ဇူလိုင် ၁၈ ရက်က ရန်ကုန်ပြည်သူ့ဆေးရုံကြီး အရေးပေါ်ဌာနတွင် အရေးပေါ် အခြေအနေများအတွက် အစမ်းလေ့ကျင့်ခြင်းများ လုပ်ဆောင်နေစဉ်

ငလျင်ကဲ့သို့ အရေးပေါ် အခြေအနေများတွင် လူနာများကို ကျန်းမာရေးစောင့်ရှောက်မှုများ အချိန်မီဆောင်ရွက်နိုင်ရန် ရန်ကုန်ပြည်သူ့ဆေးရုံကြီးတွင် ‘အရေးပေါ် အခြေအနေများအတွက် အစမ်းလေ့ကျင့်ခြင်း (Disaster Management Drill) များ ပြုလုပ် ဆောင်ရွက်ထားကြောင်း ရန်ကုန်ပြည်သူ့ဆေးရုံကြီးမှ သိရသည်။

အဆိုပါ အရေးပေါ် အခြေအနေများအတွက် အစမ်းလေ့ကျင့်ခြင်း (Disaster Management Drill) ကို ဇူလိုင် ၁၈ ရက်က ရန်ကုန်ပြည်သူ့ဆေးရုံကြီးရှိ အရေးပေါ် ဆေးကုသဌာနတွင် ပြုလုပ်ခဲ့ပြီး အရေးပေါ် အခြေအနေမျိုးတွင် ဆောင်ရွက်သွားမည့် လုပ်ငန်းများကို အစမ်းလေ့ကျင့်ခဲ့ကြောင်း သိရသည်။

“အရေးပေါ် အခြေအနေတွေ ဖြစ်လာခဲ့ရင် လုပ်ဆောင်ရမယ့်လုပ်ငန်းတွေကို အစမ်း လေ့ကျင့်တာပါ။ ဒီလိုအခြေအနေမျိုး ကြုံလာရင် စနစ်တကျ လုပ်ဆောင်နိုင်အောင် ရည်ရွယ်ပါတယ်။ ဆေးကုသမှုအပိုင်းတွေအပြင် တခြားလုပ်ငန်းဆောင်တာတွေ ဥပမာ- အရေးပေါ် အခြေအနေ ကြေညာချက်လိုမျိုး ထုတ်ပြန်ပြီး လုပ်ဆောင်ဖို့ စီစဉ်ထားတယ်။ အဲဒီလိုအချိန်မှာ မီဒီယာတွေကိုလည်း ဘယ်လိုသတင်းတွေ ထုတ်ပြန်မယ်ဆိုတာတွေ၊ ဆေးကုသမှုဧရိယာအတွင်း လူဦးရေတွေကို ကန့်သတ်ဝင်ခွင့်ပြုဖို့ကအစ စီစဉ်ထားပါတယ်” ဟု ဆေးရုံကြီးမှ လက်ထောက်ညွှန်ကြားရေးမှူး (ဆေးရုံအုပ်) ဒေါက်တာခင်မောင်ကြီးက ပြောကြားသည်။

ကျန်းမာရေးနှင့် အားကစားဝန်ကြီးဌာန အနေဖြင့် စစ်ကိုင်းငလျင်ပြတ်ရွေ့ပေါ်တွင် တည်ရှိပြီး လူဦးရေ ထူထပ်သော နေပြည်တော်၊ ရန်ကုန်၊ မန္တလေးနှင့် ပဲခူးမြို့ကြီးများတွင် ငလျင်ဘေးအန္တရာယ်ဆိုင်ရာ ကျန်းမာရေးစီမံခန့်ခွဲမှုလုပ်ငန်းများ ဦးစားပေး ဆောင်ရွက်လျက်ရှိကြောင်းနှင့် ငလျင်ကဲ့သို့ အရေးပေါ် အခြေအနေများတွင် ကျန်းမာရေး စောင့်ရှောက်မှု လိုအပ်သူများအတွက် ၂၄ နာရီ ဆက်သွယ်နိုင်သော အရေးပေါ်ဖုန်းနံပါတ်နှင့် အရေးပေါ်လူနာများ လွှဲပြောင်းပို့ဆောင် ကုသရေးအတွက် လူနာတင်ယာဉ်ကွန်ရက်တစ်ခု တည်ထောင်ရန် လုပ်ဆောင်လျက်ရှိကြောင်း သိရသည်။

