၂၀၁၁-၂၀၁၂ ဘဏ္ဍာနှစ်မှ ကြားကာလ ၂၀၁၈ ဘဏ္ဍာနှစ်တို့ အပါအဝင် ၂၀၁၈- ၂၀၁၉ ဘဏ္ဍာနှစ်အထိ ဘဏ္ဍာနှစ် ကိုးနှစ်အတွင်း စံချိန်တင် လိုငွေများခဲ့သည့် ၂၀၁၈- ၂၀၁၉ ဘဏ္ဍာနှစ် ဘတ်ဂျက်ကို တစ်ဒေါ်လာ ကျပ် ၁၃၆၀ ဖြင့် ရေးဆွဲထားပြီး ဇူလိုင် ၂၆ ရက် ဗဟိုဘဏ် ရည်ညွှန်းငွေလဲနှုန်းမှာ တစ်ဒေါ်လာ ၁၄၂၇ ကျပ် ဖြစ်သဖြင့် တစ်ဒေါ်လာ ၆၇ ကျပ်အထိ ကွာဟမှု ဖြစ်ပေါ်နေကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။

ထိုသို့ တစ်ဒေါ်လာ ကျပ် ၁၃၆၀ ဖြင့် ရေးဆွဲထားသည့် ဘတ်ဂျက်ကို လက်ရှိ ဖြစ်ပေါ်နေသည့် ရည်ညွှန်း ငွေလဲနှုန်း ၁၄၂၇ ကျပ်ဖြင့် ပြန်လည် တွက်ချက်ပါက လက်ရှိဖြစ်ပေါ်နေသည့် ဘတ်ဂျက်လိုငွေ ကျပ် ၄၉၀၃ ဘီလျံထက် လိုငွေ ပိုမိုမြင့်တက်ဖွယ် ရှိကြောင်း သိရသည်။

၂၀၁၈-၂၀၁၉ ဘဏ္ဍာနှစ်တွင် ဘတ်ဂျက်လိုငွေ အများဆုံး တောင်းခံထားသည့် ဌာနများမှာ နိုင်ငံခြားငွေအများအပြား အသုံးပြုလေ့ရှိသည့် ကာကွယ်ရေးဝန်ကြီးဌာန၊ လျှပ်စစ်နှင့် စွမ်းအင်ဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ၊ စက်မှုဝန်ကြီးဌာန၊ ဆောက်လုပ်ရေးဝန်ကြီးဌာန စသည့်ဌာနများ ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။

NLD အစိုးရ တာဝန်ယူနေသည့် ကာလအတွင်း ၂၀၁၆ ခုနှစ် ဧပြီ ၄ ရက်တွင် တစ်ဒေါ်လာ ကျပ် ၁၂၁၀ သာ ရှိနေသော်လည်း ၂၀၁၈ ခုနှစ် ဇူလိုင် ၂၆ ရက်တွင် တစ်ဒေါ်လာ ၁၄၂၇ ကျပ် ဖြစ်သဖြင့် မြန်မာကျပ်ငွေတန်ဖိုး ကျဆင်းမှု ဆိုးရွားစွာ ဖြစ်ပေါ်နေသည်။ ထို့ပြင် တစ်ဒေါ်လာလျှင် ကျပ် ၁၅၀၀ အထိ မြင့်တက်ဖွယ် ရှိကြောင်း ခန့်မှန်းနေသဖြင့် မြန်မာကျပ်ငွေတန်ဖိုး ကျဆင်းမှု ပိုမိုဆိုးရွားဖွယ် ရှိနေကြောင်း သိရသည်။

မြန်မာနိုင်ငံ၌ လက်ရှိ ဘတ်ဂျက်ရေးဆွဲသည့် ပုံစံမှာ နိုင်ငံခြားငွေ ရရှိသုံးစွဲမှုများအတွက် နိုင်ငံခြားငွေနှင့် ညီမျှသော မြန်မာကျပ်ငွေကို ဘတ်ဂျက်တွင် လျာထားခြင်း ဖြစ်သော်လည်း ပြည်တွင်း၌ နိုင်ငံခြားသုံးငွေ ဈေးကွက် ဖွံ့ဖြိုးခြင်း မရှိသေး၍ အစိုးရထံမှ နိုင်ငံခြားသုံးငွေကို တောင်းခံ သုံးစွဲနေရသည့် ပုံစံဖြစ်ပြီး အဆိုပါ အခြေအနေကို ပြင်ဆင်ရန် ပြည်တွင်း နိုင်ငံခြားသုံးငွေ ဈေးကွက်မှာလည်း ဖွံ့ဖြိုးရန် လိုအပ်မည်ဖြစ်ကြောင်း ၂၀၁၈ ခုနှစ် ပြည်သူ့ဘဏ္ဍာရေး စီမံခန့်ခွဲမှုစနစ် ပြုပြင်ပြောင်းလဲရေး မဟာဗျုဟာတွင် ဖော်ပြထားသည်။ သို့သော် လက်ရှိအချိန်အထိ နိုင်ငံခြားသုံးငွေ ဈေးကွက်မှာ ဖွံ့ဖြိုးမှုမရှိဘဲ အစိုးရထံမှ နိုင်ငံခြားငွေကို တောင်းခံရယူသည့် အဆင့်သာ ရှိနေသည်။

