<

လျှပ်စစ်ဓာတ်အား ဖြန့်ဖြူးရေးလုပ်ငန်းမှ လျှပ်စစ်မီတာများ တင်ဒါခေါ်ယူရာတွင် ပွင့်လင်းမြင်သာမှုမရှိကြောင်း သတင်းစာရှင်းလင်း

လျှပ်စစ်ဓာတ်အား ဖြန့်ဖြူးရေးလုပ်ငန်းမှ လျှပ်စစ်မီတာများ တင်ဒါခေါ်ယူရာတွင် ပွင့်လင်းမြင်သာမှုမရှိကြောင်း Ever  မီတာစက်ရုံမှ သတင်းစာရှင်းလင်းပွဲအား ဇူလိုင် ၃၀ ရက်တွင် ရန်ကုန်မြို့ရှိ Park Royal ဟိုတယ်တွင် ကျင်းပခဲ့သည်။

“လျှပ်စစ်ဓာတ်အားဖြန့်ဖြူးရေးလုပ်ငန်း ၂၀၁၆ ခုနှစ် ဇွန် ၂၂ ရက်နေ့မှာ တင်ဒါခေါ်ယူပါတယ်။ ခေါ်ယူတဲ့အချိန်မှာ ယှဉ်ပြိုင်တဲ့ကုမ္ပဏီနှစ်ခု အောင်မြင်တယ်။ စက်တင်ဘာမှာ ကျွန်တော်တို့ကို စာထုတ်ပြီး ပယ်ဖျက်လိုက်တယ်။ ကျွန်တော် တစ်ဦးတည်းအောင်တဲ့အတွက် ပယ်ဖျက်လိုက်တယ်။ ပထမအကြိမ်ကို ဘာမှမပြောလိုပါဘူး။ ဒုတိယအကြိမ်မှကျတော့ တင်ဒါလည်းခေါ်ရော ၂၀၁၇ ဇန်န၀ါရီမှာ တင်ဒါခေါ်ပါတယ်။ ကျွန်တော်တို့က ၀န်ကြီးဌာနကို လေးစားလို့ တင်ဒါဝင်ရောက်ယှဉ်ပြိုင်တာ ဖြစ်ပါတယ်။ ကိုယ့်ပြည်တွင်းမှာ ထုတ်တဲ့ စက်ရုံကနေ ၀င်ပြိုင်တာဖြစ်ပါတယ်။ ကုမ္ပဏီငါးခု ၀င်ပြိုင်တယ်။ နှစ်ခုပဲအောင်တယ်လို့ ပြောတယ်။ အဲဒီအချိန်မှာ ဘာဖြစ်လဲဆိုတော့ ကုမ္ပဏီတစ်ခုရဲ့ မီတာက နို့ဆီဝက်တစ်ဝက်ပဲ ရှိတယ်။ တင်ဒါခေါ်ထားတဲ့ အချက်အလက်တွေနဲ့လည်း မကိုက်ညီဘူး။ ဒါကို ခွင့်ပြုလိုက်တယ်။ တင်ဒါကို စစ်ပေးပါဆိုပြီး တောင်းဆိုတာကို စစ်စေးပေးတာမရှိဘူး။ ဒုတိယ တင်ဒါမပြီးခင် တတိယတင်ဒါကို ထက်ခေါ်တယ်။ ၂၃ ရက် ဇန်န၀ါရီ ၂၀၁၇ ခုနှစ်မှာ တင်ဒါထက်ခေါ်တယ်။ ခေါ်တဲ့အချိန်က ပိုဆိုးသွားတယ်။ နမူနာမီတာတွေ ပါရမယ်ဆိုပြီး ပြောတယ်။ ကုမ္ပဏီ ကိုးခုတင်တယ်။  Junction River ဆိုတဲ့ကုမ္ပဏီက တင်ဒါအောင်တယ်။ သူက တရုတ်ကသွင်းတာ။ ဒါပေမဲ့ မူလပစ္စည်းမှာပါတဲ့ အချက်အလက်တွေကို ပြင်ဆင်လိုက်တယ်”ဟု  Ever မီတာ စက်ရုံမှ မန်နေးဂျင်းဒါရိုက်တာ ဦးမျိုးအောင်က ပြောကြားသည်။

ပြည်တွင်းထုတ်စက်ရုံအား အကြိမ်ကြိမ် နှိပ်ကွပ်ဖျက်ဆီးသည့် ဖြစ်ရပ်မျိုးသည် ပြည်တွင်စက်ရုံတချို့ ပိတ်သိမ်းနေရချိန်တွင် အစိုးရမှ ထပ်မံပိတ်သိမ်းရအောင် တွန်းအားပေးနေသကဲ့သို့ ဖြစ်နေကြောင်း၊ နိုင်ငံတော် အကြီးအကဲများအနေဖြင့် ရေရှည်တွင် ပထ၀ီ နိုင်ငံရေးအရ အမျိုးသားနိုင်ငံရေးကို ထည့်သွင်းစဉ်းစားရန် လိုအပ်ကြောင်း၊ ပြည်တွင်း ဒေါ်လာဈေးများမြင့်တက်ရခြင်း၏ အကြောင်းရင်းသည် နိုင်ငံခြားငွေလိုအပ်ချက်များပြားသည့် အတွက်ဖြစ်ပြီး ယခုတင်ဒါကဲ့သို့ ဒေါ်လာ ၁၆ သန်းဆိုလျှင် လိုအပ်ချက်ပိုမိုမြင့် တက်နိုင်ကြောင်း ဦးမျိုးအောင်က ပြောကြားသည်။

ထို့ပြင် ပြည်တွင်းထုတ်မီတာဖြစ်ပြီး သွင်းကုန်အစားထိုးထုတ်လုပ်နိုင်ခြင်း၊ နိုင်ငံခြားငွေသုံးစွဲမှုလျှော့ချနိုင်ခြင်း၊ ပြည်တွင်း နည်းပညာမြင့်တက်လာပါက ပြည်ပတင်ပို့ ရောင်းချနိုင်ခြင်း၊ ပြည်တွင်း၌ အလုပ်အကိုင် အခွင့်အလမ်းများ ပိုမိုရရှိလာနိုင်ခြင်းတို့ကြောင့် အလွှာအသီးသီးတွင် တစ်ဦးချင်း ၀င်ငွေတိုးတက်လာနိုင်ပြီး နိုင်ငံ၏ GDP တိုးတက်လာမည်ဖြစ်ကြောင်း၊ လျှပ်စစ်နှင့် စွမ်းအင်ဝန်ကြီးဌာန၏ ဂုဏ်သိက္ခာကို မထောက်ထားဘဲ တရားမျှတမှုမရှိသည့် တင်ဒါများကို သုံးကြိမ်တိုင် အဂတိဖြင့် ဆောင်ရွက်ခဲ့သဖြင့် သက်ဆိုင်ရာတင်ဒါစိစစ် ရွေးချယ်အတည်ပြုရေးကော်မတီအား လုပ်ငန်းရှင်များ မျှော်လင့်အားကိုးနေသည့် အဂတိလိုက်စားမှု တိုက်ဖျက်ရေးကော်မရှင်အဖွဲ့နှင့် ပညာရှင်များ ပူးပေါင်းပြီး မျက်နှာချင်းဆိုင် တွေ့ဆုံကာ အချက်တစ်ခုချင်းစီကို သက်သေအထောက်အထားများဖြင့် ဖော်ထုတ်ပေးစေလိုကြောင်း ဦးမျိုးအောင်က ဆက်လက် ပြောကြားသည်။

July 30, 2018














Copy Protected by Chetan's WP-Copyprotect.