ရှမ်းပြည်နယ် (မြောက်ပိုင်း) အတွင်းရှိ တိုက်ပွဲများ ရပ်တန့်နိုင်ရေးအတွက် တွေ့ဆုံ ဆွေးနွေးအဖြေရှာရန် TNLA ဘက်မှ ရှမ်းပြည်ပြန်လည်ထူထောင်ရေးကောင်စီ (RCSS) ထံ စာပေးပို့ထားသည့်မှာ အချိန်ကြာမြင့်နေပြီဖြစ်သော်လည်း RCSS ဘက်က အကြောင်းပြန်ခြင်း မရှိသေးကြောင်း TNLA သတင်းနှင့်ပြန်ကြားရေးဌာနမှ ပြောရေးဆိုခွင့်ရှိသူ ဗိုလ်မှူးကြီး တာအိုက်ကျော်က ပြောကြားသည်။
ပြီးခဲ့သည့် ဇူလိုင်လ ဒုတိယပတ်မှ စတင်ကာ ရှမ်းပြည်နယ်မြောက်ပိုင်းတွင် တိုင်းရင်းသားလက်နက်ကိုင် အဖွဲ့အစည်းများဖြစ်ကြသည့် ရှမ်းပြည်ပြန်လည်ထူထောင်ရေးကောင်စီ (RCSS) နှင့် ရှမ်းပြည်တိုးတက်ရေးပါတီ (SSPP)၊ တအန်းလက်နက်ကိုင်အဖွဲ့ (TNLA) ပူးပေါင်းအဖွဲ့တို့ တိုက်ပွဲများဖြစ်ပွားခဲ့ကြသည့်အတွက် ဒေသခံ ၁၀၀၀ ကျော်မှာ နေရပ်စွန့်ခွာ စစ်ဘေးတိမ်းရှောင်ခဲ့ရသည်။
ထို့နောက် ရှမ်းပြည်နယ် မြောက်ပိုင်းထဲတွင် RCSS နှင့် SSPP၊ TNLA ပူးပေါင်းအဖွဲ့တို့အကြား တိုက်ပွဲများ မကြာခဏဖြစ်ပွားနေခဲ့ပြီး RCSS အနေဖြင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) တွင် ပါဝင်လက်မှတ်ရေးထိုးခဲ့ပြီးနောက် ရှမ်းပြည်နယ် မြောက်ပိုင်းထဲတွင် RCSS နှင့် TNLA တို့အကြား တိုက်ပွဲဖြစ်ပွားမှုများ ပိုမိုပြင်းထန်လာခဲ့ခြင်းဖြစ်သည်။
“ရှမ်းမြောက်တိုက်ပွဲတွေနဲ့ ပတ်သက်လို့ နဂိုကတည်းက ကျွန်တော်တို့မှာ ရပ်တည်ချက်ရှိတယ်။ NCA လက်မှတ်ရေးထိုးပြီးတဲ့ နောက်ပိုင်းမှာ RCSS က ကျွန်တော်တို့ ဒေသကို ရောက်လာတယ်။ ရောက်လာတဲ့အတွက် တိုက်ပွဲတွေ ဖြစ်လာကြတယ်။ ဒီတိုက်ပွဲတွေနဲ့ ပတ်သက်လို့ တွေ့ဆုံဆွေးနွေးမှုတွေ ပြုလုပ်ဖို့လိုတယ်။ ကျွန်တော်တို့ဘက်က တွေ့ဆုံဆွေးနွေးဖို့လည်း အဆင်သင့်ရှိတယ်။ ပြီးခဲ့တဲ့ နှစ်ဆန်းပိုင်းတုန်းက တစ်ကြိမ်တွေ့ခဲ့တယ်။ နောက်ထပ်တွေ့ဆုံကြဖို့လည်း သဘောတူညီချက် ရထားတယ်။ သူတို့ဆီကိုလည်း တွေ့ဆုံဆွေးနွေးဖို့အတွက် စာပို့ထားတယ်။ ဒါပေမဲ့ အခုအချိန်အထိ ဘာမှပြန်ကြားလာတာ မရှိဘူး” ဟု ဗိုလ်မှူးကြီး တာအိုက်ကျော်က ပြောကြားသည်။
