သတင်းများ ထွက်ပေါ်နေသည့် ပိတ်သိမ်းမည်ဆိုသော စက်ရုံပေါင်း ၁၄ ခုတွင် ခုနစ်ခုသာ MIC ခွင့်ပြုလုပ်ငန်းဖြစ်ပြီး ယင်းစက်ရုံ ခုနစ်ခုအနက် နှစ်ခုသာ အမှန်တကယ် ပိတ်သိမ်းခြင်းဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA) မှ ဒုတိယညွှန်ကြာရေးမှူးချုပ် ဦးသန်းအောင်ကျော်က ပြောကြားသည်။
“ဒီ ၁၄ ခုကိစ္စပေါ့နော် ကျွန်တော်တို့လည်း အားလုံးမေးပြီး စိစစ်ထားတယ်။ ဒီ ၁၄ ခုမှာ ပိတ်သိမ်းတယ်ဆိုတာ စိစစ်တဲ့အခါမှာ အဲမှာ ကော်မရှင် (MIC) ခွင်ြ့ပုလုပ်ငန်းက ခုနစ်ခုပါတယ်။ လုံးဝဖျက်သိမ်းမယ်ဆိုပြီးတော့ မကိုက်လို့မလုပ်တော့ဘူးဆိုပြီးတော့ ကော်မရှင်ကို ပြန်အပ်တာ ဥပဒေနဲ့အညီ ပြန်အပ်နှံတာ နှစ်ခုရှိတယ်” ဟု ဦးသန်းအောင်ကျော်က ပြောကြားသည်။
လုံးဝပိတ်သိမ်းပြီး ဥပဒေနှင့်အညီ ပြန်လည်အပ်ထားသည့် ကုမ္ပဏီနှစ်ခုမှာ Chamzon Apparel Manufactyring Co.,Ltd နှင့် Success Time International Co.,Ltd တို့ဖြစ်သည်။
မြေနေရာ အကျယ်အဝန်းအခက်အခဲကြောင့် လက်ရှိလုပ်ကိုင်နေသည့် စက်မှုဇုန်အတွင်းကနေ ပြောင်းရွှေ့ကာ အခြားနေရာတွင် ဆက်လက်လုပ်ကိုင်နေသော ကုမ္ပဏီ ကုမ္ပဏီတစ်ခုရှိကြောင်း ယင်းကုမ္ပဏီမှာ United Beauty Palace Myanmar Co.,Ltd ဖြစ်သည်။
“နောက်တစ်ခုကတော့ ဒီနေရာမှာ လုပ်ရတာ ကျပ်တယ်။ နေရာပေါင်းတာ။ စက်မှုဇုန်မှာကတော့ ပြောင်းသွားတော့ ပိတ်တာဖြစ်တာ။ ဒီကိုတင်တယ်။ ဒီကခွင့်ပြုချက်နဲ့ ပြောင်းသွားတာ” ဟု ဦးသန်းအောင်ကျော်က ပြောကြားသည်။
ယခင်ကပင် ကော်မရှင်၏ ခွင့်ပြုမိန့်ကို နှစ်ခုရယူထားပြီး အော်ဒါအမှာစာရရှိမှု အခက်အခဲကြောင့် ရန်ကုန်ခွင့်ပြုမိန့်အား အပ်နှံပြီး စက်ပစ္စည်းများအား ပုသိမ်စက်ရုံသို့ ရွှေ့ပြောင်း၍ ဆက်လက်ဆောင်ရွက်သွားမည့် ကုမ္ပဏီဖြစ်သည်။ ယင်းကုမ္ပဏီမှာ North Shore Group Co.,Ltd ဖြစ်သည်။
“နောက်နှစ်ခုကတော့ ကော်မရှင်ခွင့်ပြုမိန့် ရန်ကုန်ကနေ ပုသိမ်ကို ပြောင်းတာတစ်ခုရှိတယ်။ သူကနှစ်ခုယူထားတာ အရင်ကထဲက ရန်ကုန်တစ်ခု ပုသိမ်တစ်ခု ရန်ကုန်ကဟာက စက်ရုံကဟောင်းနေတယ် သူက နိုင်ငံတကာအော်ဒါကို ချုပ်တဲ့အခါမှာ စာရင်းစစ်ကိုလွှတ်တယ် အရည်အသွေး မှန် မမှန် စက်ရုံရဲ့ အခင်းအကျင်း အလုပ်သမား စက်ရုံရဲ့ သန့်ရှင်းမှု pass မဖြစ်ဘူး။ သုံးနှစ်လောက်ကြာတဲ့အခါမှာ အော်ဒါရဖို့ မသေချာတဲ့အတွက် ပုသိမ်ကိုပြောင်းတာ ပုသိမ်ကို pass ပေးတာ ဟိုဘက်က ပုသိမ်ဘက်ကို ပြောင်းတာ” ဟု ဦးသန်းအောင်ကျော်က ပြောကြားသည်။
ပိတ်သိမ်းခြင်းလုံးဝမရှိဘဲ လုပ်ငန်းလည်ပတ်နေသည့် ကုမ္ပဏီနှစ်ခုရှိပြီး ယင်းကုမ္ပဏီများမှာ Popular International Garment Manufacturing Co.,Ltd နှင့် United Knitting (Myanmar) C0.,Ltd တို့ဖြစ်သည်။
ပုလဲအထည်ချုပ် ကုမ္ပလီမိတက်အနေဖြင့် ပိတ်သိမ်းရန် ခွင့်ပြုမိန့်ပြန်လည် အပ်နှံခွင့်တင်ပြမည်ဖြစ်ကြောင်း ရင်းနှီးမြှုပ်နှံမှု ကော်မရှင်သို့ အကြောင်းကြားထားခြင်းဖြစ်ကြောင်း သိရသည်။
“ကျွန်တော်ပြောချင်တာ ခုနစ်ခုမှာ နှစ်ခုက တကယ်ပဲပိတ်တယ် ပြန်အပ်တယ်။ နောက်တစ်ခုကတော့ ကျယ်တဲ့နေရာကို ရွှေ့တယ်။ နောက်တစ်ခုက စက်ရုံနှစ်ခုထောင်ပြီးတော့ တစ်ခုကို ပိတ်ပြီးတော့ ပုသိမ်ကို ရွှေ့သွားတာက တစ်ခုလုံးဝမပိတ်ဘဲလည်နေတာက နှစ်ခု၊ ပြန်လည်အမိန့်အပ်နှံမယ်ဆိုပြီးတော့ တင်ပြထားတာက တစ်ခုဖြစ်ပါတယ်” ဟု ဦးသန်းအောင်ကျော်က ပြောကြားသည်။