ရန်ကုန်တိုင်းဒေသကြီး အတွင်းရှိ စက်မှုကုန်ထုတ်စက်ရုံ တစ်ရုံကို တွေ့ရစဉ် (ဓာတ်ပုံ-ပြည့်ဖြိုးအောင်)

၂၀၁၈ ခုနှစ် ဇူလိုင်လ အာဆီယံနိုင်ငံများ ထုတ်လုပ်မှု PMI ညွှန်းကိန်း PMI (Manufacturing Purchasing Manager’s Index) ဝယ်ယူရေး မန်နေဂျာများ၏ အညွှန်းကိန်း) တွင် မြန်မာက သုံးလဆက်တိုက် ကျဆင်း၍ နိုင်ငံပေါင်း ခုနစ်နိုင်ငံအနက် အဆင့်အနိမ့်ဆုံး နေရာအထိရောက်ပြီး နိုင်ငံခြားငွေလဲနှုန်း ဆိုးရွားစွာ မြင့်တက်မှုကြောင့် ဖြစ်ပေါ်သော ကုန်ကျစရိတ်များ ကာမိရန် ကုန်ပစ္စည်းရောင်းဈေးများ ဆက်လက်မြှင့်တင် လျက်ရှိကြောင်း Nikkei ၏ ပံ့ပိုးမှုဖြင့် ပြုလုပ်သော HIS Markit စစ်တမ်းတွင် ဖော်ပြချက်အရ သိရသည်။

၂၀၁၈ ခုနှစ် ဇူလိုင်လ အာဆီယံထုတ်လုပ်မှု PMI ညွှန်းကိန်းတွင် ဗီယက်နမ်နိုင်ငံ က ၅၄ ဒသမ ၉၊ ဖိလစ်ပိုင်နိုင်ငံက ၅၀ ဒသ မ ၉၊ အင်ဒိုနီးရှားနိုင်ငံက ၅၀ ဒသမ ၅၊ စင်ကာ ပူနိုင်ငံက ၅၀ ဒသမ ၂၊ ထိုင်းနိုင်ငံက ၅၀ ဒသမ ၁၊ မလေးရှားနိုင်ငံက ၄၉ ဒသမ ၇၊ မြန်မာနိုင်ငံက  ၄၇ ဒသမ ၉ ရရှိခဲ့ပြီး စစ်တမ်းကောက်ယူသည့် အာဆီယံနိုင်ငံ ခုနစ်နိုင်ငံတွင် မြန်မာနိုင်ငံက အဆင့်အနိမ့်ဆုံးသို့ ရောက်ရှိခဲ့ခြင်း ဖြစ်သည်။

၂၀၁၈ ခုနှစ် မတ်၊ ဧပြီ အာဆီယံနိုင်ငံများ ထုတ်လုပ်မှု PMI ညွှန်းကိန်းတွင် နှစ်လဆက်တိုက် ထိပ်ဆုံး၌ ရပ်တည်ခဲ့သော မြန်မာနိုင်ငံသည် စီးပွားရေး အရှိန်ပျော့လာခြင်းကြောင့် မေတွင် အဆင့် ၄၊ ဇွန်တွင် အဆင့် ၆၊ ဇူလိုင်တွင် အဆင့် ၇ နေရာအထိ ဆက်တိုက်ကျဆင်း ခဲ့ခြင်းဖြစ်သည်။

