ပြုပြင်ထိန်းသိမ်းလျက်ရှိသော ရတနာပုံခေတ်လက်ရာ ရွှေနန်းတော်ကျောင်းကို တွေ့ရစဉ်
မန္တလေးမြို့ အောင်မြေသာစံမြို့နယ်ရှိ ရတနာပုံခေတ်နှောင်းပိုင်း လက်ရာတစ်ခုဖြစ်သည့် ရွှေနန်းတော်ကျောင်း မူလလက်ရာမပျက် ပြုပြင်ထိန်းသိမ်းခြင်းလုပ်ငန်း ဒုတိယပိုင်း စီမံကိန်း ပြန်လည်စတင်ရာတွင် ရှေးဟောင်းသုတေသန ဦးစီးဌာနနှင့် WMF (ကမ္ဘာ့အဆောက်အအုံများ ရန်ပုံငွေအဖွဲ့) တို့အကြား ညှိနှိုင်းမှု အားနည်းခြင်းနှင့် သဘောထား ကွဲလွဲခြင်းတို့ကြောင့် လုပ်ငန်းပိုင်းဆိုင်ရာ ကြန့်ကြာမှုများ ဖြစ်ပေါ်ခဲ့ပြီးနောက် လက်ရှိတွင် ညှိနှိုင်းဆွေးနွေးမှု အဆင်ပြေခဲ့ပြီး ကျောင်းဆောင်၏ တောင်ဘက်ခြမ်းရှိ ဝရန်တာများကို ပြုပြင်ထိန်းသိမ်းလျက်ရှိကာ ကျောင်းဆောင် တစ်ခုလုံး၏ ပြုပြင် ထိန်းသိမ်းမှု ရာခိုင်နှုန်းမှာ ၅၀ ရာခိုင်နှုန်းကျော် ပြီးစီးပြီဖြစ်ကြောင်း WMF မှ Program Director Mr.Jeffery Allen က ပြောကြားသည်။
“ပြုပြင်ထိန်းသိမ်းမှု အပိုင်းတွေ အားလုံးဟာ နိုင်ငံတကာအဆင့်မီ ထိန်းသိမ်းတာဖြစ်သလို ကုန်းဘောင်ခေတ်က မူလလက်ရာအတိုင်း ပြုပြင်ထိန်းသိမ်းနေတာ ဖြစ်ပါတယ်။ ကျွန်တော်တို့ လုပ်ငန်းတွေကတော့ လက်ရှိမှာ ကျောင်းဆောင်ရဲ့ တောင်ဘက်အခြမ်းကို ပြုပြင်ထိန်းသိမ်းနေပါတယ်။ ကျောင်းဆောင်ရဲ့ ဘေးဝရန်တာတွေ အားလုံးကို မူလလက်ရာမပျက် ပြုပြင်ထိန်းသိမ်းသွားမှာပါ။ ဝရန်တာတွေကို ပြုပြင်ထိန်းသိမ်းပြီးသွားရင် ကျောင်းဆောင် ခေါင်မိုးတွေကို ပြုပြင်ထိန်းသိမ်းနိုင်ဖို့ လုပ်ဆောင်သွားမှာပါ။ ပြုပြင်ထိန်းသိမ်းမှုတွေကတော့ ကုန်းဘောင်ခေတ်က မူလလက်ရာအတိုင်း ပြုပြင် ထိန်းသိမ်းသွားမှာပါ” ဟု World Monuments Fund ၏ Program Director Mr.Jeffery Allen က ပြောကြားသည်။
ရွှေနန်းတော်ကျောင်း၏ တောင်ဘက်ဝရန်တာ ပြုပြင်ထိန်းသိမ်းခြင်း၊ အောက်ခြေရှိ နယားရုပ်များကို မူလလက်ရာမပျက် ပြုပြင်ထိန်းသိမ်းခြင်းများ လုပ်ဆောင်လျက်ရှိကာ ကျောင်းဆောင်၏ ဘေးဝရန်တာများ ပြုပြင်ရာတွင် ဆွေးမြေ့နေသည့် တိုင်လုံးနေရာများကို အစားထိုး လဲလှယ်သွားမည်ဖြစ်ကာ ပြန်လည် အသုံးပြုနိုင်သည့် တိုင်လုံးများကို တွဲစပ်၍ ထည့်သွင်းပြုပြင်မည် ဖြစ်ကြောင်း Mr. Jeffery Allen က ပြောကြားသည်။ ထို့ပြင် အဆိုပါ တိုင်လုံးနေရာများကို အစားထိုး လဲလှယ်ရာတွင် အရည်အသွေး ပြည့်မီသည့် ကျွန်းသစ်များဖြင့် အစားထိုးပြုပြင် လဲလှယ်မည်ဖြစ်ကြောင်း သိရသည်။
မန္တလေးမြို့ရှိ ရွှေနန်းတော်ကျောင်းအား နိုင်ငံတကာအဆင့်မီ ပြုပြင်ထိန်းသိမ်းမှုများ လုပ်ဆောင်ရန်အတွက် ယဉ်ကျေးမှုဝန်ကြီးဌာနသို့ အမေရိကန်အစိုးရက ၂၀၁၃ ခုနှစ်တွင် ကမ်းလှမ်းမှုများ ပြုလုပ်ခဲ့သည်။ ယင်းနောက် ၂၀၁၄ ခုနှစ် ဖေဖော်ဝါရီမှ စတင်၍ အမေရိကန်နိုင်ငံအခြေစိုက် World Monuments Fund (ကမ္ဘာ့အဆောက်အအုံများ ရန်ပုံငွေအဖွဲ့) က ရွှေနန်းတော်ကျောင်း၏ ပျက်စီးနေမှု အစိတ်အပိုင်းများအား 3D Laser Scanner ပုံရိပ်ဖမ်းစက်များဖြင့် အသေးစိတ် မှတ်တမ်းများရယူခြင်း၊ သစ်သား ဆွေးမြေ့မှုများ လေ့လာခြင်း၊ ကျောင်းအတွင်း ရေစီးရေလာစနစ်များ လေ့လာခြင်းနှင့် သဘာဝပတ်ဝန်းကျင်ဆိုင်ရာ အချက်အလက်များရယူခြင်း အစရှိသည့် နည်းလမ်းမျိုးစုံဖြင့် လေ့လာမှတ်တမ်း ရယူမှုများနှင့် ကျောင်းဆောင် အနောက်ဘက်ရှိ ပျက်စီးမှုများ ဖြစ်ပေါ်နေသည့် အောက်ခြေကြမ်းခင်းများနှင့် ဘေးဝရန်တာများကို အစားထိုးလဲလှယ်ခြင်း လုပ်ငန်းများကို သုံးနှစ်ကျော် အချိန်ယူ ပြုလုပ်ခဲ့ကြောင်း သိရသည်။
