင် ချထားသွားမည်

မန္တလေး-ညောင်ဦး ဧရာဝတီမြစ်ရေလမ်းကြောင်းတွင် ခုတ်မောင်းသွားလာနေကြသော ရေယာဉ်များ ၂၄ နာရီ အန္တရာယ်ကင်းစွာ သွားလာခုတ်မောင်းနိုင်ရန် နေ့မြင် ညမြင် အဆင့်မြင့် ရေလမ်းညွှန် အမှတ်အသားများကို ယခုသြဂုတ်လဆန်းပိုင်းတွင် ချထားနိုင်မည်ဖြစ်ကြောင်း ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ သိရသည်။

အဆိုပါလုပ်ငန်းမှာ ကမ္ဘာဘဏ်ချေးငွေ ဒေါ်လာသန်း ၁၀၀ နှင့် ဆောင်ရွက်နေသော လုပ်ငန်းများအနက် ဒေါ်လာသန်း ၃၀ ကျော် သုံးစွဲဆောင်ရွက်မည့် ဧရာဝတီမြစ်အတွင်း မန္တလေးမှညောင်ဦး ရေကြောင်းသွားလာမှု မြှင့်တင်ခြင်း (Ayeyarwady River Navigation Enhancements) အစိတ်အပိုင်း တစ်ခုဖြစ်ကြောင်း သိရသည်။

“လက်ရှိမြစ်ကြောင်းတွင် တပ်ဆင်ထားသည့် ရေလမ်းညွှန် အမှတ်အသားတွေက ပြည်တွင်းထုတ်တွေဖြစ်ပြီး နေ့ဘက်မှာပဲ ကောင်းစွာမြင်နိုင်တယ်။ အခုထားရှိမှာက Night Navigation အတွက် Light Buoys နဲ့ ကုန်းပေါ် အမှတ်အသားတွေ ထားရှိမယ်။ လက်ရှိမှာက ဒီရေလမ်းကြောင်းမှာ ရေယာဉ်တွေက ညမောင်းလို့ မရဘူး။ နေ့/ည မြင်နိုင်တဲ့ ရေလမ်းပြတွေဖြစ်တော့ နေ့/ည လုံခြုံစိတ်ချစွာ သွားလို့ရပြီ။ တံတားတွေမှာလည်း တပ်သွားမယ်။ တံတားတွေမှာ ရေလမ်း မီးအချက်ပြတွေ တပ်ဆင်မယ်။ မ၀င်ရတဲ့နေရာမှာ အနီ၊ အ၀င်ရေလမ်းကြောင်းမှာ အစိမ်းပေါ့။ ကုန်းပေါ်အမှတ်အသားတွေကိုလည်း ခုရှိနေတာတွေထဲမှာ ထပ်ဖြည့်မယ်” ဟု ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ Componet 3 ဒါရိုက်တာ ဦးအောင်မျိုးခိုင်က ပြောကြားသည်။

ရေလမ်းညွှန်အမှတ်အသားများတွင် ရေထဲနှင့် ကုန်းပေါ်ပြ အမှတ်အသားဟူ၍ရှိပြီး ရေထဲတွင် ထားရှိမည့် International Buoy အမျိုးအစားလေးမျိုးနှင့် ကုန်းပေါ်ပြ အမှတ်အသား နှစ်မျိုးပါဝင်မည်ဖြစ်ကြောင်း၊ တံတားများတွင် ညမြင်နိုင်ရန် ရေလမ်းပြ အမှတ်အသားကို မီးလုံးများဖြင့် တပ်ဆင်ပေးသွားမည်ဖြစ်ကြောင်း သိရသည်။

August 8, 2018














Copy Protected by Chetan's WP-Copyprotect.