ဇူလိုင် ၁၆ ရက်က နေပြည်တော်တွင် ကျင်းပသည့် ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ တတိယအစည်းအဝေး နောက်ဆုံးနေ့တွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် မိန့်ခွန်းပြောကြားနေစဉ် (ဓာတ်ပုံ-မောင်ထူး)
ငြိမ်းချမ်းရေးသည် အောက်ခြေပြည်သူများအတွက် တွေ့မြင်ခံစားနိုင်သည့် ထူးခြားကောင်းမွန်သော အပြောင်းအလဲများဖြစ်လာရန် အရေးကြီးကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဇူလိုင် ၁၆ ရက်တွင် နေပြည်တော်၌ ကျင်းပသည့် ပြည်ထောင်စု ငြိမ်းချမ်းရေးညီလာခံ ၂၁ ရာစုပင်လုံ နောက်ဆုံးနေ့၌ မိန့်ခွန်းပြောကြားရာတွင် အထက်ပါကဲ့သို့ ထည့်သွင်းပြောကြားခဲ့ခြင်း ဖြစ်သည်။
“ငြိမ်းချမ်းရေးဟာ အောက်ခြေပြည်သူတွေအတွက် ပြည်သူတွေ တွေ့မြင်ခံစားနိုင်တဲ့ ထူးခြားကောင်းမွန်တဲ့ အပြောင်းအလဲတွေ ဖြစ်ပေါ်လာဖို့ အရေးကြီးပါတယ်။ ဒါကြောင့် သက်ဆိုင်တဲ့ ဒေသခံပြည်သူတွေရဲ့ အသံတွေကို ကျွန်မတို့ရဲ့ ၂၁ ရာစုပင်လုံ ညီလာခံကြီးက နားထောင်ဖို့၊ ရင်ကြားစေ့ရာမှာ အောက်ခြေအဆင့်အထိ ပျံ့နှံ့ရောက်ရှိအောင် အစုအဖွဲ့အသီးသီးက ကြိုးပမ်းဆောင်ရွက်ပေးကြဖို့၊ ပဋိပက္ခဒေသက တိုင်းရင်းသားပြည်သူတွေရဲ့ လူမှုဘ၀ အပြောင်းအလဲတွေဖြစ်လာအောင် ကျွန်မတို့အစိုးရ အနေနဲ့ ကြိုးပမ်းဆောင်ရွက်သွားမှာ ဖြစ်တဲ့အတွက် ပူးပေါင်းပါဝင်ဆောင်ရွက်ပေးကြ ဖို့တိုက်တွန်းပြောကြား လိုပါတယ်” ဟု ဒေါ်အောင်ဆန်းစုကြည်က ပြောကြားသည်။
ထို့ပြင် နိုင်ငံတော်၏အတိုင်ပင်ခံပုဂ္ဂိုလ်က ပြီးပြည့်စုံသည့် ပြည်ထောင်စုငြိမ်းချမ်းရေး သဘောတူညီမှုဖြစ်ရန် လုံခြုံရေးကဏ္ဍဆိုင်ရာ သဘောတူညီချက်များ ပါဝင်မှ ဖြစ်မည်ဖြစ်ကြောင်းနှင့် အခက်အခဲများကို ဖြေရှင်းနိုင်ရန် နိုင်ငံရေးဆွေးနွေးမှုမူဘောင်၊ ဖွဲ့စည်းတည်ဆောက်မှုနှင့် ဒီဇိုင်းများကို အရှိအတိုင်း ရဲရဲတင်းတင်း ပြန်လည်သုံးသပ်ကာ ပိုမိုကောင်းမွန်သော လုပ်ငန်းစဉ်ဖြစ်လာရန် ကြိုးပမ်းကြရမည်ဟု ဆိုသည်။
ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ တတိယအစည်းအဝေး၌ စုစုပေါင်း အချက် ၁၄ ချက်ကို သဘောတူနိုင်ခဲ့ကြောင်း၊ နိုင်ငံရေးကဏ္ဍ လေးချက်၊ စီးပွားရေး ကဏ္ဍတစ်ချက်၊ လူမှုရေးကဏ္ဍ ခုနစ်ချက်နှင့် မြေယာကဏ္ဍ နှစ်ချက်တို့ဖြစ်ကြောင်း၊ ယခုအကြိမ် အစည်းအဝေးတွင် လုံခြုံရေးကဏ္ဍ၌ သဘောတူညီမှုများရရှိရန် မညှိနှိုင်းနိုင်ခဲ့ကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ထည့်သွင်းပြောကြားသည်။
“လုံခြုံရေးကဏ္ဍမှာတော့ ဒီတစ်ကြိမ်မှာ သဘောတူညီမှုတွေ ရရှိအောင် မညှိနှိုင်းနိုင်ခဲ့ပါဘူး။ ဒီအချက်တွေကို ကြည့်လိုက်ရင် နှစ်မျိုးတွေ့ရှိနိုင်ပါတယ်။ တစ်မျိုးက တိုင်းရင်းသားတွေ လိုချင်တဲ့အရာတွေ၊ စိုးရိမ်နေတဲ့ အချက်တွေကို လက်ရှိ ဖွဲ့စည်းပုံအခြေခံ ဥပဒေမှာ ပါရှိပေမဲ့လည်း ပိုမိုသေချာတဲ့ စကားလုံး အသုံးအနှုန်းတွေနဲ့ ထည့်သွင်းခဲ့တဲ့ အချက်တွေ ဖြစ်ပါတယ်။ နောက်တစ်မျိုးက တော့ ဖွဲ့စည်းပုံအခြေခံဥပဒေမှာ မပါရှိသေးတဲ့ အချက်တွေကို ပြည်ထောင်စု သဘောတူ ညီမှုတစ်ရပ်အနေနဲ့ ထည့်သွင်းခဲ့ကြတာ ဖြစ်ပါတယ်။ အခု သဘောတူညီလိုက်တဲ့ အချက်တွေက ပြည်ထောင်စုသဘောတူစာချုပ်ရဲ့ အစိတ်အပိုင်းတွေပဲ ဖြစ်ပါတယ်။ နောင်တစ်ချိန်မှာ ပြီးပြည့်စုံတဲ့ ပြည်ထောင်စုသဘောတူ စာချုပ်ကြီး ချုပ်ဆိုနိုင်ဖို့အတွက် နောက်ထပ်တက်လှမ်းလိုက်တဲ့ ခြေလှမ်းသစ်တွေလည်း ဖြစ်ပါတယ်” ဟု ဒေါ်အောင်ဆန်းစုကြည်က ထည့်သွင်းပြောကြားသည်။
NCA စာချုပ် လက်မှတ်ရေးထိုးခြင်း မရှိသေးသည့် တိုင်းရင်းသားလက်နက်ကိုင် အဖွဲ့အစည်းများအနေဖြင့် အစိုးရ၏ ဖိတ်ကြားချက်အရ ညီလာခံသို့တက်ရောက်လာပြီး ၎င်းတို့အနေဖြင့် ညီလာခံတွင် ဆွေးနွေးညှိနှိုင်းနေကြသည်ကို တွေ့မြင်သိရှိခွင့်ရခဲ့ကြကြောင်း၊ ထို့ပြင် အစိုးရပိုင်း၊ တပ်မတော်ပိုင်းနှင့် သီးခြားတွေ့ဆုံမှုများ ပြုလုပ်ရာတွင် လွတ်လပ်ပွင့်လင်းစွာဖြင့် ညှိနှိုင်းနိုင်ခဲ့ကြောင်း၊ ထို့အတွက် ငြိမ်းချမ်းရေးလုပ်ငန်းစဉ်တွင် ပါဝင်လာနိုင်စေမည့် အလားအလာကောင်းများစွာကို ရရှိခဲ့သည့်အတွက် ဝမ်းမြောက်ဖွယ်ရာဖြစ်ကြောင်း၊ ယင်းအချက်သည် ငြိမ်းချမ်းရေးညီလာခံ ၂၁ ရာစုပင်လုံအစည်းအဝေး၏ ရလဒ်ကောင်းဖြစ်ကြောင်း ဒေါ်အောင်ဆန်းစုကြည်က ထည့်သွင်းပြောကြားခဲ့သည်။
