တပ်မတော်သည် အမျိုးသားရေးကို ဦးစားပေး ဆောင်ရွက်နေကြောင်း တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဇူလိုင် ၂၆ ရက်တွင် ရုရှားဖက်ဒရေးရှင်းနိုင်ငံ အောက်လွှတ်တော် နိုင်ငံတကာရေးရာကော်မတီ၏ ဒုတိယဥက္ကဋ္ဌ Mr. Alexei Chepa နှင့်တွေ့ဆုံရာတွင် ပြောကြားခဲ့ခြင်း ဖြစ်ကြောင်း တပ်မတော် ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

ထိုသို့ တွေ့ဆုံစဉ် တပ်မတော် ကာကွယ်ရေးဦးစီးချုပ်က မြန်မာနိုင်ငံနှင့် ရုရှားနိုင်ငံ နှစ်နိုင်ငံသည် ရှေးယခင်ကတည်းက ချစ်ကြည်ရင်းနှီးသည့် မိတ်ဆွေဟောင်း၊ မိတ်ဆွေကောင်းနိုင်ငံများ ဖြစ်ပြီး နိုင်ငံခေါင်းဆောင်များသည်လည်း ချစ်ကြည်ရင်းနှီးမှု ရှိကြောင်း၊ ယခုကဲ့သို့ ရုရှားလွှတ်တော်မှ ကိုယ်စားလှယ်များနှင့် တပ်မတော် တွေ့ဆုံခြင်းသည် ပထမဆုံးအကြိမ် ဖြစ်ကြောင်း၊ မိမိတို့နိုင်ငံတွင် နိုင်ငံရေးအရ တည်ငြိမ်မှု၊ လုံခြုံရေးအရ တည်ငြိမ်မှုရှိရန် လိုအပ်လျက်ရှိပါကြောင်း၊ ၁၉၈၈ ခုနှစ် မှ ၂၀၁၁ ခုနှစ်အထိ တပ်မတော်အစိုးရ၏ ဦးဆောင်မှုဖြင့် ဆောင်ရွက်ခဲ့ပြီး ပြည်သူများမှ လိုလားသည့် ပါတီစုံ ဒီမိုကရေစီစနစ်ကို လျှောက်လှမ်းနိုင်ရန်အတွက် တပ်မတော်အစိုးရမှ ပြုပြင်ပြောင်းလဲမှုများ ဆောင်ရွက်ခဲ့ကြောင်း၊ ၂၀၁၁ ခုနှစ်တွင် ဖွဲ့စည်းပုံ အခြေခံဥပဒေအသစ်ဖြင့် ရွေးချယ်တင်မြှောက်ခံ အစိုးရသို့ စနစ်တကျ လွှဲပြောင်းပေးနိုင်ခဲ့ကြောင်း၊ ယခုအခါတွင် ဒုတိယမြောက် ရွေးချယ်ခံအစိုးရ ကာလသာ ရှိသေးပြီး အတွေ့အကြုံများစွာ နုနယ်သဖြင့် နိုင်ငံရေးအရ ပြည့်စုံမှု မရှိသေးကြောင်း၊ လွှတ်တော်များသည် ဥပဒေပြုရေးကို အဓိက ဆောင်ရွက်ရကြောင်း၊ မိမိတို့နိုင်ငံ၏ ပထမအစိုးရ လွှတ်တော်သက်တမ်းတွင် လွှတ်တော် ကိုယ်စားလှယ်များကို ရွေးချယ်ရာ၌ နိုင်ငံရေး အတွေ့အကြုံရှိသူများ၊ ပါတီများမှ ရွေးချယ်ခံ လွှတ်တော်ကိုယ်စားလှယ် ၇၅ ရာခိုင်နှုန်းနှင့် တပ်မတော်သား လွှတ်တော် ကိုယ်စားလှယ် ၂၅ ရာခိုင်နှုန်း ပါဝင်ခဲ့ကြောင်း၊ ယခု ဒုတိယအကြိမ် လွှတ်တော်သက်တမ်းတွင်လည်း ရွေးချယ်ခံ နိုင်ငံရေးပါတီ ကိုယ်စားလှယ် ၇၅ ရာခိုင်နှုန်း၊ တပ်မတော်သား လွှတ်တော်ကိုယ်စားလှယ် ၂၅ ရာခိုင်နှုန်းပင် ဖြစ်ကြောင်း၊ တပ်မတော်သည် အမျိုးသားရေးကို ဦးစားပေး ဆောင်ရွက်နေခြင်း ဖြစ်ကြောင်း စသည်ဖြင့် ပြောကြားခဲ့သည်။