ရှမ်းပြည်နယ် မြောက်ပိုင်းအတွင်းရှိ နမ္မတူမြို့နယ်၊ သီပေါမြို့နယ်၊ ကျောက်မဲမြို့နယ်စသည့် မြို့နယ်များတွင် တပ်မတော်၊ RCSS နှင့် TNLA တို့အကြား သုံးပွင့်ဆိုင် တိုက်ပွဲများ မကြာခဏဖြစ်ပွားနေသည့်အတွက် ဒေသခံများလည်း မကြာခဏ နေရပ်စွန့်ခွာ ထွက်ပြေးတိမ်းရှောင်နေရပြီး ရှမ်းပြည်တိုးတက်ရေးပါတီ (SSPP) ကမူ NCA တွင် လက်မှတ်ရေးထိုးထားခြင်း မရှိသော်လည်း ရှမ်းပြည်နယ်မြောက်ပိုင်းထဲတွင် တိုက်ပွဲဖြစ်ပွားမှု နည်းပါးသော တိုင်းရင်းသားလက်နက်ကိုင် အဖွဲ့အစည်းတစ်ခုဖြစ်သည်။
ထို့ပြင် မြောက်ပိုင်းမဟာမိတ် တိုင်းရင်းသားလက်နက်ကိုင် အဖွဲ့ဝင်များဖြစ်သည့် ရှမ်းပြည်တိုးတက်ရေးပါတီ (SSPP) နှင့် တအန်းလက်နက်ကိုင်အဖွဲ့ (TNLA) တို့ အကြားတွင်လည်း နားလည်မှုလွဲမှားရာမှ တစ်ဆင့် ရှမ်းပြည်နယ်မြောက်ပိုင်းထဲတွင် တစ်ခါတစ်ရံ တိုက်ပွဲများ ဖြစ်ပွားခြင်းကြောင့် ဒေသခံများမှာ ထိခိုက်နစ်နာမှုများ ဖြစ်ပေါ်ခဲ့ရသည်။
သို့သော်လည်း ရှမ်းပြည်နယ်မြောက်ပိုင်းထဲတွင် တိုင်းရင်းသားလက်နက်ကိုင် အဖွဲ့အစည်း အချင်းချင်းဖြစ်သည့် RCSS နှင့် TNLA တို့အကြား တိုက်ပွဲများရပ်တန့်ရေးအတွက် သက်ဆိုင်ရာ အရပ်ဘက် အဖွဲ့အစည်းများက တိုက်တွန်း တောင်းဆိုနေသော်လည်း ယနေ့တိုင်ဖြေရှင်းနိုင်ခြင်း မရှိသေးပေ။
“ကျွန်တော်တို့ဘက်ကတော့ တွေ့ဆုံ ဆွေးနွေးဖို့အတွက် အမြဲတမ်း အဆင်သင့်ရှိတယ်။ အမြဲတမ်းအားတယ်။ လက်ကမ်းကြိုဆိုတယ်။ သူတို့ဘက်က အကြောင်းမပြန်တဲ့ အတွက်သာ ဘာမှလုပ်ငန်းမစတင်နိုင်သေးဘူး ဖြစ်နေတာ။ အခုအထိလည်း ကျွန်တော်တို့ဘက်က ရပ်တည်ချက်က ဒီအတိုင်းပါပဲ” ဟု ဗိုလ်မှူးကြီး တာအိုက်ကျော်က ပြောကြားသည်။
ရှမ်းပြည်နယ် မြောက်ပိုင်းအတွင်း ဖြစ်ပွားနေသော RCSS နှင့် TNLA တို့အကြား တိုက်ပွဲများ ရပ်တန့်နိုင်ရေး တွေ့ဆုံဆွေးနွေးရေးကိစ္စနှင့် ပတ်သက်၍ ရှမ်းပြည်ပြန်လည် ထူထောင်ရေး ကောင်စီ (RCSS) ပြောရေးဆိုခွင့်ရှိသူများထံ ဆက်သွယ် မေးမြန်းခဲ့သော်လည်း ဆက်သွယ်၍မရခဲ့ပေ။
