အိမ်မဲမြို့နယ် ညောင်ကုန်းချောင်းဖျား ကျေးရွာမီးလင်းရေးအတွက် ဟုဆိုကာ တိုင်းဒေသကြီး လွှတ်တော်ကိုယ်စားလှယ် ဦးအောင်ကျော်မြိုင်က ငွေကျပ်သိန်း ၁၀၀ အား ကျေးရွာဒေသခံများထံမှ တောင်းခံခဲ့သည့် ဖြစ်စဉ်ကို အဂတိလိုက်စားမှု တိုက်ဖျက်ရေး ကော်မရှင်ထံ တိုင်ကြားခဲ့ရာတွင် ကော်မရှင်၏ စစ်ဆေးမှုအရ လွှတ်တော်ကိုယ်စားလှယ်မှာ လုပ်ပိုင်ခွင့်ကို အလွဲသုံးစားပြု၍ ငွေကျပ် သိန်း ၁၀၀ အား မမှန်မကန် တောင်းခံရယူခဲ့သော်လည်း ၎င်း၏ ကိုယ်ကျိုးအတွက် သုံးစွဲခဲ့မှု မရှိခြင်းနှင့် လာဘ်ပေးလာဘ်ယူ ပြုလုပ်ကြောင်း အထောက်အထား ခိုင်မာမှု မရှိသောကြောင့် ဟုဆိုကာ အဂတိလိုက်စားမှု တိုက်ဖျက်ရေးကော်မရှင်မှ အရေးယူဆောင်ရွက်ခြင်း မပြုဘဲ လွှတ်တော်မှသာ အရေးယူ ဆောင်ရွက်ရန် ဧရာဝတီတိုင်းဒေသကြီး လွှတ်တော်ဥက္ကဋ္ဌထံသို့ အကြောင်းကြားစာ ပြန်လည်ပေးပို့ခဲ့ပြီး လွှတ်တော်မှ စုံစမ်းစစ်ဆေးပြီးနောက် ခေါ်ယူသတိပေးလက်မှတ် ထိုးရန်သာ ဆုံးဖြတ်ခဲ့မှုအပေါ် အဂတိလိုက်စားမှု တိုက်ဖျက်ရေးကော်မရှင်ထံ တိုင်ကြားခဲ့သည့် ဦးသူရစိုးက ဘာလုပ်လုပ် မေမေ့ရဲ့ သားနိုင်တယ် ဆိုတာများ ဖြစ်နေပြီလားဟု မေးခွန်းထုတ်ခဲ့ကြောင်း သတင်းရရှိသည်။

ဖြစ်စဉ်မှာ အိမ်မဲမြို့နယ် တကောကျေးရွာ မီးလင်းရေးအတွက် ဘတ်ဂျက်ကျလာခဲ့သည့် ထရန်စဖော်မာမှာ တကောကျေးရွာတွင် လိုအပ်ခြင်း မရှိတော့သောကြောင့် ညောင် ကုန်းချောင်းဖျားကျေးရွာသို့ ဘတ်ဂျက်ခေါင်းစဉ် ပြောင်းလဲချထားခဲ့ကြောင်း၊ ယင်းကဲ့သို့ ချထားပြီးနောက် လွှတ်တော်ကိုယ်စားလှယ် ဖြစ်သူ ဦးအောင်ကျော်မြိုင်က ကျေးရွာသို့ သွားရောက်ကာ ကျေးရွာမီးလင်းရေးအတွက် လုပ်ဆောင်ပေးမယ်။ ဘတ်ဂျက်ခေါင်းစဉ်အ ပြောင်းအလဲကြောင့် လိုအပ်သည့် ကြိုးဖိုးများအား ကျေးရွာမှ ထည့်သွင်းပေးရမယ်ဆိုကာ ယင်းတွက်ချက်မှုများအရ သိန်း ၃၀၀ ခန့် ကုန်ကျမည်ဟု ပြောဆိုခဲ့ကြောင်း၊ ယင်းကုန် ကျငွေများမှာ နေအိမ်များအား