“လိုအပ်တဲ့ ပစ္စည်းတွေ၊ ယန္တရားတွေ ဝယ်တဲ့အခါကျတော့ နိုင်ငံခြားငွေနဲ့ပဲ ရှင်းရတာကိုး။ နိုင်ငံခြားငွေနဲ့ ရှင်းတဲ့အခါ ဘာပဲပြောပြော အစိုးရရဲ့ဘဏ္ဍာငွေ၊ ဘတ်ဂျက်ထဲကပဲ သုံးရတာတွေ ရှိနိုင်တယ်။ အဲဒီလိုကျတော့ ဘယ်လိုပုံစံ ငွေပေးငွေယူ ရှင်းတမ်းတွေ လုပ်မလဲ။ နိုင်ငံခြားငွေ ဆိုတာက ပြည်ပပို့ကုန်တွေ (ကုန်စည်တွေ ဝန်ဆောင်မှုတွေ) က ရတာပေါ့။ သူများနိုင်ငံတွေ ကျတော့ ဒီနှစ်မျိုးတည်းနဲ့ မကတော့ဘူး။ မျိုးစုံရှိတယ်။ အစုရှယ်ယာ ဝယ်ယူတာမျိုး အကျိုးအမြတ်တွေ ရတာပေါ့။ ကျွန်တော်တို့က အဲဒီအဆင့်ကို မရောက်သေးဘူး။ ကျွန်တော်တို့က ဝန်ဆောင်မှု ဆိုတာတောင် ဝန်ဆောင်မှုက မြင့်မြင့်မားမား ရနိုင်တာ မရှိသေးဘူး။ ကုန်စည်ကပဲ ရနေသေးတယ်။ အဲဒီကုန်စည်တွေမှာကိုတောင် သယံဇာတ ဝင်ငွေတွေပဲ ရှိနေသေးတယ်။ အဲဒီလိုငွေတွေကို သုံးမယ်ဆိုရင် ဝန်ကြီးဌာနတွေ အနေနဲ့လည်း သေသေချာချာ စဉ်းစားဖို့ လိုတယ်” ဟု မူဝါဒဆိုင်ရာ စီးပွားရေးပညာရှင် ဒေါက်တာအောင်ကိုကိုက သုံးသပ်ထားသည်။

လက်ရှိအစိုးရ လက်ထက်တွင် ဘတ်ဂျက်လိုငွေ စံချိန်တင် မြင့်မားနေပြီး ယခင် အစိုးရလက်ထက် ငါးနှစ်သက်တမ်းအတွင်း လိုငွေ ကျပ်ဘီလျံ ၈၀၂၈ သာ ရှိခဲ့သော်လည်း လက်ရှိအစိုးရ လက်ထက်တွင် ကနဦးစာရင်းများအရ လိုငွေမှာ ကျပ်ဘီလျံ ၁၈၂၆၉ ဘီလျံကျော် ဖြစ်ပေါ်နေသည်။

ထို့ပြင် ၂၀၁၈ ခုနှစ် ဘဏ္ဍာနှစ်၏ ခြောက်လတာ ဘတ်ဂျက်တွင် နိုင်ငံခြားငွေ အသုံးစရိတ်များအတွက် ငွေကြေးလဲလှယ်နှုန်းကို ဈေးကွက်တွင် မဖြစ်ပေါ်ခဲ့သည့် နှုန်းထားများဖြစ်သည့် တစ်ဒေါ်လာ ကျပ် ၁၃၈၀ ဖြင့် ရေးဆွဲထားမှုမှာ မြန်မာကျပ်ငွေ တန်ဖိုးကျဆင်းမှုအပေါ် အကျိုးသက်ရောက်စေနိုင်မည်ဖြစ်ပြီး အဆိုပါနှုန်းထားကို ဈေးကွက်တွင် အမှန်တကယ် ဖြစ်ပေါ်ခဲ့သည့်နှုန်းထားကိုသာ အခြေခံတွက်ချက်ရန် လိုအပ်ကြောင်း ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီက သုံးသပ် အကြံပြုထားသည်။