ကုလသမဂ္ဂလုံခြုံရေးကောင်စီ တံခါးပိတ်အစည်းအဝေးက ဘင်္ဂါလီမွတ်စလင်ဒုက္ခသည်များ ဘေးကင်းလုံခြုံစွာ ပြန်လာနိုင်ရေး အဆင်ပြေအောင်ပြုလုပ်ပေးရန် မြန်မာနိုင်ငံကို တောင်းဆို

ကုလသမဂ္ဂလုံခြုံရေးကောင်စီ တံခါးပိတ်အစည်းအဝေးက ဘင်္ဂါလီမွတ်စလင်ဒုက္ခသည်များ ဘေးကင်းလုံခြုံစွာ ပြန်လာနိုင်ရေး အဆင်ပြေအောင်ပြုလုပ်ပေးရန် မြန်မာနိုင်ငံကို တောင်းဆို
Published 25 July 2018

ဘင်္ဂါလီမွတ်စလင်ဒုက္ခသည်များ မိမိတို့သဘောဆန္ဒအလျောက် ဘေးကင်းလုံခြုံစွာ ပြန်လာနိုင်ရေးအတွက် အားထုတ်မှုများကို မြှင့်တင်ရန် ကုလသမဂ္ဂလုံခြုံရေးကောင်စီက ဇူလိုင် ၂၃ ရက်တွင် မြန်မာနိုင်ငံအား တောင်းဆိုခဲ့သည်။

အဖွဲ့ဝင် ၁၅ နိုင်ငံပါဝင်သော တံခါးပိတ် အစည်းအဝေးတစ်ရပ်အတွင်း လူမှုရေးနှင့် စီးပွားရေးဆိုင်ရာ ဖွံ့ဖြိုးရေးအကူအညီများ  ပို၍ပေးရန်နှင့် ဘင်္ဂါလီမွတ်စလင်ဒုက္ခသည်များနှင့် ပြည်တွင်း၌ပင် ရွှေ့ပြောင်းခံရသောသူများအား ရခိုင်ပြည်နယ်ရှိ နေအိမ်များသို့ ပြန်လာနိုင်ရေးအကူအညီပေးရန်  တောင်းဆိုခဲ့သည်။

“လုံခြုံရေးကောင်စီ အဖွဲ့ဝင်နိုင်ငံတွေက လူ့အခွင့်အရေးအလွဲသုံးစားမှုတွေနဲ့ ချိုးဖောက်မှုတွေနဲ့ပတ်သက်တဲ့ စွပ်စွဲမှုတွေကို လွတ်လပ်ပြီး ပွင့်လင်းမြင်သာတဲ့ စုံစမ်းစစ်ဆေးမှုတွေ ပြုလုပ်ဖို့ အရေးကြီးပုံကို ဆက်လက်ပြီး အထူးပြုပြောကြားပါတယ်” ဟု လုံခြုံရေးကောင်စီက ထုတ်ပြန်သော ကြေညာချက်၌ ပြောကြားထားသည်။

မြန်မာနိုင်ငံဆိုင်ရာ ကုလသမဂ္ဂအထူး ကိုယ်စားလှယ် ခရစ္စတင်းရှာနာဘာဂျန်နာက ထွက်ပြေးလာခဲ့ကြသည့် သိန်းနှင့်ချီသော ဘင်္ဂါလီမွတ်စလင်ဒုက္ခသည်များအတွက် ရခိုင်ပြည်နယ်သို့ ပြန်လာနိုင်ရေးကို အစိုးရက လိုလားသည်ဟု ပြောကြားခဲ့သည်။

ဘာဂျန်နာက “အစိုးရအာဏာပိုင်တွေက သူတို့ကို ပြန်ခေါ်ဖို့ လိုလားတယ်လို့ တကယ်ကို ပွင့်ပွင့်လင်းလင်း ကြေညာထားပါတယ်ဟု ဆိုသည်။