မြန်မာနိုင်ငံတွင် လတ်တလော ဖြစ်ပေါ်နေသော ငလျင်လှုပ်ခတ်မှုများကြောင့် ပြည်သူလူထု စိုးရိမ်ကြောင့်ကြမှု မရှိစေရန်၊ ငလျင်ဘေးအန္တရာယ် ကျရောက်လာပါက ကျန်းမာရေးဌာနများ၏ လုပ်ငန်းဆောင်တာများ နှောင့်နှေးကြန့်ကြာမှုမရှိဘဲ ကျန်းမာရေး စောင့်ရှောက်မှုပေးနိုင်ရန် ကျန်းမာရေးဌာနများတွင် ငလျင်ဘေးအန္တရာယ် လျော့ကျစေရန်နှင့် ငလျင်ဘေးအန္တရာယ်ဆိုင်ရာ ကျန်းမာရေးစောင့်ရှောက်မှု လုပ်ငန်းများဖြစ်သည့် ကြိုတင်ပြင်ဆင်မှုများ၊ တုံ့ပြန်ဆောင်ရွက်မှုများနှင့် ပြန်လည်ထူထောင် တည်ဆောက်ရေး လုပ်ငန်းများတွင် နှီးနွှယ်ဌာနဆိုင်ရာများ၊ အဖွဲ့အစည်းများနှင့် ပူးပေါင်းဆောင်ရွက်မှုများ ပိုမိုအားကောင်းစေရန် ‘ငလျင်ဘေးအန္တရာယ်အပေါ် ကျန်းမာရေးစောင့်ရှောက်မှုဆိုင်ရာ လုပ်ငန်းညှိနှိုင်းအစည်းအဝေး’ ကို မတ် ၁၅ ရက်က ကျင်းပခဲ့သည်။

ယင်းအစည်းအဝေးတွင် မြန်မာနိုင်ငံရှိ စစ်ကိုင်းငလျင်ပြတ်ရွေ့ပေါ်တွင် တည်ရှိသည့် လူဦးရေထူထပ်သော နေပြည်တော်၊ ရန်ကုန်၊ မန္တလေးနှင့် ပဲခူးမြို့ကြီးများတွင် ငလျင်ဘေးအန္တရာယ်ဆိုင်ရာ ကျန်းမာရေးစီမံခန့်ခွဲမှု လုပ်ငန်းများ ဦးစားပေးဆောင်ရွက်ရန်၊ ဘေးအန္တရာယ်ဆိုင်ရာ ကျန်းမာရေးအဖွဲ့များနှင့် လျင်မြန်တုံ့ပြန် ပြည်သူ့ကျန်းမာရေးအဖွဲ့များ ဖွဲ့စည်း၍ အသင့်အနေအထား ပြင်ဆင်ထားရှိရန်၊ နှီးနွှယ်ဌာနဆိုင်ရာများနှင့် အဖွဲ့အစည်းများ၏ အရင်းအမြစ်များကို မျှဝေသုံးစွဲရန်၊ အရေးပေါ်လူနာများ လွှဲပြောင်း ပို့ဆောင်ရေးအတွက် ကျန်းမာရေးနှင့် အားကစားဝန်ကြီးဌာနနှင့် နှီးနွှယ်ဌာနများ၊ အဖွဲ့အစည်းများ ပူးပေါင်း၍ လူနာတင်ယာဉ်ကွန်ရက်တစ်ခု တည်ထောင်သွားရန်၊ ငလျင်ဘေးအန္တရာယ်ဆိုင်ရာ ကျန်းမာရေးစောင့်ရှောက်မှု လုပ်ငန်းအဖွဲ့တစ်ခုအား ပြည်ထောင်စုဝန်ကြီးဌာနများနှင့် အဖွဲ့အစည်းများ ပါဝင်ဖွဲ့စည်းရန်နှင့် ရန်ကုန်၊ မန္တလေး၊ နေပြည်တော်ဆေးရုံကြီးများတွင် လိုအပ်ချက်များအား ဖြည့်ဆည်း၍ ဇာတ်တိုက်လေ့ကျင့်ခန်းများ ပြုလုပ်သွားရန် ဆွေးနွေးခဲ့ကြောင်း သိရသည်။