ငွေစာရင်းများကို ပွင့်လင်းမြင်သာစွာ မရှင်းလင်းခဲ့ခြင်းကြောင့်ဟုဆိုကာ တိုင်းလွှတ်တော်ကော်မတီသို့ တိုင်ကြားခံထားရသည့် Power Eleven ကုမ္ပဏီ၏ အချက်အလက်များအား ရန်ကုန်တိုင်းဒေသကြီး လွှတ်တော် ပို့ဆောင်ရေး၊ ဆက်သွယ်ရေး၊ ဆောက်လုပ်ရေးနှင့် စက်မှုလက်မှုရေးရာကော်မတီမှ တောင်းခံထားကြောင်း ကောက်မတီအဖွဲ့ဝင် ပန်းဘဲတန်းမြို့နယ် မဲဆန္ဒနယ်အမှတ် (၁) မှ တိုင်းဒေသကြီး လွှတ်တော်ကိုယ်စားလှယ် ဦးသန်းနိုင်ဦးက ပြောကြားသည်။
“ကော်မတီဥက္ကဋ္ဌ ကနေပြီးတော့ သတ်မှတ်ချက် ၁၀ ခုလောက် သတ်မှတ်ပြီးတော့ ဇူလိုင် ၂၃ ရက် နောက်ဆုံးထားပြီး ကော်မတီကို ပေးပို့ဖို့ပြောထားတယ်။ ၂၀၁၇ အောက်တိုဘာကနေ ၂၀၁၈ ဇွန်အထိကို လအလိုက် ယာဉ်တွေရဲ့ယာဉ်နံပါတ်တွေ၊ ယာဉ်ပိုင်ရှင်တွေ၊ ရရှိငွေစာရင်းတွေ၊ နောက်ပြီးတော့ အစည်းအဝေး မှတ်တမ်းတွေ၊ CCTV တပ်စဉ်ဖို့ ကောက်ခံထားတဲ့ ငွေကိစ္စတွေ၊ ငွေပုံးကို ဖောက်ပြီးတော့ ရေတွက်တဲ့သူတွေ အမည်တွေ နေ့စဉ်ရငွေတွေ၊ ၃၂ သိန်း လှူဒါန်းထားတဲ့ ကိစ္စတွေ၊ ဝန်ဆောင်မှုနဲ့ စီမံခန့်ခွဲမှုဟာတွေ၊ Power Eleven ကုမ္ပဏီရဲ့ လစဉ်ဝင်တဲ့ဟာတွေ အားလုံး အချက် ၁၀ ချက်ကို လွှတ်တော်ကော်မတီက ပေးလိုက်တယ်။ သူတို့ကို စစ်ဆေးတယ် ဆိုတာထက် တွေ့ရှိချက်တွေကို တင်ပြမယ်”ဟု ၎င်းက ပြောကြားသည်။
ထို့ပြင် မြန်မာတိုင်း(မ်) သတင်းစာတွင် Power Eleven ကုမ္ပဏီမှ ကိုတရုတ်လေး က သက်ဆိုင်ရာအဖွဲ့မှ ဝင်ရောက် စစ်ဆေးရာတွင် ငွေအလွဲသုံးစားမှု မရှိကြောင်း၊ တိုင်းလွှတ်တော်ကော်မတီသို့ တိုင်ကြားရာတွင်လည်း စစ်ဆေးရာတွင် အဖြေမပေါ်ခဲ့သည်ဟု ဖော်ပြခဲ့ကြောင်း၊ သို့သော် ရန်ကုန်တိုင်းဒေသကြီး လွှတ်တော် ပို့ဆောင်ရေး၊ ဆက်သွယ်ရေး၊ ဆောက်လုပ်ရေးနှင့် စက်မှုလက်မှုရေးရာကော်မတီမှ စစ်ဆေးခြင်းများ မပြုလုပ်ရသေးကြောင်း ဦးသန်းနိုင်ဦးက ပြောကြားသည်။ ဆန်းထူးအောင်