သို့သော် သူက ရခိုင်ပြည်နယ်၌ လူနည်းစု မွတ်စလင်များနှင့် လူများစု ဗုဒ္ဓဘာသာ ဝင်များအကြား တင်းမာမှုများ ရှိနေဆဲဖြစ်ကြောင်း သတိပေးပြောကြားခဲ့သည်။

“အဲဒီလို သူတို့က ပြန်လက်ခံဖို့ လိုလားပေမယ့် သူတို့ ကိုယ့်သဘောဆန္ဒအလျောက်၊ ဘေးကင်းလုံခြုံစွာ၊ ဂုဏ်သိက္ခာရှိရှိနဲ့ ရေရှည်ခံတဲ့ ပုံစံမျိုးနဲ့ ပြန်လာရမှာဖြစ်ပါတယ်” ဟု ဘာဂျန်နာက ပြောကြားခဲ့သည်။

မြန်မာအရပ်သားအစိုးရအဖွဲ့ခေါင်းဆောင် ဒေါ်အောင်ဆန်းစုကြည်နှင့် ဆွေးနွေးမှုများသည် အလွန်အပြုသဘောဆောင်ကြောင်း၊ အလွန်ပွင့်ပွင့်လင်းလင်းရှိကြောင်း၊ အလွန်ရင်းနှီးမှုရှိကြောင်းလည်း ဘာဂျန်နာက ပြောကြားခဲ့သည်။

ယခုပြဿနာအား ကိုင်တွယ်မှုနှင့်ပတ်သက်၍ နိုင်ငံတကာ၏ ပြစ်တင်ဝေဖန်မှုခံနေရသော ဒေါ်အောင်ဆန်းစုကြည်သည် အခက်အခဲများနှင့် စိန်ခေါ်မှုများကို သတိပြုမိသည်ဟုလည်း ဘာဂျန်နာက ဆိုသည်။

မြန်မာနိုင်ငံဆိုင်ရာ ကုသလမဂ္ဂအထူးကိုယ်စားလှယ် ခရစ္စတင်းရှာနာဘာဂျန်နာသည် လွန်ခဲ့သည့် နှစ်လက ယခုတာဝန်ကို လက်ခံခဲ့ပြီးနောက် မြန်မာနိုင်ငံသို့ နှစ်ကြိမ်တိုင်တိုင် လာရောက်ခဲ့ပြီး မြန်မာနိုင်ငံရှိ အခြားပြည်နယ်များသို့လည်း သွားရောက်ရန် အစီအစဉ်ချထားကာ စက်တင်ဘာလတွင် မြန်မာနိုင်ငံသို့ ထပ်မံလာရောက်မည် ဖြစ်သည်။

၂၀၁၇ ခုနှစ် သြဂုတ်လအနှောင်းပိုင်းတွင် ဘင်္ဂါလီမွတ်စလင်အကြမ်းဖက်သမားများက မြန်မာနိုင်ငံ၌ နိုင်ငံမဲ့ လူနည်းစုအပေါ် မတရားဆက်ဆံခံရမှုကို ရှုတ်ချလျက် လက်နက်ကိုင်တိုက်ခိုက်မှု ပြုလုပ်ခဲ့ကြသည်။

ဘင်္ဂါလီမွတ်စလင်အကြမ်းဖက်သမားများက နယ်စပ်ရှိ လုံခြုံရေးစခန်းများကို တိုက်ခိုက်မှုများအား တုံ့ပြန်သောအားဖြင့် လွန်ခဲ့သည့် တစ်နှစ်ခန့်တွင် မြန်မာတပ်မတော်က စစ်ဆင်ရေးတစ်ရပ် ပြုလုပ်ခဲ့ပြီးနောက် ဘင်္ဂါ လီမွတ်စလင် ၇၀၀,၀၀၀ ကျော်သည် ဘင်္ဂလားဒေ့ရှ်နိုင်ငံအတွင်းသို့ ထွက်ပြေးသွားခဲ့ကြသည်။

Ref ; AFP