သွယ်တန်းမည့် မီးကြိုးများ မီတာပုံးများ ပါဝင်ခြင်း မရှိသေးဘဲ တကောကျေးရွာမှာ ညောင်ကုန်းချောင်းဖျား ကျေးရွာသို့ ဘတ်ဂျက်ခေါင်းစဉ် ပြောင်းရွှေ့ခများ၊ မြို့နယ်အထွေထွေ အုပ်ချုပ်ရေးဦးစီးဌာနနှင့် တိုင်းအဆင့် တာဝန်ရှိသူများ အားပေးရမည့် ငွေကြေးများနှင့် လိုအပ်သည့် ကြိုးဖိုးများဖြစ်ကြောင်း ပြောဆိုခဲ့ကြောင်း၊ အဆိုပါပြောကြားချက်များကို ကျေးရွာဒေသ ခံများက အသံဖမ်း မှတ်တမ်းတင်ထားခဲ့ကြောင်း၊ ထို့နောက် ကျေးရွာမှ ကနဦး စု ဆောင်းရရှိငွေ ကျပ်သိန်း ၁၀၀ အား လာ ရောက်ယူဆောင်သွားခဲ့ကြောင်း၊ ကျေးရွာ ဒေသခံများက မီးလင်းရေးနှင့်ပတ်သက်၍ စုံစမ်းရာတွင် ကျေးရွာသို့ ချထားပေးသည့် ထရန်စဖော်မာနှင့် ကြိုးများမှာ နိုင်ငံတော် ဘတ်ဂျက်မှ အကုန်အကျခံကာ လုပ်ဆောင် ပေးခြင်းဖြစ်သည်ကို သိရှိရသောကြောင့် မြို့နယ် NLD ရုံးသို့ သွားရောက်တိုင်ကြားခဲ့ပြီး မကြာမီတွင် ဦးအောင်ကျော်မြိုင်က ကျေးရွာသို့ လာရောက်၍ ၎င်းယူဆောင်သွားသည့် ငွေကျပ်သိန်း ၁၀၀ အနက် သိန်း ၉၀ အား ပြန်လည်ပေးအပ်ခဲ့ပြီး ကျန်ရှိနေသေးသည့် ၁၀ သိန်းအား လစာထုတ်မှယူရန် ပြောဆိုခဲ့ပြီးနောက် ထပ်မံသွားရောက် ပေးအပ်ခဲ့ကြောင်း၊ အဆိုပါဖြစ်စဉ်အား သတင်းသွားရောက်ယူခဲ့သူ အိမ်မဲမြို့ခံ သတင်းသမားတစ်ဦးဖြစ်သူ ဦးသူရစိုးအား ဦးအောင်ကျော်မြိုင်က သတင်းမရေးရန်အတွက် ခေါ်ယူပြောဆိုခဲ့ပြီး ငွေကြေးပေးအပ်ရန် ညှိနှိုင်းမှုများကြောင့် ဦးသူရစိုးက အထက်ပါ ဖြစ်စဉ်နှင့်ပတ်သက်၍ အဂတိလိုက်စားမှု တိုက်ဖျက်ရေး ကော်မရှင်ထံ တိုင်ကြားခဲ့ခြင်းဖြစ်ကြောင်း၊ ယင်းတိုင်ကြားမှုကို ကော်မရှင်က ဧပြီ ၂၀ ရက်တွင် လျှို့ဝှက် လာရောက်စစ်ဆေးခဲ့ပြီးနောက် တိုင်ကြားခံရသူ ဦးအောင်ကျော်မြိုင်မှာ လုပ်ပိုင်ခွင့်အား အသုံးပြု၍ ငွေကျပ်သိန်း ၁၀၀ အား တောင်းခံခဲ့သည် မှန်ကန်သော်လည်း ၎င်းကိုယ်ကျိုးအတွက် အသုံးပြုခဲ့ခြင်း မရှိခြင်း၊ လာဘ်ပေးလာဘ်ယူ ပြုလုပ်ကြောင်း အထောက်အထား ခိုင်မာမှု မရှိသောကြောင့် ဟုဆိုကာ ကော်မရှင်အနေဖြင့် အရေးယူ မဆောင်ရွက်နိုင်သောကြောင့် တိုင်းဒေသကြီးလွှတ်တော်မှ  အရေးယူ ဆောင်ရွက်သွားရန် လွှတ်တော်ဥက္ကဋ္ဌထံသို့ အကြောင်းကြားစာ ပေးပို့ခဲ့ပြီး တိုင်ကြားသူ ဦးသူရစိုးထံသို့လည်း အကြောင်းပြန်ကြားလွှာ မိတ္တူပေးပို့ခဲ့ကြောင်း၊ ယင်းဖြစ်စဉ်အား လွှတ်တော်မှ စုံစမ်းစစ်ဆေးရေး ကော်မတီဖွဲ့၍ စစ်ဆေးပြီးနောက် လွှတ်တော်ကိုယ်စားလှယ် ဦးအောင်ကျော်မြိုင်က ပြည်သူများအကြား အထင်အမြင်လွဲမှားအောင် လုပ်ဆောင်ခဲ့သည် ဟုဆိုကာ နောက်နောင် ယခုကဲ့သို့ လုပ်ဆောင်မှုမျိုး မလုပ်ဆောင်ရန် လွှတ်တော်ဥက္ကဋ္ဌရှေ့တွင် လက်မှတ်ထိုး ကတိပြုရန် ဆုံးဖြတ်ခဲ့ကြောင်း သိရသည်။

“...ကိုယ့်တိုင်းပြည် ခေါင်းဆောင်ရဲ့ လျှောက်နေတဲ့လမ်း လမ်းညွှန်မှုက လာဘ်ပေးလာဘ်ယူမှုနဲ့ အဂတိကင်းစင်ဖို့ လုပ်နေတယ်။ လွှတ်တော်ကိုယ်စားလှယ်ကတော့ ကျေးရွာအစည်းအဝေးမှာ အစိုးရဝန်ထမ်းတွေကို လာဘ်ပေးလာဘ်ယူလုပ်ဖို့ တိုက်တွန်းပြောဆိုနေတယ်။ အသံဖိုင်သက်သေ အစည်းအဝေးခန်းမထဲက လူသက်သေရှိတာတောင် သူဟာခံဝန်ကတိလက်မှတ် ထိုးရရုံပဲ အပြစ်သက်ရောက် ခဲ့တယ်ဆိုတော့ ကိုယ့်ခေါင်းဆောင်တွေ ပြောစကားနဲ့ လွဲချော်မှုတွေရှိနေတော့ ဒီအပြစ်ပေးမှုအပေါ် စိတ်ပျက်မိတယ်။ ဘာလုပ်လုပ် မေမေ့ရဲ့သား နိုင်တယ်ဆိုတာများ ဖြစ်နေပြီလား” ဟု ဦးသူရစိုးက ပြောကြားသည်။

လွှတ်တော်ကိုယ်စားလှယ် ဦးအောင်ကျော်မြိုင်အား စစ်ဆေးဆောင်ရွက်ခဲ့ခြင်းနှင့် ပတ်သက်၍ ဧရာဝတီတိုင်းဒေသကြီး လွှတ်တော်ဒုတိယဥက္ကဋ္ဌ ဦးစံမင်းအောင်က “စိစစ်ရေးကော်မတီက ပြန်တင်ပြတယ်။ အများပြည်သူ ထင်ယောင်ထင်မှား ဖြစ်ပေါ်စေခဲ့တဲ့အပေါ်မှာ စိစစ်ရေး ကော်မတီက ဥက္ကဋ္ဌကြီးရဲ့ရှေ့မှာ ဝန်ခံလက်မှတ်ရေးထိုးစေသင့် ပါတယ်လို့ တင်ပြလာတယ်။ အခုလာမယ့် လွှတ်တော်ပြန်စရင် လက်မှတ်ရေးထိုးစေမယ်ဟု ပြောကြားသည်။