မြန်မာနိုင်ငံကုမ္ပဏီများဥပဒေ ၂၀၁၇ နှင့် ကုမ္ပဏီဆိုင်ရာ လုပ်ထုံးလုပ်နည်းရှင်းလင်းပွဲကို တွေ့ရစဉ် (ဓာတ်ပုံ-ဇေယျာငြိမ်း)
လာမည့် သြဂုတ် ၁ ရက်မှ စတင်၍ ရန်ကုန်စတော့အိတ်ချိန်းတွင် နိုင်ငံခြားသားများ အစုရှယ်ယာများ ဝယ်ယူနိုင်ပြီဖြစ်ကြောင်း ဇူလိုင် ၂၃ ရက်က UMFCCI တွင်ပြုလုပ်သည့် မြန်မာနိုင်ငံကုမ္ပဏီများ ဥပဒေ ၂၀၁၇ နှင့်ကုမ္ပဏီဆိုင်ရာ လုပ်ထုံးလုပ်နည်းရှင်းလင်းပွဲတွင် ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှူးဦးစီးဌာနမှ ညွှန်ကြားရေးမှူးချုပ်နှင့် မြန်မာနိုင်ငံရင်းနှီးမြှုပ်နံှမှုကော်မရှင် အတွင်းရေးမှူး ဦးအောင်နိုင်ဦးက ပြောကြားသည်။
“ဥပဒေအသစ်ပြဋ္ဌာန်းခြင်းနဲ့အတူ အခုဘာဆက်လုပ်မလဲဆိုတော့ အရင်ဥပဒေမှာပါတဲ့ ကန့်သက်ချက်တွေကို ပယ်ဖျက်လိုက်ပါပြီ။ အခုတော့ စတော့အိတ်ချိန်းမှာလည်း နိုင်ငံခြားသားတွေ ရှယ်ယာဝယ်လို့ရပါမယ်”ဟု ဦးအောင်နိုင်ဦးက ပြောကြားသည်။
မြန်မာနိုင်ငံကုမ္ပဏီများ ဥပဒေအဟောင်းသည် ဗြိတိသျှလက်ထက် ၁၉၁၄ ခုနှစ်က ရေးဆွဲထားခဲ့ခြင်းဖြစ်ပြီး အဆိုပါ ဥပဒေအဟောင်း၌ နိုင်ငံခြားသား၏ အစုရှယ်ယာ တစ်ရာခိုင်နှုန်းပါသည့် ကုမ္ပဏီကို နိုင်ငံခြား သားကုမ္ပဏီအဖြစ် သတ်မှတ်ထားသည်။
လက်ရှိပြင်ဆင်ထားသည့် မြန်မာနိုင်ငံ ကုမ္ပဏီများ ဥပဒေအသစ်တွင်မူ ပြည်တွင်းကုမ္ပဏီများ၌ နိုင်ငံခြားသားပိုင်ဆိုင်မှုကို ၃၅ ရာခိုင်နှုန်းအထိ ပိုင်ဆိုင်ခွင့်ကို ခွင့်ပြုပေးထားကြောင်း ဦးအောင်နိုင်ဦးက ပြောကြားသည်။
အဆိုပါ မြန်မာနိုင်ငံကုမ္ပဏီများ ဥပဒေအသစ်သည် လာမည့် သြဂုတ် ၁ ရက်တွင် စတင်အသက်ဝင်မည်ဖြစ်ပြီး စတင်အသက် ဝင်သည့်အချိန်က စတင်ကာ နိုင်ငံခြားသား များအနေဖြင့် ရန်ကုန်စတော့ အိတ်ချိန်းရှိ ပြည်တွင်းကုမ္ပဏီများ၏ အစုရှယ်ယာများကို စတင်ဝယ်ယူနိုင်မည်ဖြစ်ကြောင်း ဦးအောင်နိုင်ဦးက ပြောကြားသည်။
သို့သော်လည်း နိုင်ငံခြားသားများအနေဖြင့် အစုရှယ်ယာဝယ်ယူရာတွင် မိမိဝယ်ယူမည့် ကုမ္ပဏီပိုင်ရှယ်ယာများ၏ ၃၅ ရာခိုင်နှုန်း အထိသာ ဝယ်ယူနိုင်မည်ဖြစ်ကြောင်း သိရသည်။
ထို့ပြင် နိုင်ငံခြားသား ၃၅ ရာခိုင်နှုန်း ပိုင်ဆိုင်ထားသည့် ကုမ္ပဏီများအနေဖြင့် ကုန်သွယ်မှုလုပ်ငန်းများဆောင်ရွက်နိုင်ပြီး အာမခံလုပ်ငန်းများတွင်လည်း နိုင်ငံခြားသားများအနေဖြင့် ၃၅ ရာခိုင်နှုန်းအထိ ပါဝင်လုပ်ကိုင် နိုင်မည်ဖြစ်ကြောင်းနှင့် တိုက်ခန်းများ ရုံးခန်း များကိုလည်း ဝယ်ယူနိုင်မည်ဖြစ်ကြောင်း ဦးအောင်နိုင်ဦးက ပြောကြားသည်။
