အိန္ဒိယက ဝယ်ယူလာမှုကြောင့် ကုလား ပဲအုပ်စုဝင်ပဲများ V2 သုံးတင်းဝင်တစ်အိတ် ကျပ် ၁၀၀၀၀ နှင့် V7သုံးတင်းဝင်တစ်အိတ် ကျပ် ၁၈၀၀၀ ခန့် မန္တလေးဈေးကွက်တွင် ဈေးခုန်တက်သွားကြောင်း မန္တလေးပဲကုန်သည်များထံက သိရသည်။
အဆိုပါပဲများမှာ လွန်ခဲ့သည့် ဇူလိုင် ပထမအပတ်အတွင်းက V2 မှာ သုံးတင်းဝင် တစ်အိတ်လျှင် ကျပ် ၅၇၀၀၀ ဈေးနှင့် V7 မှာ ကျပ် ၅၈၀၀၀ရှိခဲ့ရာမှာ ဇူလိုင် ၁၇ရက်တွင် V2 မှာ ကျပ် ၆၇၀၀၀ နှင့် V7 မှာ ကျပ် ၇၆၀၀၀ ဈေးအထိ ထူးထူးခြားခြားဈေးခုန်တက်လာကြောင်း မန္တလေးမြို့မှ ဦးစိုးဝင်းမြင့် (စိုးဝင်း မြင့်ပွဲရုံ) က ပြောကြားသည်။
“မန္တလေးဈေးကွက် ကုလားပဲအုပ်စု V2V7 ဈေးနှုန်းတက်လာတယ်။ ပြီးခဲ့တဲ့ရက်ပိုင်း ငါးရက်ကစရင် ထိုးတက်လာတယ်။ V2 ဆိုရင် ကျပ် ၅၇၀၀၀ အထိ ဈေးပြုတ်ကျသွားပြီး V7 ဆိုရင်လည်း သုံးတင်းတစ်အိတ်ကို ကျပ် ၅၈၀၀၀ အထိ ဈေးပြုတ်ကျသွားတယ်။ လက်ရှိဈေးပြုတ်ကျပြီး ရက်ပိုင်းငါးရက်အတွင်း အိန္ဒိယက အဓိကဝယ်လိုအား တိုးမြင့်လာတယ်။ ပဲစင်းငုံ၊ မတ်ပဲတို့ထက် ဈေးကတက်လာတယ်။ V2 ကုလားပဲ ဒီနေ့ပေါက်ဈေး သုံးတင်းတစ်အိတ်ကို ကျပ် ၆၇၀၀၀ ဈေး ပေါက်ပြီး V7 ကုလားပဲဈေးက ကျပ် ၇၆၀၀၀ ဈေးပေါက်တယ်။ V2 ကုလားပဲသုံးတင်းဝင် တစ်အိတ်ကို ကျပ် ၁၀၀၀၀ ဈေးတက်ခဲ့ပြီး V7 ကုလားပဲဈေးက ကျပ် ၁၈၀၀၀ လောက် ထူးထူးခြားတက်လာတယ်။ မန္တလေးဈေးကွက်အနေနဲ့ အိန္ဒိယဝယ်လိုအားကို မူတည်နေတယ်။ V7 ကုလားပဲဈေးအနေနဲ့ ထပ်တက်ဖို့ရှိတယ်။ ကုလားပဲအုပ်စုက တစ်နှစ်မှတစ်ကြိမ် ပဲစိုက်ပျိုးလို့ရတဲ့ ဆောင်းသီးနှံဖြစ်တယ်။ ဖေဖော်ဝါရီ၊ မတ်လမှ ပေါ်ခဲ့တဲ့အတွက် ၂၀၁၈ ခုနှစ်အတွက် ထပ်ပေါ်စရာမရှိတဲ့ ပဲအမျိုးအစားဖြစ်တယ်။ လက်ရှိစိုက်ပျိုးဖို့ မျိုးသမားလည်း ဝယ်ယူပြီး ပြည်တွင်းစားသုံးမှု ဈေးကွက်လည်းရှိပြီး အိန္ဒိယဈေးကွက်ကလည်း ဝယ်ယူနေတာကြောင့် လက်ရှိဈေးကွက်ပေါက်ဈေးထက် ကျလာစရာမရှိဘူးလို့ သုံးသပ်လို့ရတယ်။၂၀၁၉ ခုနှစ် ဇနန်ဝါရီလလောက်မှ ပြန်လည်ပေါ်လာမယ်” ဟု ၎င်းက ဆက်လက်ပြောကြားသည်။
အဆိုပါ V2 နှင့် V7 ပဲများကို မန္တလေး၊ စစ်ကိုင်းနှင့် မကွေးတိုင်းဒေသကြီးတို့တွင် အများဆုံးစိုက်ပျိုးကြပြီး ယခုအချိန်၌ ၎င်းပဲများမှာ တောင်သူများလက်ဝယ်တွင် လုံးဝမရှိသလောက်ဖြစ်နေပြီး သိုလှောင်သူများနှင့် ပဲခွဲစက်များ၌သာ ကျန်နေသေးကြောင်း သိရသည်။
မနှစ်က လက်ရှိအချိန်တွင် ကုလားပဲအုပ်စုဝင် ပဲများသည် ယခုလက်ရှိဈေးထက် ပိုခဲ့ပြီး သုံးတင်းဝင်တစ်အိတ် ကျပ် ၉၀၀၀၀ ကျော်ဈေးရှိခဲ့သော်လည်း ဈေးနှုန်းကျခဲ့ရာ ပေါ်ပေါ်ချင်းကို ကျပ် ၇၀၀၀၀ ပတ်ဝန်းကျင် ဈေးနှုန်းရှိခဲ့ပြီးနောက် ဇူလိုင်လဆန်းတွင် V2 ကျပ် ၅၇၀၀၀ နဲ့ V7 ကျပ် ၅၈၀၀၀ အထိ ဈေးကျဆင်းလာကြောင်း သိရသည်။
လက်ရှိမန္တလေးဈေးကွက်၌ ဂျပန်နှမ်း ဈေးနှုန်းမှာ ပဲမျိုးစုံအနက် သုံးတင်းဝင်တစ် အိတ်လျှင် ကျပ် ၁၆၅၀၀၀ နှုန်းဖြင့် ထိပ်ဆုံး၌ ရောက်ရှိနေပြီး ထောပတ်ပဲမှာ သုံးတင်းဝင် တစ်အိတ်လျှင် ကျပ် ၁၃၅၀၀၀ နှုန်းဖြင့် ဒုတိယအနေရာ၌ ရပ်တည်လျက်ရှိကြောင်း သိရသည်။
