အစုရှယ်ယာများ၏ မူရင်းတန်ဖိုး သို့မဟုတ် အမည်ခံတန်ဖိုးဖျက်သိမ်းခြင်းနှင့် ဆက်စပ်သော ကူးပြောင်းခြင်းဆိုင်ရာ ပြဌာန်းချက်များအပါအဝင် မြန်မာနိုင်ငံကုမ္ပဏီများဆိုင်ရာ စည်းမျဉ်းများကို ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာနမှ ဇူလိုင် ၂၃ ရက်တွင် ထုတ်ပြန်လိုက်သည်။
စီမံကိန်းနှင့်ဘဏ္ဍာရေးဝန်ကြီးဌာနသည် မြန်မာနိုင်ငံကုမ္ပဏီများဥပဒေ ပုဒ်မ ၄၆၂ ပုဒ်မခွဲ (က) ပုဒ်မခွဲငယ် (၁) အရ အပ်နှင်းထားသော လုပ်ပိုင်ခွင့်ကို ကျင့်သုံး၍ ပြည်ထောင်စုအစိုးရအဖွဲ့၏ သဘောတူညီချက်ဖြင့် အဆိုပါစည်းမျဉ်းများကို ထုတ်ပြန်လိုက်ခြင်းဖြစ်ကြောင်း သိရသည်။
မြန်မာနိုင်ငံကုမ္ပဏီများဆိုင်ရာစည်းမျဉ်းများ ထုတ်ပြန်ချက်အရ အခန်း (၂) တွင် မှတ်ပုံတင်စာရင်းများနှင့် မှတ်တမ်းများကို ထိန်းသိမ်းထားရှိခြင်းနှင့် စစ်ဆေးကြည့်ရှုခြင်း၊ အခန်း (၂) တွင် တည်ဆဲကုမ္ပဏီများနှင့် အခြားအဖွဲ့အစည်းများ ပြန်လည်မှတ်ပုံတင်ခြင်းနှင့် ပြန်လည်မှတ်ပုံတင်ရန်ကာလအတွင်း နှစ်စဉ်အစီရင်ခံစာတင်ပြခြင်းမှ သက်သာခွင့်စသည်တို့ကို ဖော်ပြထားသည်။
အခန်း(၄)တွင် အစုရှယ်ယာများ၏ မူရင်းတန်ဖိုး သို့မဟုတ် အမည်ခံတန်ဖိုးဖျက်သိမ်းခြင်းနှင့် ဆက်စပ်သောကူးပြောင်းခြင်းဆိုင်ရာ ပြဌာန်းချက်များ၊ အခန်း (၅) တွင် ကုမ္ပဏီဖွဲ့စည်းပုံအခြေခံစည်းမျဉ်း၊ အခန်း (၆) တွင် အများအားဖြင့်နေထိုင်သူဒါရိုက်တာ ၊ အခန်း(၇)တွင် စီးပွားရေးလုပ်ငန်းလုပ်ကိုင် ဆောင်ရွက်ခြင်း၊ အခန်း(၈)တွင် ၁၉၅၀ ပြည့် နှစ် အထူးကုမ္ပဏီ အက်ဥပဒေအရဖွဲ့စည်းထားသော ကုမ္ပဏီများ၊ အခန်း (၉)အသေးစား ကုမ္ပဏီများနှင့်အခန်း (၁၀) အထွေထွေတို့ကို ဖော်ပြထားသည်။
တည်ဆဲကုမ္ပဏီများနှင့် အခြားအဖွဲ့အစည်းများအားလုံးသည် အီလက်ထရောနစ် မှတ်ပုံတင်စနစ်တွင် ပြန်လည်မှတ်ပုံတင်ရမည့် ကာလအတွင်း အီလက်ထရောနစ် နည်းလမ်းဖြင့်သော်လည်းကောင်း၊ အခြားနည်းဖြင့်သော်လည်းကောင်း ပြန်လည်မှတ်ပုံတင်ရန်၊ ပြန်လည်မှတ်ပုံတင်ရမည့် ကာလအတွင်း အီလက်ထရွန်နစ် မှတ်ပုံတင်စနစ်တွင် ပြန်လည်မှတ်ပုံတင်ခြင်း မပြုလုပ်ခဲ့ပါက မှတ်ပုံတင်အရာရှိသည် ထိုကုမ္ပဏီ၏အမည်ကို မှတ်ပုံတင်စာရင်းမှ ပယ်ဖျက်နိုင်ပြီး အဆိုပါ အကြောင်းကိစ္စကို နိုင်ငံတော်ပြန်တမ်းတွင် ထည့်သွင်းဖော်ပြရမည်ဖြစ်ကာ အဆိုပါ အကြောင်းကြားစာကို နိုင်ငံတော်ပြန်တမ်းတွင် ထည့်သွင်းဖော်ပြပြီးသည့်အခါ ကုမ္ပဏီသည် မှတ်ပုံတင်စာရင်းမှ ပယ်ဖျက်ပြီးဖြစ်ကြောင်း၊ သို့ရာတွင် ကုမ္ပဏီ၏ ဒါရိုက်တာများနှင့် ကုမ္ပဏီတွင် ပါဝင်သူများအားလုံး၏တာဝန်ရှိမှုများ ရှိခဲ့လျှင် ကုမ္ပဏီကို ဖျက်သိမ်းခြင်းမပြုသကဲ့သို့ ဆက်လက်အကျိုးသက်ရောက်စေရမည် ဖြစ်သည်။