၂၀၁၈ ခုနှစ် ဇူလိုင်လအတွင်း မြန်မာအပါအဝင် အချို့နိုင်ငံများတွင် နိုင်ငံခြားငွေလဲနှုန်းများ ဆိုးရွားလာ၍ သွင်းကုန်များဆိုင်ရာ ငွေကြေးဖောင်းပွမှုမှာ ပိုမိုမြင့်လာခဲ့သည်။ ကုန်ကျစရိတ်များ၏ အားကောင်းသည့် ဖိအားပေးမှုကို ဒေသတစ်ဝန်းတွင် တွေ့မြင်နိုင်ခဲ့ပြီး သွင်းကုန်ဈေးနှုန်းများ၏ ဖောင်းပွမှုမှာ တစ်ဟုန်ထိုး ထိုးတက်သွားသည်။ စစ်တမ်းတွင် အကျုံးဝင်ကြသည့် ခုနစ်နိုင်ငံ စလုံးတို့သည် ၂၀၁၈ ခုနှစ် တတိယ သုံးလပတ် အစပိုင်းတွင် ကုန်ကျစရိတ်များ၏ ဝန်ထုပ်ဝန်ပိုးများ ပိုမိုကြီးမားလာကြောင်း အစီရင်ခံကြသည်။ မြန်မာနိုင်ငံထဲတွင်မူ ပစ္စည်းဖြန့်ဖြူးကြ သူတို့ထံတွင် ပစ္စည်းများ နည်းပါးနေလျက် ငွေလဲနှုန်း အခြေအနေ မကောင်းသည့် အကြားမှာပင် အထင်ရှားဆုံး မြင့်တက်ခဲ့ကြောင်း အစီရင်ခံထားရာ ကုမ္ပဏီများသည် ၎င်းတို့၏ ရောင်းဈေးများကို ရှေ့ဆက်မြှင့်တင်ခဲ့ရကြောင်း သိရသည်။

မြန်မာနိုင်ငံအတွင်း ကုန်ထုတ်လုပ်ရေးကဏ္ဍ တစ်ဝန်းရှိ အခြေအနေများ အသင့်အတင့် ဆုတ်ယုတ်လာကြောင်း ဇူလိုင်စစ်တမ်း ဒေတာတွင် ညွှန်ပြခဲ့ပြီး ၂၀၁၇ ခုနှစ် စက်တင်ဘာလမှစ၍ ပထမဦးဆုံးလအဖြစ် ယခင်ကျဆင်းမှုနှင့်အတူ ထုတ်ကုန်နှင့် အော်ဒါသစ်များ ကျဆင်းမှုများကြောင့် အဓိက PMI ကိန်းကျဆင်းလာစေခဲ့သည်။ သို့ဖြစ်၍ ကုမ္ပဏီများသည် လွန်ခဲ့သည့် အောက်တိုဘာ ကတည်းကစပြီး ဝန်ထမ်းအင်အား ပထမအကြိမ် ကျဆင်းလာမှုကို မြင်တွေ့ခဲ့ကာ လက်ကျန် အလုပ်စာရင်းများလည်း သိသိသာသာ ဆက်လက်ကျဆင်းခဲ့သည်။

ယင်းအတောအတွင်း ကုန်ကြမ်းပစ္စည်းများ ရှားပါးလာခြင်းကြောင့် သွင်းကုန် ကုန်ကျစရိတ်များကို ရှေ့ဆက်ပြီး မြင့်မားစေခဲ့ပြီး ဝယ်လိုအား အခြေအနေများ အားနည်းနေခဲ့သော်လည်း ထုတ်ကုန်များ အတွက် တောင်းခံသည့် ဈေးနှုန်းများ ပိုမိုဖောင်းပွလာခဲ့ခြင်းဖြင့် ကုမ္ပဏီများသည် မြင့်တက်လာသည့် ကုန်ကျစရိတ်အချို့ကို ဈေးဝယ်များအပေါ် လွှဲချပေးခဲ့ကြသည်။

ကုန်စည်ထုတ်လုပ်ရေး လုပ်ငန်းများ ရရှိခဲ့ကြသည့် လုပ်ငန်းအော်ဒါသစ်များမှာ ဇူလိုင်လတွင် ကျဆင်းခဲ့ပြီး အော်ဒါသစ်များမှာ ဒုတိယလအထိ ဆက်တိုက်ကျဆင်း လာခဲ့ပြီး ကျဆင်းမှုနှုန်းမှာမူ နှစ်နှစ်အတွင်း အမြန်ဆုံးသို့ အရှိန်မြင့်တက် သွားခဲ့သည်။ ထောက်ပြခဲ့သူ အများစုက စားသုံးသူတို့၏ ဝယ်နိုင်စွမ်းအား ပျော့လာခြင်းမှာ ဖောက်သည်များဘက်မှ ဝယ်လိုအားကို လျှော့ချပစ်ခဲ့သည်ဟု ယူဆသည်။ အခြားကုမ္ပဏီများကမူ ကုန်ကြမ်းပစ္စည်း ရှားပါးမှုကြောင့် အချို့ကိစ္စများတွင် အော်ဒါသစ်များကို ငြင်းပယ်ခဲ့ရကြောင်း သိရသည်။