အငြင်းပွားဖွယ်ဖြစ်နေသော တရုတ်-ပါကစ္စတန် စီးပွားရေးစြင်္ကံလမ်း (CPEC) တစ်လျှောက် တရုတ်-မြန်မာ စီးပွားရေးစြင်္ကံ လမ်းတစ်ရပ်ကို တည်ဆောက်ရန်အတွက် သဘောတူညီချက်တစ်ရပ်ကို တရုတ်နှင့် မြန်မာနိုင်ငံတို့ လက်မှတ်ရေးထိုးရန် နီးစပ်နေပြီဖြစ်ကြောင်း The Time of India သတင်းဌာနက ဖော်ပြသည်။

အဆိုပါ စြင်္ကံလမ်း စတင်သည်နှင့် တရုတ်နိုင်ငံ၏ ရန်ပုံငွေများ မြန်မာနိုင်ငံသို့ အလုံးအရင်းဖြင့် စီးဝင်လာမည်ဖြစ်ရာ အိန္ဒိယနိုင်ငံအနေဖြင့် သူ၏ အရှေ့ဘက်အိမ်နီးချင်း နိုင်ငံအပေါ် သြဇာလွှမ်းမိုးမှု ထပ်မံ လျော့ကျလာနိုင်ဖွယ်ရှိကြောင်း အဆိုပါ သတင်းဌာနက ဖော်ပြသည်။

ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန ညွှန်ကြားရေးမှူးချုပ် ဦးအောင်နိုင်ဦးက တရုတ်နှင့် မြန်မာနိုင်ငံတို့သည် စြင်္ကံလမ်း တည်ဆောက်ရန် နားလည်မှု စာချွန်လွှာတစ်ရပ်ကို ရေးထိုးလိမ့်မည်ဖြစ်ကြောင်း ဇူလိုင် ၁၈ ရက်က ပြောကြားခဲ့သည်။

ယခုသဘောတူညီချက်သည် ယခင်က ပြုလုပ်ထားသည့် ကျယ်ပြန့်သော သဘောတူညီချက်တစ်ရပ်အပေါ် အခြေခံထားခြင်းဖြစ်ပြီး ယခင်သဘောတူညီချက်တွင် မြန်မာနိုင်ငံ၌ အခြေခံ အဆောက်အအုံများ တည်ဆောက်ရန်၊ တယ်လီဖုန်း ဆက်သွယ်ရေး အထောက်အပံ့များ မြှင့်တင်ရန်နှင့် သယ်ယူပို့ဆောင်ရေးနှင့် စိုက်ပျိုးရေးကဏ္ဍတို့အား တိုးတက်အောင် ပြုလုပ်ရန်တို့ ပါရှိသည်။

နှစ်နိုင်ငံအစိုးရအဖွဲ့များက ယခု စီမံကိန်းအပေါ် စိတ်အားထက်သန်နေကြသော်လည်း လုပ်ငန်းရှေ့ဆက်ရန် တားဆီးနိုင်သည့် စိန်ခေါ်မှုများစွာ ရှိနေသည်ဟု သတင်းရင်းမြစ်များက ဆိုသည်။

မြန်မာနိုင်ငံ အစိတ်အပိုင်းများတွင် တိုင်းရင်းသားလက်နက်ကိုင် ပဋိပက္ခများ ရှိနေခြင်းနှင့် မြန်မာနိုင်ငံသား တစ်စိတ်တစ်ပိုင်း၌ တရုတ်ဆန့်ကျင်ရေး သဘောထားရှိနေခြင်းတို့သည် အဟန့်အတားများထဲ၌ ပါဝင်သည်ဟု ဆိုသည်။ ထို့ပြင် တရုတ်က ရန်ပုံငွေ ထောက်ပံ့သော ဆည်တည်ဆောက်ရန် စီမံကိန်းတစ်ရပ်ကို ဖျက်သိမ်းထားရသည့် မြန်မာနိုင်ငံ၌ အကြွေးထောင်ချောက်တစ်ရပ်ကို စိုးရိမ်နေသည့် ပြဿနာလည်း ရှိနေသည်။

“ကျွန်တော်တို့မှာ အကြွေးခြိမ်းခြောက်မှုနဲ့ ပတ်သက်ပြီး အမြင်များစွာ ရှိနေပေမဲ့ မြန်မာနိုင်ငံအနေနဲ့ OBOR စီမံကိန်းကို ဘေးဖယ်မထားနိုင်ပါဘူး” ဟု မြန်မာနိုင်ငံ ကုန်သည်စက်မှုအသင်းချုပ် ဒုတိယဥက္ကဋ္ဌ ဦးမောင်မောင်လေးက ပြောကြားခဲ့သည်။

ယခုစီစဉ်ထားသော စြင်္ကံလမ်းသည် တရုတ်နိုင်ငံ ယူနန်ပြည်နယ်နှင့် မြန်မာနိုင်ငံရှိ အရေးပါသည့် စီးပွားရေးအချက်အချာ နေရာများဖြစ်သော မန္တလေး၊ ရန်ကုန်မြို့သစ်နှင့် ကျောက်ဖြူ အထူးစီးပွားရေးဇုန် (SEZ) တို့ကို ဆက်သွယ်ပေးမည်ဖြစ်သည်။ ယခုစီးပွားရေးစြင်္ကံလမ်းသည် ရန်ကုန်နှင့် ပြဿနာများ ဖြစ်ခဲ့သည့် ရခိုင်ပြည်နယ်တို့၏ ဆက်သွယ်မှုကိုလည်း အားကောင်းစေလိမ့်မည် ဖြစ်သည်။

တရုတ်အစိုးရအာဘော် သတင်းစာဖြစ်သော ဂလိုဘယ်တိုင်း(မ်) တွင် တရုတ်ကျွမ်းကျင်သူတစ်ဦးဖြစ်သော ပန်နီအန်းက ရေးသားခဲ့ရာ၌ စြင်္ကံလမ်းနှင့်ပတ်သက်၍ သဘောတူညီချက်သည် တရုတ်ရင်းနှီးမြှုပ်နှံမှုများ သေဆုံးတော့မည်ဟု သင်္ကာမကင်း ဖြစ်နေမှုကို ပြသလိုက်ခြင်းဖြစ်ကြောင်း ဖော်ပြထားသည်။ ၎င်းအပြင် ဘင်္ဂလားဒေ့ရှ်-တရုတ်-အိန္ဒိယ-မြန်မာ စီးပွားရေးစြင်္ကံလမ်းဖြစ်ပေါ် တိုးတက်မှု နှေးကွေးနေခြင်းကို ကျေနပ်မှုမရှိခြင်းနှင့်အတူ မြန်မာနိုင်ငံအနေဖြင့် တရုတ်-မြန်မာ စြင်္ကံလမ်းကို လှုံ့ဆော်ခြင်းအားဖြင့် ဒေသတွင်းသို့ ကိုယ်တိုင်ပူးပေါင်း ဝင်ရောက်ခြင်းကို ပိုမိုလိုလားကြောင်း ပြသလိမ့်မည်ဟုလည်း ဟိုင်နန်ပြည်နယ်ရှိ တောင်တရုတ်ပင်လယ် လေ့လာရေးဆိုင်ရာ အမျိုးသားဌာနမှ ပန်နီအန်းက ရေးသားခဲ့သည်။