မန္တလေးမြို့တော် စည်ပင်သာယာ နယ်နိမိတ်အတွင်းရှိ ယာဉ်များကို အောက်တိုဘာလမှစ၍ ဘီးခွန်နှုန်းထားများ ပြောင်းလဲကောက်ခံမည်

မန္တလေးမြို့တော် စည်ပင်သာယာ နယ်နိမိတ်အတွင်းရှိ ယာဉ်များကို အောက်တိုဘာလမှစ၍ ဘီးခွန်နှုန်းထားများ ပြောင်းလဲကောက်ခံမည်
Published 5 August 2018

မန္တလေးမြို့တော် စည်ပင်သာယာရေး ကော်မတီ နယ်နိမိတ်အတွင်း သွားလာသည့် ယာဉ်များအား ဘီးခွန်နှုန်းထားများကို လာမည့်အောက်တိုဘာလတွင် အင်ဂျင်ပါဝါအလိုက် ပြောင်းလဲကောက်ခံသွားမည် ဖြစ်ကြောင်း စည်ပင်သာယာရေး ကော်မတီ၏ ထုတ်ပြန်ချက်များအရ သိရသည်။

ပြောင်းလဲကောက်ခံရာတွင် ကုန်းလမ်းပို့ဆောင်ရေး ညွှန်ကြားမှုဦးစီးဌာန၏ လမ်းညွှန်ချက်အရ တိုင်းဒေသကြီးအတွင်း မှတ်ပုံတင်ယာဉ်များကို ယာဉ်အမျိုးအစားအလိုက် ကောက်ခံနေရာမှ အင်ဂျင်ပါဝါစီစီအလိုက် ပြောင်းလဲကောက်ခံမည်ဖြစ်ကာ လုပ်ငန်းသုံးယာဉ်ဖြစ်ပါ အခွန်နှုန်းထား တစ်မျိုးဖြင့် ကောက်ခံမည် ဖြစ်ကြောင်း သိရသည်။

“အခုက ဘီးခွန်က မဆောင်မနေရဖြစ်သွားပြီ။ လက်ရှိက ဆိုင်ကယ်ဆို နှစ်နှစ်သက်တမ်းအတွက် ၁၉၀၀ လောက်ကျတယ်။ လုပ်ငန်းသုံး အိမ်သုံးမခွဲဘဲ ကားအမျိုးအစားနဲ့ က.ည.န ယာဉ်သက်တမ်းပေါ် မူတည်ပြီးတော့ ပေးရတာဖြစ်တယ်။ အခု ပြောင်းလဲကောက်ဖို့ ကြေညာထားတာကျတော့ အရင်ထက် ပိုများသွားတယ်။ လုပ်ငန်းသုံး ဆိုရင်လည်း ပိုဆောင်ရမှာ ဖြစ်တာကြောင့် အချို့ယာဉ်ပိုင်ရှင်တွေဆိုရင် ပေးဆောင်ရမယ့် အခွန်တွက်ကြည့်တဲ့အခါမှာ သိန်းချီကျမှာမို့ ညည်းတဲ့သူတွေရှိတယ်” ဟု က.ည.န တွင် ကိုယ်စား ယာဉ်လိုင်စင် သက်တမ်းတိုး ဆောင်ရွက်ပေးသူ တစ်ဦးက ပြောသည်။

အင်ဂျင်ပါဝါစီစီအလိုက် ပြောင်းလဲသတ်မှတ်လိုက်သည့် ဘီးခွန်နှုန်းထားများမှာ လက်ရှိ ကောက်ခံနေသည့် ဘီးခွန်နှုန်းထားများထက် ထက်ဝက်ခန့် မြင့်တက်သွားခြင်းဖြစ်ပြီး မော်တော်ဆိုင်ကယ် တစ်မျိုးသားလျှင် လုပ်ငန်းသုံး၊ အိမ်သုံးခွဲခြားခြင်း မရှိဘဲ ကျန်ယာဉ်များကို အင်ဂျင်ပါဝါစီစီအလိုက် လုပ်ငန်းသုံးဖြစ်ပါက တစ်နှစ်လျှင် အခွန်ခ အိမ်သုံးထက်နှုန်းထား နှစ်ဆပေးဆောင် ရမည်ဖြစ်ကာ အနည်းဆုံး ကျပ်သုံးသောင်းကျော်မှ အများဆုံးကျပ် တစ်သိန်းကျော်အထိ ကျသင့်မည် ဖြစ်ကြောင်း သိရကာ စီးပွားရေးသုံး ယာဉ်များအနေဖြင့် ဘီးခွန်နှုန်းထား အသစ်အတိုင်း ပေးဆောင်ပြီးပါက မြို့ဝင်ဂိတ်များတွင် လမ်းအသုံးပြုခ ကောက်ခံတော့မည် မဟုတ်ကြောင်း သိရသည်။

အင်ဂျင်ပါဝါစီစီအလိုက် ပြောင်းလဲသတ်မှတ်ထားသည့် တစ်နှစ်စာအတွက် ဘီးခွန်နှုန်းထားများမှာ မော်တော်ဆိုင်ကယ်မှာ ၁၈၂၅ ကျပ်၊ ၆၆၀ စီစီအောက် အိမ်သုံး ယာဉ်မှာ ၁၈၂၅၀ ကျပ်၊ စီးပွားရေးသုံးမှာ ကျပ်  ၃၆၅၀၀၊ ၆၆၀ စီစီမှ ၁၃၀၀ စီစီထိ အိမ်သုံးယာဉ် ၂၇၃၇၅ ကျပ်၊ စီးပွားရေးသုံး ၅၄၇၅၀ ကျပ်၊ ၁၃၀၁ စီစီမှ ၂၀၀၀ စီစီအထိ အိမ်သုံးယာဉ် ၃၆၅၀၀ ကျပ်၊ စီးပွားရေးသုံး ၇၃၀၀၀ ကျပ်၊ ၂၀၀၁ စီစီမှ ၄၃၀၀ စီစီအထိ အိမ်သုံး ၄၅၆၂၅ ကျပ်၊ စီးပွားရေးသုံး ၉၁၂၅၀ ကျပ်နှင့် ၄၃၀၀ စီစီအထက် ယာဉ်များမှာ အိမ်သုံး ၅၄၇၅၀ ကျပ်၊ စီးပွားရေးသုံး ကျပ်၁၀၉၅၀၀ သတ်မှတ်ထားကြောင်း သိရသည်။

Most Read

Most Recent