လက်ရှိအခြေအနေတွင် ဘတ်ဂျက်အနေအထားပေါ် မူတည်၍ စီမံကိန်းများ ရွေးချယ်လေ့ရှိသည်ကို တွေ့ရကြောင်း၊ စီမံကိန်းများ ရွေးချယ်ရာ၌ ငွေရေးကြေးရေး အခြေအနေကို ထည့်သွင်းစဉ်းစားရန် အရေးကြီးသော်လည်း နိုင်ငံအတွက် အမှန်တကယ် လိုအပ်သည့် စီမံကိန်း များကို ဦးစားပေးရွေးချယ်နိုင်ရန် ပို၍အဓိကကျသည်ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားခဲ့ကြောင်း မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း ၂၀၁၈-၂၀၃၀ တွင် ဖော်ပြထားသည်။
ထို့ကြောင့် ပြည်သူပြည်သားများအတွက် ကောင်းကျိုးအများဆုံး ဆောင်ကြဉ်းပေးနိုင်မည့် စီမံကိန်း များကို ရွေးချယ် အကောင်အထည်ဖော် ဆောင်ရွက်ရမည် ဖြစ်သည်ဟု ဖော်ပြထားသည်။
တစ်နည်းဆိုရလျှင် အမျိုးသားအဆင့် စီမံကိန်းများသည် နိုင်ငံသူ နိုင်ငံသားအားလုံး၏ ဘဝမြှင့်တင်ရေးကို ရှေးရှုဖော်ဆောင်ထား သည့် စီမံကိန်းများ ဖြစ်ရမည်ဖြစ်ကြောင်း၊ လက်ရှိစီမံကိန်းများ အကောင်အထည်ဖော်မှု အပါအဝင် အမျိုးသားအဆင့်စီမံကိန်းများ ရေးဆွဲရာတွင် ရေရှည်တည်တံ့ရေးနှင့် ဟန်ချက်ညီညီ ပူးပေါင်းဆောင်ရွက်ရေးကို အထူးအလေးထားရန် လိုအပ်ကြောင်းနှင့် မိမိတို့၏ လိုအပ်ချက်များနှင့် နိုင်ငံ၏ လိုအပ်ချက်များကို စဉ်းစားဆောင်ရွက်ရာ၌ မဟာဗျူဟာကျကျ စဉ်းစားဆောင်ရွက်ကြရန်ကိုလည်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တိုက်တွန်းထားကြောင်း သိရသည်။
လက်ရှိ မြန်မာနိုင်ငံတွင် ကဏ္ဍအလိုက် ဝန်ကြီးဌာနအလိုက်၊ ပြည်နယ်၊ တိုင်းဒေသကြီးအလိုက် စသည်ဖြင့် စီမံကိန်းများစွာ ရှိနေကြောင်း၊ ထိုသို့အမျိုးမျိုးသော စီမံကိန်းများကို အမျိုးသားအဆင့် မဟာဗျူဟာ စီမံကိန်းကြီး တစ်ခုအောက်၌ သဟဇာတ ဖြစ်စေရန် ပေါင်းစည်းပြီး ဆောင်ရွက်နိုင်မှသာ တိုင်းပြည်အတွက် စစ်မှန်သည့် ဖွံ့ဖြိုးတိုးတက်မှုကို ဆောင်ကြဉ်းနိုင်မည် ဖြစ်ကြောင်း သိရသည်။
ထို့ကြောင့် ဗဟိုအစိုးရ အဖွဲ့အစည်းများ၊ ပြည်နယ်၊ တိုင်းဒေသကြီးများ အနေဖြင့် ငြိမ်းချမ်းပြီး သာယာဝပြောသည့် ဖက်ဒရယ်ဒီမိုကရေစီ နိုင်ငံတစ်ခု ဖြစ်လာရန် ဖော် ဆောင်ရာတွင် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable Development Plan – MSDP) မှ ဘက်စုံပူးပေါင်း ဆောင်ရွက်မှု မူဘောင်တစ်ခုအဖြစ် ဆောင်ရွက်ပေးမည် ဖြစ်ကြောင်း သိရသည်။
ငြိမ်းချမ်းရေးနှင့် တည်ငြိမ်ရေးသည် ယခုစီမံကိန်း၏ မဏ္ဍိုင်သုံးခုအနက် တစ်ခုဖြစ်သည့်အပြင် ၎င်းတို့မရှိလျှင် တိုင်းပြည်ဖွံ့ဖြိုးတိုးတက်မှုကို ရေရှည်ထိန်းထားနိုင်ရန် ခက်ခဲလိမ့်မည်ဖြစ်ကြောင်း၊ တစ်ချိန်တည်းမှာပင် ရေရှည်တည်တံ့ပြီး မျှတသည့် ဖွံ့ဖြိုးမှုကသာ တိုင်းပြည်ကို ငြိမ်းချမ်းတည်ငြိမ်စေရန် အထောက်အကူ ပြုနိုင်ကြောင်း၊ မြန်မာနိုင်ငံသည် MSDP ၏ လမ်းပြမှုဖြင့် ဘက်စုံထောင့်စုံ ဟန်ချက်ညီညီ ဖွံ့ဖြိုးတိုးတက် လာနိုင်မည်ဖြစ်ကြောင်း၊ နောက်ထပ်ခြေလှမ်းတစ်ရပ် အနေနှင့် ဗဟိုအစိုးရ အဖွဲ့အစည်းများနှင့် ပြည်နယ်နှင့် တိုင်းဒေသကြီး အစိုးရ အားလုံးထံမှ အဆိုပြု စီမံကိန်းများသည် MSDP နှင့် မဟာဗျူဟာကျကျ ကိုက်ညီမှု ရှိ မရှိ ဆိုသည်ကို စိစစ်သုံးသပ်မည်ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
ထိုသို့ စိစစ်ထားသော နိုင်ငံတော်အဆင့် မဟာဗျူဟာ စီမံကိန်းများကို MSDP ၏ လွှမ်းခြုံမှုအောက်တွင် ပြည်သူ့ရင်းနှီးမြှုပ်နှံမှုဆိုင်ရာ စီမံချက်ဘဏ် (Project Bank) အဖြစ် တစ်စုတစ်ဝေးတည်းထားရှိ အကောင်အထည်ဖော်မည်ဖြစ်ကြောင်း သိရသည်။
